Akatarhwa na Ruka 24:1-53
24 Pa zuwa rokutanga re sumana, anakadzi aya akaenda ku guwa* comacibesi-besi, awona ainga ano zvinonuhwirira zvaainga agadzirira.
2 Asi akaona kuti buwe rainga rakafunga pa guwa* rainga ramburumbudzwa,
3 uye paakapindemo, aazi kugumira mutumbi wa Tenzi Djesu.
4 Paainga ecishamiswa nazvo, anarume airi akapfeka macira ainyetukira akaguma padhuze pawo.
5 Anakadzi aya akathya uye akarumbwa akasikisira; hino anarume aya akati: “Ngei muri kupsvaka pakati pe akafa uya ari mupenyu?
6 Iyena aaripi pano, asi amutswa. Edzurirai kuti paainga aciri ku Garireya, iyena aimubvunzai kuti
7 Mwana we munhu anodikana kukandwa mu nyara dze ashaishi, ouraiwa pa mutanda uye ozomutswa pa zuwa rocitatu.”
8 Uye awona akaedzurira masoko ake;
9 hino awona akahwirira kubva ku guwa,* opanganidza zviro zvese izvi ku afundi 11 uye ku amweni ese.
10 Anakadziwo ainga ari Mariya Madharena, Juana, uye Mariya mai a Tiyago. Uyewo, anakadzi amweni aainga anawo akapanganidzawo zviro izvi ku aphostori.
11 Asi masoko aya aiita hingana kuti asina musoro ku aphostori, uye awona airamba kutendera zvairekethwa no anakadzi aya.
12 Asi Pedru wakamuka, wogogoma ecienda ku guwa,* uye wakapinda woringira, asi wakaona macira basi. Ngokudaro, iyena wakahwirira ecidzibvunzisa kuti zvinyi zvainga zvaitika.
13 Asi zvakaitika nge zvekuti mu zuwa irona kamare, airi awo aiita rhwendo ecienda ku mutanha umweni unozwi Emausi, painga pano mukuwo ungakwana makirometro 11* kubva ku Djerusarema,
14 uye ainga ecicedza ngezve zviro zvese zvainga zvaitika.
15 Paainga ecireketa uye ecicedzesana ngezve zviro izvi, Djesu akakhwedera kaari uye akatanga kuhamba nawo,
16 asi madziso awo aazi kukwanisa kumuziya.
17 Iyena akaabvunzisa kuti: “Muri kuhamba mecicedza ngezvei?” Awona akaima, omuringira akatsukwara.
18 Umwe wawo waizwi Kreopa wakamudaira kuti: “Kodi iwewe uri we nyika imweni here unogara wega mu Djerusarema uye auzvizii zviro zvese zvakaitika imona mu mazuwa adarika?”
19 Iyena akaabvunzisa kuti: “Zviro zvipi?” Awona akadaira kuti: “Zviro zvinocokuita na Djesu we ku Nazareta, uwo ainga ari muphorofita ano simba pa zviito uye pa masoko ake pamberi pa Mwari no anhu ese;
20 atungamiriri e apristi no akuru-akuru edu akaita kuti iyena atongerhwe rufu, uye akamukhomera pa mutanda.
21 Asi isusu taietsera kuti munhu uu ndiye waizonunura Israeri. Kusiya izvona, iri raa zuwa rocitatu kubvira pakaitika zvese izvi.
22 Uyezve, anakadzi amweni pakati pedu akatishamisa, ngokuti akafumira kuenda ku guwa*
23 uye paakatama kugumira mutumbi wake, awona akahwirira ecibhuya kuti aona cishamiso ce ngirozi uye idzona dzakabhuya kuti iyena ari mupenyu.
24 Hino anganani ainga ari pakati pedu akaendawo ku guwa,* akagumira zvese hinga zvainga zvabhuiwa no anakadziwo, asi aazi kuona Djesu.”
25 Ngokudaro, iyena akaabvunza kuti: “Zvezvirokwazvo imwimwi muri anhu asikazwisisi uye munononoka kutenda zviro zvese zvakabhuiwa no aphorofita!
26 Zvainga zvisikadikani kuti Kristu abatane no matambudziko aya uye apinde mu rukudzo rake?”
27 Ecitanga no zvainga zvakatarhwa na Mozesi uye Aphorofita, akaapanganidzira zviro zvainga zvinocokuita naye zviri mu Matarhwa ese.
