Akatarhwa na Ruka 23:1-56
23 Ngokudaro, anhu ese akamuka, uye akamutora oenda naye kuna Pirato.
2 Hino akatanga kumupumha eciti: “Takagumira mwanarume uu ecipausa anhu edu, uye ecibhuya kuti anhu aadikani kuripa musoho kuna Sezari, uye ecibhuya kuti iyena ndi Kristu, mambo.”
3 Hino Pirato wakamubvunzisa kuti: “Ndiwe Mambo we Adjudha? Djesu akamudaira kuti: “Ndimwi muri kuzvibhuya.”
4 Ngokudaro, Pirato wakabvunza atungamiriri e apristi no anhu kuti: “Andiripi kuona ndaa ino mwanarume uu.”
5 Asi awona akarumbwa eciti: “Kufundisa kaari kuita anhu mu Garireya mwese, kubvira ku Djudhiya dakara kuno, zviri kuita kuti anhu asazwire mutemo.”
6 Paakazwa izvi, Pirato wakada kuziya kuti Djesu ngewe ku Garireya here.
7 Paakaona kuti iyena aibva ku mutanha waitongwa na Herodhi, wakamutumira kuna Herodhi, ngokuti Herodhi wainga ari mu Djerusarema mu mazuwa awona.
8 Herodhi paakaona Djesu, wakapfara maningi. Iyena wainga aano nguwa yakareba ecida kumuona, ngokuti wainga wazwa zvakawanda nge zvake, uye waida kumuona eciita cishamiso.
9 Hino iyena wakatanga kumuita mibvunzo dzakawanda, asi Djesu aazi kumudaira ciro.
10 Asi atungamiriri e apristi no atari akamuka uye akatanga kumupumha no simba.
11 Hino Herodhi pamwepo no masurudado ake, akamubata zvisikazi kunaka, uye akamushora nge kumusimidza djira rakanaka uye pedzepo akamuhwirinza kuna Pirato.
12 Pa zuwa irona kamare, Herodhi na Pirato, awo ekuti aizondana, akagara shamwari no shamwari.
13 Hino Pirato wakaunganidza atungamiriri e apristi, akuru-akuru, no anhu
14 uye akaabvunza kuti: “Imwimwi mandiunzisira mwanarume uu hinga munhu ari kuita kuti anhu apanduke. Inini ndamubvunzisa pamberi penyu, asi andizi kuona kuti iyena ano ndaa pa zviya zvamuri kumupumha.
15 Zvezvirokwazvo, kunyazi Herodhi aazi kuona ndaa ino mwanarume uu, ndiyo ndaa iyena wamuhwirinza katiri, hinga zvamuri kuona iyena aazi kuita ciro cinosisira kuti auraiwe.
16 Ngokudaro, inini ndicaita kuti apondwe uye pedzepo ndicamusiya kuti aende.”
17 * ——
18 Asi anhu ese akakhuwa eciti: “Urayai mwanarume uu,* uye sudzunurai Bharabhaa!”
19 (Bharabhaa wainga wakandwa mu kadheya nge ndaa yekuti iyena wainga abetsera anhu mu thaundi kuti apandukire anyautongi uye wainga wauraya munhu.)
20 Pirato wakareketazve nawo, ngokuti waida kusudzunura Djesu.
21 Asi awona akatanga kukhuwa eciti: “Ngaakhomerhwe pa mutanda! Ngaakhomerhwe pa mutanda!”
22 Iyena wakaabvunzazve kecitatu eciti: “Ngei? Munhu uu washaishei? Andizi kuona cakashata caaita cinosisira kuti auraiwe; ndicaita kuti apondwe uye ndicamusiya kuti aende.”
23 Ngokudaro, awona akarumbwa ecikhuwa, ecikumbira kuti Djesu auraiwe,* uye izwi rawo ndiro rainyanya kuzika.
24 Ndiyo ndaa, Pirato wakaita cisananguro ce kuita zvaaikumbira.
25 Iyena wakasudzunura mwanarume uya waaikumbira kuti asudzunurhwe, uya wainga wakandwa mu kadheya nge ndaa ye kubetsera anhu kuti apadukire anyautongi uye kuuraya munhu, asi akaapasa Djesu maererano no zvaaikumbira.
26 Paainga ecienda naye, akabata mwanarume umweni waibva ku munda, waizwi Simoni we ku Sirene uye akamuthwarisa mutanda* kuti ateere Djesu akauthwara.
27 Anhu akawanda aimuteera, kutobatanidzawo anakadzi aidziponda pa diti ngo kurhwadziwa uye aicema.
28 Djesu akatendeukira anakadziwo uye akati: “Ana e Djerusarema, musandiceme. Pane kudaro, cemai nge ndaa yenyu uye ana enyu;
29 ngokuti ziyai kuti acaguma mazuwa ekuti anhu acabhuya kuti: ‘Anopfara anakadzi asikabari, ndani dzisikazi kubara uye mazamu asikazi kuamwisa!’
