Akatarhwa na Ruka 5:1-39
5 Pa zuwa rimweni iyena ainga ari pa muceto pe dhamu re Genezareti* uye anhu aimutenderedza ecitsikirirana kuti azwe soko ra Mwari.
2 Iyena akaona mabharko mairi akaimiswa pa muceto pe dhamu, asi abati e howe ainga acita uye ainga ecicenesa maricera awo.
3 Djesu akakwira mu rimwe rawo, ra Simoni, omukumbira kuti ariendese kure padoko no kuno anhu. Pedzepo iyena akagara pasi, otanga kufundisa anhu.
4 Paakapedza kureketa, akati kuna Simoni: “Endai pakadzika, mukhandire maricera enyu kuti mubate howe.”
5 Simoni wakamudaira kuti: “Mufundisi, taseenza no simba usiku wese uye apana catabata, asi ngokuti imwimwi makumbira, ndicakhandira maricera.”
6 Ngokudaro, paakazviita akabata howe dzakawandisisa zvokuti maricera awo akatanga kumweka.
7 Hino akamutsa nyara ecidainza amweni awo ainga ari mu bharko rimweni kuti auye kooabetsera, uye awona akauya odzadza mabharko ese mairi uye awona akatanga kundondomera.
8 Paakaona izvi, Simoni Pedru wakagodama pamberi pa Djesu uye wakati: “Tenzi, garai kure na inini, ngokuti ndiri mushaishi.”
9 Ngokuti iyena pamwepo no aya aainga anawo akashamiswa maningi nge ndaa yo kuwanda ke howe dzaainga abata,
10 uye zvimwezvo zvakaitikawo na Tiyago uye Juau, ana a Zebhedheu, aiseenza na Simoni. Asi Djesu akati kuna Simoni: “Usathye. Ngokuti kubvira zvino kuenda mberi, iwewe ucagara mubati we anhu hinga mabatire aunoita howe.”
11 Ngokudaro, awona akabvisa mabharko mu mvura, akasiya zvese uye akamuteera.
12 Pa zuwa rimweni Djesu paainga ari mu thaundi rimweni, pakaguma mwanarume umweni wakadzara no mapere! Mwanarumewo paakaona Djesu, wakahwarara uye wakamudeketerera eciti: “Tenzi, kana mecida, mungandiporesa.”
13 Djesu akatambanudza nyara yake, omubata oti: “Ndinoda! Mapere ako ngaapere.” Ciriporipoco mapere ake akapera.
14 Hino iyena akamubvunza kuti asabvunze munhu nge zvazvo uye akatunhudzira eciti: “Asi enda koodzipangidza ku mupristi, wopasa cipo cakarekethwa no mutemo wa Mozesi, kuti aone kuti waporeswadi.”
15 Asi masoko akaringana naye airumbwa ecibararika, uye anhu akawanda aiungana kuti amupurutane uye kuti aporeswe nhenda dzawo.
16 Asi kakawanda iyena aienda kake ega kooita munamato.
17 Pa zuwa rimweni iyena paainga ecifundisa, Afarisi no afundisi e Mutemo akabva ku mitanha yese yo Garireya, yo Djudhiya, no yo Djerusarema ainga akagara ipona; uye simba ra Djehovha* rainga riri pana Djesu reciita kuti aporese anhu.
18 Pakaguma anarume amweni ainga akathwara mwanarume wakaoma mwiri ari pa makha, uye awona aiedza kupinda naye mukati kuti amukande pamberi pa Djesu.
19 Hino ngokuti akakonerhwa kuendesa mwanarumewo pana Djesu nge ndaa ye kuwanda ke anhu, awona akakwira padenga pe nyumba, akafungura dengero, uye akacitisa mwanarumewo wakaradzikwa pa makha pakati pe anhu, paya kamare painga pana Djesu.
20 Paakaona kutenda kaainga anako, iyena akati: “Shamwari, zvishaishi zvako zvarekererhwa.”
21 Hino atari no Afarisi akatanga kurangarira kuti: “Ndiani uu ari kutuka Mwari? Ndiani angarekerera zvitema kunza ka Mwari basi?”
22 Asi Djesu eciziya zvaairangarira, akaadaira eciti: “Ngei muri kurangarira zvakadaro mu mwoyo menyu?
23 Cinyi ciri nyore kureketa: ‘Zvishaishi zvako zvarekererhwa,’ kana kuti: ‘Purumuka uhambe’?
24 Asi kuti muziye kuti Mwana we munhu ano simba re kurekerera zvishaishi pa nyika . . . ,” akabvunza mwanarume wainga wakaoma mwiri kuti: “Ndinokubvunza kuti: Muka, tora makha wako uende kumba.”
25 Ngokudaro, iyena wakamuka pakati pawo, wakatora ciya caaiwatira, uye wakaenda kumba, ecikudza Mwari.
26 Hino ese akashamiswa maningi, awona akatanga kukudza Mwari uye ecishamiswa kudaro, aiti: “Nyamasi taona zviro zvinoshamisa!”
27 Paakabva ipona, Djesu akaona murongosi we musoho waizwi Revhi wakagara pa mbuto yo kuripa musoho, uye akati kaari: “Gara muteeri wangu.”
28 Revhi wakasiya zviro zvese, wakamuka uye wakatanga kumuteera.
29 Revhi wakamuitira mabiko kuti amutambire pa nyumba pake, uye painga pano arongosi e musoho akawanda no amweniwo aairhya nawo.
30 Ngokudaro, Afarisi no atari awo akatanga kugurunguta, eciti ku afundi ake: “Ngei imwimwi munorhya no kumwa no arongosi e musoho uye no ashaishi?”
31 Djesu akaadaira kuti: “Anhu akatamba aadi murapi, asi aya ari kurhwara.
32 Inini andizi kuuya koodainza anatsi kuti acinyuke, asi ashaishi.”
33 Awona akamubvunza kuti: “Afundi a Juau anotsanya nguwa dzese, eciita minamato ye kudeketera, uye afundi e Afarisi anoitawo zvimwezvo, asi afundi ako anorhya no kumwa.”
34 Djesu akaabvunza kuti: “Imwimwi mungakwanisadi kuita kuti shamwari dze mwanarume uri kucata dzitsanye nepoo mwanarumewo ari pamwepo nawo?
35 Asi pacaguma zuwa rokuti mwanarumewo acabviswa pakati pawo; hino mu mazuwa awona, awona acatsanya.”
36 Akaabvunzawo muezaniso umweni eciti: “Apana munhu anosonera cigamba cipsva pa djira rakatsakara. Kana akaita kudaro, cigamba cipsva cicamwesa djira rakatsakara uye cigamba cipsva acizopindirani no djira rakatsakara.
37 Uyezve, apana munhu anokanda vhinyu ipsva mu zvigubu zve matehwe zvakatsakara. Kana akadaro, vhinyu ipsva icaphathura zvigubu zve matehwe yopsveteka uye zvigubu zve matehwe zvicatsakatika.
38 Asi vhinyu ipsva inodikana kukandwa mu zvigubu zve matehwe zvipsva.
39 Munhu anomwa vhinyu yo kare aazodi vhinyu ipsva, ngokuti anoti: ‘Yo kare yakanaka.’”
