Ruka 18:1-43
18 Pedzepo, akaaitira muezaniso unocokuita no kukosha ke kurumbwa eciita munamato uye kusaremba,
2 eciti: “Mu thaundi rimweni mainga muno mutongi wainga asikathyi Mwari uye wainga asikareremedzi munhu upi hake.
3 Uyezve, mu thaundi irona maingawo muno mufirhwakadzi umweni wairumbwa ecienda kuno mutongiwo ecimubvunza kuti: ‘Nditongereiwo no unatsi pa nyaya yangu no munhu ano ndaa na inini.’
4 Mutongiwo wakambotora nguwa asikadi kumutongera nyaya yake, asi wakazoti nge ce mu mwoyo make: ‘Inini andithyi Mwari uye andina basa no munhu upi hake,
5 asi ngokuti mufirhwakadzi uu ari kurumbwa ecindinyangadza, ndicamutongera nyaya yake no unatsi kuti asarumbwe eciuya ecindinyangadza dakara wandipandisa musoro.’”
6 Hino Tenzi akati: “Izwai zvakabhuiwa no mutongi uu, kunyazi hazvo asina unatsi!
7 Hino Mwari, angatama here kuita kuti anhu ake aakasanangura anomudeketerera usiku no masikati atongerhwe nyaya dzawo no unatsi, eciapangidzira mwoyo unononoka kutsamwa?
8 Ndinomubvunzai kuti, iyena acaita kuti nyaya dzawo dzitongwe no unatsi nokukasika. Asi kana Mwana we munhu akaguma, acagumira here kutenda kakadai pa nyika?”
9 Iyena akaitirawo muezaniso anhu anganani aidziti anatsi uye aiona amweni hingana kuti aana basa:
10 “Anarume airi akaenda mu tempro koonamata: Umwe wainga ari Mufarisi uye umweni wainga ari murongosi we musoho.
11 Mufarisiwo wakaima uye wakatanga kunamata nge ce mu mwoyo make eciti: ‘Mwari wangu, ndinomutendai ngokuti ndakasiyana no amweni ese—matsotsi, asina unatsi, anoita upombwe—kutobatanidzawo no murongosi we musoho uu.
12 Ndinotsanya kairi kese pa sumana; uye ndinopa cegumi co zviro zvese zvandinoona.’
13 Asi murongosi we musoho, wakaima nge cekure, asikatodi kunyazi kuringisa kudenga asi waidziponda pa diti, eciti: ‘Mwari wangu, ndizwireiwo usisi, inini mushaishi.’
14 Ndinomubvunzai kuti, mwanarume uu wakaenda kumba kake ari munatsi kupindira Mufarisiwo. Ngokuti munhu wese anodzikudza acadodoswa, asi uya anodzidodosa acakudzwa.”
15 Anhu aimuunzisirawo ana adoko kuti iyena aabate, asi afundi paakazviona, akatanga kuasumurura.
16 Asi Djesu akaadainza kuti auye kaari, eciti: “Siyai ana adoko auye kandiri, musaarambidze, ngokuti Umambo wa Mwari nge we anhu akaita hingana awona.
17 Zvezvirokwazvo ndinomubvunzai kuti, uya asikatambiri Umambo wa Mwari hinga mwana mudoko aazopindimo.”
18 Umwe we atungamiriri e Adjudha wakamubvunzisa kuti: “Mufundisi Wakanaka, ngazvipi zvandinodikana kuita kuti ndione upenyu usikaperi?”
19 Djesu akamubvunza kuti: “Ngei wecindidainza kuti wakanaka? Akuna munhu wakanaka kunza ka umwe basi, Mwari.
20 Iwewe unoiziya mitemo yekuti: ‘Usaite upombwe, usauraye, usabe, usaite upupuri we manyepo uye reremedza baba na mai ako.’”
21 Mwanarumewo wakati: “Ndinosotondoedza zvese izvi kubvira ndiciri mudoko.”
22 Paakazwa izvi, Djesu akamubvunza kuti: “Uciri kushoterhwa no ciro cimwe: Enda kootengesa zviro zvaunazvo, utore mareyo uipase arombo, ukadaro unozoona upfumi kudenga, kana ukapedza uya ugare muteeri wangu.”
23 Paakazwa izvi, iyena wakatsukwara maningi, ngokuti wainga wakapfuma maningi.
24 Djesu akamuringira uye akati: “Zvicashupha maningi ku anhu ano mare kuti apinde mu Umambo wa Mwari!
25 Zvezvirokwazvo, zviri nyore kuti kamero ipinde pa cibori ce tsingano yo kusona nayo pane kuti mupfumi apinde mu Umambo wa Mwari.”
26 Aya akazwa izvi akati: “Ndiani angaponeswa?”
27 Iyena akati: “Zviro zvisikakwanisiki ku anhu, zvinokwanisika kuna Mwari.”
28 Asi Pedru wakati: “Onai! Takasiya zvese zvatainga tinazvo uye takamuteerai.”
29 Iyena akaabvunza kuti: “Ndinomugondesai kuti, ‘apana munhu wakasiya nyumba, mukadzi, hama, abereki kana ana nge ndaa ye Umambo wa Mwari,
30 asikatambiri mu nguwa ino zvakawanda uye mune ramangwana,* upenyu usikaperi.”
31 Hino iyena akadainza afundi ake 12 pa muceto oabvunza kuti: “Izwai! Tiri kukwidza kuenda ku Djerusarema uye zvicaitika* zvese zvakatarhwa no aphorofita zvinocokuita no Mwana we munhu.
32 Ngo muezaniso, iyena acakandwa mu nyara dze anhu e madzinza amweni uye anozomuseka, anozomubata zvisikazi kunaka uye anozomupfirira mata.
33 Uye mumasure me kumuponda, acamuuraya, asi iyena acamutswa pa zuwa rocitatu.”
34 Asi awona akakonerhwa kuzwisisa zvaireya masoko ake, ngokuti masoko aya ainga afiswa kaari uye aazi kukwanisa kuzwisisa zvaareketa.
35 Djesu paainga ecikhwedera ku Djeriko, painga pano bofu rimweni rainga rakagara pa muceto pe gwanza recikumbira zviro.
36 Ngokuti rakazwa anhu akawanda ainga ecipinda, bofuro rakabvunzisa kuti zvinyi zvaiitika.
37 Akamubvunza kuti: “Ndi Djesu we ku Nazareta ari kupinda!”
38 Ngokudaro iyena wakakhuwa eciti: “Djesu, Mwana wa Dhavhidhi, ndizwireiwo usisi!”
39 Uye anhu ainga ari mberi kake akatanga kumusumurura, ecimubvunza kuti anyarare, asi iyena waitobambirira kukhuwa eciti: “Mwana wa Dhavhidhi, ndizwireiwo usisi!”
40 Hino Djesu akaima obvunza anhu kuti aunzise mwanarumewo kaari. Paakaguma, Djesu akamubvunzisa kuti:
41 “Unoda kuti ndikuitirei?” Iyena wakati: “Tenzi, itai kuti ndionezve.”
42 Djesu akamubvunza kuti: “Onazve; kutenda kako kakuporesa.”
43 Iyena wakatangazve kuona ciriporipoco, uye wakatanga kumuteera ecikudza Mwari. Uyewo, anhu ese paakazviona akakudza Mwari.
Masoko ari pasi
^ Kana kuti: “mu mugariro we zviro ucauya.” Onai pakazwi Kupanganidzwa ke Masoko.
^ Kana kuti: “zvicadzadzika.”
