Ruka 2:1-52
2 Mu mazuwa awona Sezari Agustu wakapasa mutemo kuti anhu ese* ataririswe mazina awo.
2 (Kutaririsa uku ke kutanga kakaitika pa nguwa yekuti Kirino wainga ari mutungamiriri we ku Siriya.)
3 Uye anhu ese akaenda kootaririswa, munhu umwe na umwe ku thaundi rake.
4 Zuzee wakabvawo ku Garireya, mu thaundi re Nazareta, woenda ku Djudhiya, ku thaundi ra Dhavhidhi rinozwi Bheterehema, ngokuti wainga ari nhengo yo mhuri ya Dhavhidhi.
5 Iyena wakaenda kootaririsa no mukadzi wake Mariya, wainga waadhuze kuda kubara.
6 Paainga ari kweneyo, yakaguma nguwa yekuti iyena abare.
7 Uye wakabara mwana wake we dangwe, akamuputiridza no djira uye akamuradzika mu mbuto inorhyira zvipfuyo, ngokuti mu nyumba yo kutambira arendo mainga musisina mbuto.
8 Mu mutanha iwona, mainga muno aushi aigara kunza ecicengeta zvipfuyo zvawo cousiku.
9 Ciriporipoco ngirozi ya Djehovha* yakauya pamberi pawo, pakaoneka ruvheneko paainga ari, recionesa rukudzo ra Djehovha,* uye awona akathya maningi.
10 Asi ngiroziyo yakati kaari: “Musathye, ngokuti ndauya koomuziisai masoko akanaka e mupfaro mukuru ucagara no anhu ese.
11 Ngokuti nyamasi mabarhwa muponesi mu thaundi ra Dhavhidhi, anozwi Kristu Tenzi.
12 Uye ici ndico cipangidzo camucaona: Mucaona mwana wakaputiridzwa no djira wakaradzikwa mu mbuto inorhyira zvipfuyo.”
13 Ciriporipoco, painga pano ngiroziyo pakaoneka ngirozi dzakawanda dze kudenga, dzecikudza Mwari dzeciti:
14 “Mwari ngaakudzwe kumusoro-soro, uye anhu aanopfarira* ari pa nyika ngaagare mu runyararo.”
15 Hino mumasure mekuti ngirozi dzaenda kudenga, aushi akatanga kubvunzana eciti: “Ngatiende ku Bheterehema koona zvaitika, zviya zvataziiswa na Djehovha.”*
16 Awona akaenda nokukasika uye akaona Mariya, Zuzee no mwana wakaradzikwa mu mbuto inorhyira zvipfuyo.
17 Paakaona izvi, akaabvunza zvaainga aziiswa zvinocokuita no mwanewo.
18 Uye paakazvizwa, ese akashamiswa maningi no zvakarekethwa no aushi,
19 asi Mariya wakatanga kucengeta masoko ese aya, ecinyasa kurangarira nge zvazvo mu mwoyo make.
20 Aushi akahwirira ecikudza uye ecisimba Mwari no zvese zvaainga azwa no kuona, maererano no zviya kamare zvaainga abvunzwa.
21 Mumasure me mazuwa 8, payakaguma nguwa yo kumuita ucekeri, akamupasa zina rokuti Djesu, zina raainga apaswa no ngirozi, mai ake asatoti abata pamwiri.
22 Uyewo, payakaguma nguwa yekuti aceneswe maererano no Mutemo wa Mozesi, akaenda naye pamberi pa Djehovha* ku Djerusarema,
23 hinga zvakatarhwa mu Mutemo wa Djehovha:* “Dangwe rese ro mwanarume rinodikana kudainzwa kuti mucena kuna Djehovha.”*
24 Uye akapa cibairo maererano no zvinobhuiwa no Mutemo wa Djehovha:* “Magora mairi kana zvinjiwa zviiri.”
25 Painga pano mwanarume umweni ku Djerusarema waizwi Simioni, mwanarumewo wainga ari munatsi uye wakatendeka, waiimira nyaradzo yo Israeri, uye mwiya mucena wainga uri paari.
