Ruka 6:1-49
-
Djesu ndi “Tenzi we Sabudu” (1-5)
-
Mwanarume wakaoma nyara anoporeswa (6-11)
-
Aphostori 12 (12-16)
-
Djesu anofundisa uye anoporesa (17-19)
-
Mupfaro uye nyathwa (20-26)
-
Kuda azondi (27-36)
-
Imai kutonga (37-42)
-
Kuziikanwa nge micero yawo (43-45)
-
Nyumba yakawakwa zvakanaka; nyumba isina fundasau yakabamba (46-49)
6 Ngo mu sabudu iyena aipinda no muminda ye trigu, afundi ake akatanga kuipurura, eciipikita uye eciirhya.
2 Afarisi paakazviona akati: “Ngei muri kuita zvisikadikani kuizwa pa zuwa re Sabudu?”
3 Asi Djesu akaadaira kuti: “Amuzi kuerenga here zvakaizwa na Dhavhidhi no anhu ake paakazwa nzara?
4 Mushobo waakapinda mu nyumba ya Mwari, wopaswa pau dzaiizwa mupiro, odzirhya pamwepo no anhu ake, kunyazi dzisikatenderhwi kurhyiwa no munhu upi hake asi no apristi basi?”
5 Uye akatunhudzira eciti: “Mwana we munhu ndiye Tenzi we Sabudu.”
6 Mu sabudu rimweni, iyena akapinda mu sinagoga uye akatanga kufundisa. Imona mainga muno mwanarume umweni wainga wakaremara nyara* yo moko kwawo.
7 Atari no Afarisi ainyasa kuringira Djesu kuitira kuti aone kuti iyena aizoporesa munhu here mu Sabudu, kuti agare no cikonzero ce kumupumha.
8 Asi iyena aizviziya zvaairangarira, hino akati ku mwanarume wakaremara nyara:* “Muka uime pakati apa.” Iyena wakamuka uye wakaima.
9 Hino Djesu akaabvunza kuti: “Ndinomubvunzisai kuti: Zvinotenderhwa here kuita zviro zvakanaka kana zvakashata, kuponesa kana kuuraya mu Sabudu?”
10 Mumasure me kuringira anhu ese ainga aripo, iyena akabvunza mwanarumewo kuti: “Tambanudza nyara yako.” Iyena wakaitambanudza, uye iyona yakatamba.
11 Asi awona akanyangadzwa uye akatanga kupangana kuti aizoitei na Djesu.
12 Zuwa rimweni iyena akaenda ku dunhu kuti aite munamato, uye akapedza usiku wese eciita munamato kuna Mwari.
13 Pakainga kaedza, iyena akadainza afundi ake uye akasanangura 12 pakati pawo, aakazodainza kuti aphostori:
14 Simoni, waakazopasa zina rokuti Pedru, no hama yake yaizwi Andreya, Tiyago, Juau, Firipi, Bhartoromeu,
15 Mateu, Tomaji, Tiyago mwana wa Arfeu, Simoni anodainzwa kuti “anoshingaira,”
16 Djudhasi mwana wa Tiyago, uye Djudhasi Iskariyoti, wakazogara mupanduki.
17 Iyena akateredza nawo uye oima pa mbuto yakati cecete, painga pano afundi akawanda, no anhu akawanda e ku Djudhiya, e ku Djerusarema, e kumuceto ke Tiro no Sidhoni, ainga auya kuti amupurutane uye aporeswe pa nhenda dzawo.
18 Kunyazi anhu ainetseka no mwiya yakashata aiporeswa.
19 Anhu ese aiedza kumupsvasa, ngokuti simba raibuda maari uye raiporesa ese.
20 Iyena akaringira afundi ake uye akati:
“Munopfara imwimwi arombo, ngokuti Umambo wa Mwari nge wenyu.
21 “Munopfara imwimwi muno nzara zvino, ngokuti mucagutiswa.
“Munopfara imwimwi muri kucema zvino, ngokuti mucaseka.
22 “Munopfara imwimwi pese pamunozondwa ne anhu, pamunorambwa, pamunotukwa uye pamunoshorhwa zina renyu eciti muri anhu akashata nge ndaa ye Mwana we munhu.
23 Pfarai kana izvi zvikaitika uye nyasai kupfara, ngokuti mubairo wenyu mukuru kudenga, zviro izvi zvaiizirhwawo aphorofita ngo madzitsekuru awo.