28 Akazoguma dhuze no mutanha waaienda, uye Djesu akaita hinga ari kupindirira ecienda kure.
29 Asi awona akarumbwa ecimubvunza kuti agare nawo eciti: “Gara na isusu, ngokuti zuwa riri kudoka uye mbai-mbai pano kunza kucasvipa.” Ngokudaro, iyena akapinda uye akagara nawo.
30 Paainga ecirhya nawo,* akatora pau, oita munamato,* oigura-gura, uye oapasa.
31 Ngokudaro, awona akazonyasa kuona kuti iyena ndiani; asi Djesu akangara-ngara pakati pawo.
32 Uye akabvunzana kuti: “Tainga tisikazwi kupsva here mu mwoyo medu paaibhuya na isusu mu gwanza ecitidjekesera* zvakanaka Matarhwa?”
33 Hino awona akamuka pa nguwa iyona kamare ohwirira ku Djerusarema, uye akagumira afundi 11 no amweni ainga akaungana nawo,
34 awona aibhuya kuti: “Zvezvirokwazvo Tenzi amutswa, uye adzipangidza kuna Simoni!”
35 Hino akaapanganidzira zvainga zvaitika mu gwanza uye mushobo waakamuziya paakagura pau.
36 Paainga ecireketa zviro izvi, Djesu akaguma pakati pawo uye akabhuya kuti: “Runyararo ngarigare na imwimwi.”
37 Asi ngokuti awona aithya no kushamiswa, akarangarira kuti ainga eciona cisikwa co ku mwiya.
38 Hino iyena akaabvunza kuti: “Ngei muri kunetseka, uye ngei mwoyo yenyu isina cokwadi no zvamuri kuona?
39 Onai nyara dzangu no tsoka dzangu, kuti ndini kamare; ndibatei kuti muone, ngokuti mwiya auna nyama kana makodo hinga zvamuri kuona kuti ndinazvo.”
40 Uye paaibhuya izvi, akaapangidza nyara no tsoka dzake.
41 Asi awona ainga asikatendi nge ndaa ye kupfara uye kushamisika. Hino iyena akaabvunzisa kuti: “Muno ciro cokurhya here pano?”
42 Ngokudaro, awona akamupasa dimbu re howe yokukocwa,
43 iyena akaitambira uye akatanga kuirhya pamberi pawo.
44 Hino iyena akaabvunza kuti: “Aya ndiwo masoko angu andakamubvunzai pandainga ndicinemwi, kuti zviro zvese zvakatarhwa nge zvangu mu Mutemo wa Mozesi no Aphorofita uye mu Mapisarema zvinodikana kudzadzika.”
45 Hino iyena akafungura ndangariro dzawo kuti azwisise kuti Matarhwa anoreyei,
46 uye akaabvunza kuti: “Zvakatarhwa kuti Kristu aizotambudzika uye pa zuwa rocitatu aizomutswa kubva ku akafa,
47 uye kuti kutangira ku Djerusarema, zina rake raizoseenzeswa pa kuparidzira kuti anhu e madzinza ese acinyuke pa zvitema zvawo uye arekererhwe.
48 Imwimwi mucagara apupuri e zviro izvi.
49 Uye ziyai kuti ndicamutumirai zvakagondeswa na Baba angu. Asi imwimwi munodikana kurumbwa muri mu thaundi dakara matambira simba rinobva kudenga.”
50 Hino iyena akaenda nawo kunza dakara ku Bhetanya, akamutsa nyara dzake oakomborera.
51 Paainga eciaitira munamato kuti akomborerhwe, iyena akaparadzaniswa nawo, otorhwa oenda kudenga.
52 Awona akamuhwararira uye akahwirira ku Djerusarema ecipfara maningi.
53 Awona aigara mu tempro mazuwa ese, ecikudza Mwari.
Masoko ari pasi
^ Kana kuti: “guwa re anoedzurirhwa.”
^ Kana kuti: “guwa re anoedzurirhwa.”
^ Kana kuti: “guwa re anoedzurirhwa.”
^ Kana kuti: “guwa re anoedzurirhwa.”
^ Cigrego: “maestadhiyo 60.” Estadhiyo imwe yaikwana mametro 185. Onai Apendi. B14.
^ Kana kuti: “guwa re anoedzurirhwa.”
^ Kana kuti: “guwa re anoedzurirhwa.”
^ Kana kuti: “ari pa meza.”
^ Kana kuti: “oikomborera.”
^ Kana kuti: “ecitipanganidzira.”