26 Uyezve, iyena wainga aoneswa na Mwari peciseenzeswa mwiya mucena kuti iyena wainga asikazofi asati aona Kristu wa Djehovha.*
27 Hino ecitungamirirhwa no mwiya mucena, wakapinda mu tempro, uye abereki a Djesu paakapinda no mwanewo mu tempro kuti aite naye zvaaidikana kuita maererano no Mutemo,
28 iyena wakabata mwanewo mu nyara, wakakudza Mwari eciti:
29 “Zvino, Cangamire Tenzi, muri kusiya kuti muranda wenyu afe mu runyararo hinga zvamakareketa,
30 ngokuti madziso angu aona uya anozounzisa ruponeso
31 ramakagadzirira pamberi pe anhu ese,
32 ruvheneko rokubvisa naro ciro cakafukidza hope yo madzinza uye rukudzo re anhu enyu, Aisraeri.”
33 Uye baba na mai o mwanewo aishamiswa nge zviro zvaibhuiwa nge zvake.
34 Uyewo, Simioni wakaakomborera uye wakabvunza Mariya, mai e mwana kuti: “Izwa! Mwana uu watumwa kuti paoneke kumbwera no kumuka ke akawanda pakati pe Israeri, acagara cipangidzo cinorekethwa zvakashata nge zvaco
35 (asi iwewe, supada yakakura icakubaya),* kuti marangariro ari mu mwoyo me anhu akawanda abudiswe pamhene.”
36 Kainga kuno muphorofitakadzi umweni waizwi Ana, mwana wa Fanueri, we ku dzinza ra Azeri. Mwanakadziwo wainga wacembera kamare uye wakararama ke makore 7 basi no mwamuna wake kubvira paakawakwa,*
37 iyena wainga ari mufirhwakadzi we makore 84. Iyena wainga asikabudi pa tempro, eciita mabasa akacena usiku no masikati ecitsanya uye eciita minamato ye kudeketera.
38 Pa nguwa iyona, iyena wakakhwedera uye wakatanga kutenda Mwari uye kureketa ngezve mwanewo ku anhu ese aietsera kuponeswa ke Djerusarema.
39 Ngokudaro, paakapedza kuita zviro zvese maererano no Mutemo wa Djehovha,* akahwirira ku Garireya ku thaundi rawo re Nazareta.
40 Uye mwanewo akarumbwa ecikura akabamba uye no ungwaru wakakura, uye akarumbwa ecipfarirhwa na Mwari.
41 Makore ese abereki ake aienda ku Djerusarema ku mutambo we Paskwa.
42 Uye Djesu paainga ano makore 12, awona akaenda maererano no zvaaigara eciita pa mutambo uwona.
43 Mutambo pawakapera uye awona paakatanga kuita rhwendo ro kuhwirira, Djesu akasara mu Djerusarema, asi abereki ake aazi kuzviziya.
44 Awona airangarira kuti iyena ainga ari pakati pe anhu aaita nawo rhwendo, mumasure mekuita rhwendo ke zuwa rimwe awona akatanga kumupsvaka pakati pe anyaukama awo no anhu aaiziya.
45 Asi ngokuti aazi kumuona, akahwirira ku Djerusarema uye akanyasa kumupsvaka.
46 Mumasure me kumupsvaka ke mazuwa matatu, awona akamugumira mu tempro akagara pakati pe afundisi eciapurutana uye eciaita mibvunzo.
47 Ese aimuzwa aishamiswa no kuzwisisa kake uye no mhinduro dzake.
48 Abereki ake paakamuona, akashamiswa, uye mai ake akati kaari: “Mwanangu, watidaro ngei? Inini na baba ako tainga tecinetseka tecikupsvaka.”
49 Asi iyena akaadaira kuti: “Ngei maindipsvaka? Amuzvizii here kuti ndinodikana kugara mu nyumba ya Baba angu?”
50 Asi, awona aazi kuzwisisa zvaaiabvunza.
51 Hino iyena akahwirira nawo ku Nazareta, uye akarumbwa eciazwira. Uye, mai ake ainyasa kucengeta masoko ese aya mu mwoyo mawo.
52 Djesu aikura pa uzii uye pa mwiri wake, ecipfarirhwa na Mwari uye no anhu.
Masoko ari pasi
^ Kana kuti: “anhu ese e mu umambo wake.”
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Kana kuti: “anhu ano mwoyo wakanaka.”
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Kana kuti: “supada yakareba icabaya mwiya wako.”
^ Cigrego: “kubvira pa umhandwe wake.”
^ Onai pakazwi Kupanganidzwa ke Masoko.
