Ruka 21:1-38
21 Hino Djesu paakaringira midziyo ye kukandira mare, akaona apfumi ecikandemo zvipo zvawo.
2 Akaonawo mufirhwakadzi umweni murombo ecikanda mu mudziyo we kukandira mare zvimare zviiri zve mutengo wakadodoka,*
3 uye akati: “Zvirokwazvo ndinomubvunzai kuti: Mufirhwadzi uu murombo wakanda mu mudziyo we kukandira mare zvakawanda kupinda amweni ese.
4 Ngokuti ese akanda mare yainga yasara kuseenzesa pa upfumi wawo, asi mufirhwakadzi uu, pa urombo wake, wakanda zvese zvaainga anazvo zvaizomuraramisa.”
5 Pedzepo, anhu paainga ecireketa ngezve tempro, kuti iyona yainga yakarungamiswa kudini no mapuwe akanaka uye no zvipo zvainga zvapaswa kuna Mwari,
6 iyena akati: “Panocokuita no izvi zvamuri kuona, pacauya mazuwa ekuti apana buwe ricasara pa musoro pe buwe rimweni risikazi kuwiswa.”
7 Hino akamubvunzisa kuti: “Mufundisi, zviro izvi zvicanyasa kuitika rini, uye ngacipi cipangidzo cekuti zviro izvi zvaakuda kuitika?”
8 Iyena akati: “Ngwarirai kuti musapauswe, ngokuti akawanda acauya mu zina rangu eciti: ‘Ndini,’ uye acatiwo: ‘Nguwa yakhona yaapadhuze.’ Musaateere.
9 Uyezve, pamunozwa ngezve hondo uye ngezve mabongozozo, musapatike ndizvo. Ngokuti zviro izvi zvinodikana kutanga zvaitika, asi mugumo auzoitiki pa nguwa iyona kamare.”
10 Hino iyena akaabvunza kuti: “Dzinza ricarhwisa dzinza rimweni, uye umambo ucarhwisa umambo umweni.
11 Kucaoneka zvigidhi-gidhi zvakakura, uye ku mbuto dzakasiyana-siyana, kucaoneka nzara no nhenda; uye anhu acaona zviro zvinothyisa no zvipangidzo zvakakura zvecibva kudenga.
12 “Asi zvese izvi zvisati zvaitika, acamusungai no kumuteerai, acamuendesai mu masinagoga no mu makaraboso. Uye imwimwi mucaendeswa pamberi pe madzimambo uye anyautongi nge ndaa ye zina rangu.
13 Izvi zvicamupasai mukana we kupasa upupuri.
14 Hino, musagadzirire mu mwoyo menyu zvamucareketa kuti mudzidziirire,
15 ngokuti ndicamupasai masoko no ungwaru zvicaita kuti azondi enyu ese pamwepo akonerhwe kuaramba no kuaphikisa.
16 Kusiya izvona, imwimwi mucaendesweyo* kunyazi nge abereki, hama, anyaukama, shamwari, uye acauraisa anganani enyu,
17 uye mucazondwa no anhu ese nge ndaa ye zina rangu.
18 Asi kunyazi tsitsi rimwe haro re musoro menyu arizopsveteki.
19 Nge kushingirira kenyu, imwimwi mucaponesa upenyu wenyu.*
20 “Asi pamunoona Djerusarema ratenderedzwa no masurudado, ziyai kuti raapadhuze kuti ritsakatiswe.
21 Hino, aya anonga ari mu Djudhiya ngaatizire ku matunhu, anonga ari mukati maro ngaabudemo, uye aya anonga ari ku munda ngaasapinde mukati maro,
22 ngokuti mazuwa aya anonga ari mazuwa e kutonga ka Mwari no unatsi kuti zvese zvakatarhwa zvidzadzike.
23 Ane nyathwa anakadzi anonga ano pamwiri uye anonga ari kuamwisa mu mazuwa awona! Ngokuti kunozooneka kutambudzika kukuru mu nyika ii uye shungu dzinozouira anhu aya.
24 Awona acauraiwa no supada, oendeswa ku madzinza ese kuti aizwe aranda; uye Djerusarema ricatsikwa-tsikwa no madzinza amweni* dakara yadzadzika nguwa yakasisira ye madzinza amweni.*
25 “Uyewo, kucaoneka zvipangidzo pa zuwa, pa mwedzi, no pa nyeredzi. Pa nyika, anhu acarhwadziwa mwoyo nge kutama kuziya cekuita nge ndaa ye kutinhira no kuvhunduka ke bahari.
26 Anhu acapera simba nge kuthya uye nge kuetsera zviro zvinozouya pa nyika, ngokuti masimba e kudenga acazunguzwa.
27 Hino acaona Mwana we munhu eciuya mu makore e kudenga no simba uye rukudzo rikuru.
28 Asi kana zviro izvi zvikatanga kuitika, garai makaima uye mutsai musoro, ngokuti ruponeso renyu riri kukhwedera.”
29 Hino akaaitira muezaniso eciti: “Ringirai muonde no miti dzimweni dzese.
30 Idzona padzinonga dzecipfipfitira, imwimwi munoona uye munoziya kuti marimo aapadhuze.
31 Nge mushobo umwewo, pamunoona zviro izvi zveciitika, ziyai kuti Umambo wa Mwari waapadhuze.
32 Ndinomubvunzai zvirokwazvo kuti mubarirhwana uu auzoperi zviro zvese izvi zvisati zvaitika.
33 Denga no nyika zvicapera, asi masoko angu aazoperi.
34 “Asi ngwarirai kuti mwoyo yenyu isamboremerhwe nge ndaa ye kurhyisa, kumwisa no kudzirhya mwoyo nge ndaa yo zvinetso zve upenyu, kuti musagumirhwe no zuwa irona zvecibvumbu
35 hingana murau. Ngokuti zuwa iri ricauira anogara pa nyika.
36 Hino rumbwai makamuka, uye rumbwai meciita minamato ye kudeketera kuti mukwanise kupukunyuka pa zvese izvi zvinodikana kuitika uye mukwanise kuima pamberi pe Mwana we munhu.”
37 Comasikati iyena aifundisa mu tempro, asi cousiku iyena aienda ku dunhu rinozwi Dunhu re Miorivhi.
38 Uye anhu ese aienda comacibesi-besi mu tempro kuti afundiswe na Djesu.
Masoko ari pasi
^ Cigrego: “marepitoni mairi.”
^ Kana kuti: “mucatengeswa.”
^ Kana kuti: “mucaponesa mwiya wenyu.”
^ Kana kuti: “anhu asiripi Adjudha.”
^ Kana kuti: “anhu asiripi Adjudha.”