30 Hino acatanga kubvunza matunhu kuti: ‘Timbwererei!’ Uye acabvunzawo zvimatunhu kuti: ‘Tifukidzei!’
31 Kana awona eciita izvi muti usati waoma, acaitei kana ukaoma?”
32 Mbavha mbiri dzainga dzecitorhwawo kuti dziende kookhomerhwa pamwepo naye.
33 Uye paakaguma ku mbuto yaizwi Dehenya, akamukhomera pakati pe mbavha dziya, imwe ku moko wake kwawo, uye imweni ku moko wake boshwe.
34 Asi Djesu aiti: “Baba, arekererei, ngokuti awona aazvizii zvaari kuita.” Uye awona aikhandira mudjenya kuti akoanisane macira ake.
35 Uye anhu akaima ecimuringira. Asi akuru-akuru aimuseka eciti: “Akaponesa amweni; hino ngaadziponesewo kana iyena ari Kristu, Wakasanangurhwa na Mwari.”
36 Kunyazi masurudado akamusekawo, awona akamukhwederera uye akamupasa vhinyu inojaja
37 uye aiti: “Kana iwewe uri Mambo we Adjudha, dziponese.”
38 Uye pamusoro pake painga pano citabwa cakakhomerhwa cakatarhwa masoko okuti: “Uu ndiye Mambo we Adjudha.”
39 Mbavha imwe yainga yakakhomerhwa pamwepo naye yakatanga kumutuka, yeciti: “Andiwepi Kristu here? Dziponese uye tiponesewo!”
40 Mbavha imweni yakamusumurura, yeciti: “Iwewe authyi Mwari kani, sezvo iwewe watambira mutongo umwewo?
41 Katiri isusu zvakatosisira, ngokuti tiri kutambudzika nge ndaa ye zviya zvataita; asi mwanarume uu aana cakashata caaita.”
42 Hino iyena wakati: “Djesu, ndiedzurireiwo kana maa mu Umambo wenyu.”
43 Hino Djesu akati: “Zvezvirokwazvo ndinokubvunza nyamasi kuti: Ucagara na inini mu Paraizo.”
44 Padzaikhwedera kuita 12 dze masikati,* pakaitika cidima cakafukidza pasi rese dakara 15 dze masikati,*
45 ngokuti ciedza ce zuwa cakadzima. Uye djira re mbuto yakacena rakamweka pakati no pakati.
46 Djesu akakhuwa no izwi guru uye akati: “Baba, ndiri kusiya upenyu* wangu mu nyara dzenyu.” Mumasure me kubhuya izvi, iyena akafa.*
47 Mutungamiriri we masurudado paakaona zvainga zveciitika, iyena wakatanga kukudza Mwari eciti: “Zvezvirokwazvo, mwanarume uu wainga ari munatsi.”
48 Anhu ese ainga akaungana ipona paakaona zvainga zveciitika, akahwirira kumba ecidziponda pa diti.
49 Anhu ese aimuziya ainga akaima nge cekure. Uye anakadzi ainga auya naye kubva ku Garireya ainga aripoo uye akaona zvese izvi.
50 Kainga kuno mwanarume umweni waizwi Zuzee, nhengo ye Dare, iyena wainga ari mwanarume wakanaka uye munatsi.
51 (Mwanarume uu wainga asikazi kutsigirana nawo pa zviya zvaakapangana uye zvaakazoita.) Iyena wainga ari we ku Arimateya, thaundi re Djudhiya, uye waietserawo Umambo wa Mwari.
52 Iyena wakaenda kuna Pirato uye wakakumbira mutumbi wa Djesu.
53 Hino iyena wakatora mutumbiwo, wouputiridza no djira ro mutengo wakakura, uye wakaukanda mu guwa* rainga rakacerhwa pa buwe, rokuti rainga risati rakambokotserhwa munhu.
54 Rainga riri zuwa ro kugadzirira, uye Sabudu rainga raakuda kutanga.
55 Asi anakadzi ainga abva naye ku Garireya akaendawo ikona, akaonawo guwero* no mushobo waainga akotsa mutumbi wake,
56 uye akahwirira kuti agadzirire zviro zvinonuhwirira no mafuta anonuhwirira. Hinga zvaaigara eciita, akazorora mu Sabudu maererano no mutemo.
Masoko ari pasi
^ Onai Apendi. A3.
^ Cigrego: “Bvisai mwanarume uu pano.”
^ Kana kuti: “auraiwe pa mutanda.”
^ Kana kuti: “mutanda we kutambudzikira.” Onai pakazwi Kupanganidzwa ke Masoko.
^ Cigrego: “nguwa yocitanhatu.”
^ Cigrego: “nguwa yocipfembamwe.”
^ Kana kuti: “mwiya.”
^ Kana kuti: “akafema kekupedzesera.”
^ Kana kuti: “guwa re anoedzurirhwa.”
^ Kana kuti: “guwa re anoedzurirhwa.”