24 “Mune nyathwa imwimwi apfumi, ngokuti matotambira kare kugarika kenyu.
25 “Mune nyathwa imwimwi makaguta zvino, ngokuti mucagara no nzara.
“Mune nyathwa imwimwi muri kuseka zvino, ngokuti mucatsumba uye mucacema.
26 “Mune nyathwa imwimwi pese pamunorekethwa zvakanaka, ngokuti ndizvo zvaiizwa no madzitsekuru awo ku aphorofita e kunyepa.
27 “Asi kamuri muri kupurutana ndinomubvunzai kuti: Rumbwai mecida azondi enyu, rumbwai meciitira zvakanaka aya anomuzondai,
28 mecikumbira Mwari kuti akomborere aya anomureketai zvakashata uye meciitira munamato aya anomutukai.
29 Munhu akamupondai dama rimwe, mupaseiwo rimweni; uya anomutorerai djira rimwe, mupaseiwo rimweni ramakasimira.
30 Pasai wese uya anomukumbirai, uye kana munhu akamutorerai ciro, musamukumbire kuti acihwirinze.
31 “Uyewo, zvese zvamunoda kuti anhu amuitirei, aitireiwo zvimwezvo.
32 “Kana mukada basi aya anomudai, zvinosenzei kamuri? Kunyazi ashaishi anodawo aya anoada.
33 Kana mukaitira zvakanaka aya basi anomuitirai zvakanaka, zvinosenzei kamuri? Kunyazi ashaishi anoitawo zvimwezvo.
34 Uye, kana mukafiarisi* aya basi amunoetsera kuti amuhwirinzirei, zvinosenzei kamuri? Kunyazi ashaishi anofiarisiwo ashaishi amweni ecietsera kuhwirinzirhwa zvaafiarisi.
35 Asi rumbwai mecida azondi enyu, meciaitira zvakanaka uye mecifiarisi musikakariri kuhwirinzirhwa; mubairo wenyu ucagara mukuru, uye mucagara ana e Wekumusoro-soro, ngokuti anopangidza unaki ku aya asikatendi zvaanoizirhwa, uye ku aya akashata.
36 Rumbwai mecipangidza usisi, hinga Baba enyu ano usisi.
37 “Uyezve, imai kutonga, uye amuzotongwiwo; imai kushora, uye amuzoshorhwiwo. Rumbwai mecirekerera, uye mucarekererhwawo.
38 Garai mecipasa amweni, uye mucapaswawo. Acadurura mu djira renyu mupimo wakanaka, wakatsindirhwa, wakagugudzwa, uye unopsvetekera. Ngokuti mupimo wamunopimira nawo amweni, ndiwo wamucapimirhwawo nawo.”
39 Iyena akaaitira muezaniso eciti: “Pane bofu ringatungamirira bofu rimweni here? Awona ari airi aazombwereri mu rindi here?
40 Mufundi aaripi pamusoro pe mufundisi wake, asi wese uya anonyasa kufundiswa acaezana no mufundisi wake.
41 Hino, ngei weciona cimuti ciri mu dziso re hama yako usikaoni mutanda uri mu dziso rako?
42 Hino ungabvunza kudini hama yako kuti: ‘Hama yangu, ndisiye ndibvise cimuti ciri mu dziso rako,’ nepoo iwewe une mutanda mu dziso rako? Mucengedzi! Tanga wabvisa mutanda uri mu dziso rako, uye ucanyasa kuona mabvisire aungaita cimuti ciri mu dziso re hama yako.
43 “Ngokuti apana muti wakanaka unobara micero yakashata,* uye apana muti wakashata* unobara micero yakanaka.
44 Ngokuti muti wese unoziikanwa no mucero wawo. Ngo muezaniso, apana munhu anokhaya maonde pa minzwa uye apana munhu anokhaya uvha pa pfiba re minzwa.
45 Munhu akanaka anobvisa zvakanaka mu upfumi wakanaka we mwoyo wake, asi munhu wakashata anobvisa zvakashata mu upfumi wake; ngokuti muromo wake unobhuya zvakadzara mu mwoyo.
46 “Hino, ngei imwimwi munondidainza kuti: ‘Tenzi! Tenzi! asi amuiti zvandinobhuya?
47 Wese uya anouya kandiri, ozwa masoko angu, oaseenzesa, ndicamupangidzai kuti akaezana nani:
48 Iyena wakaita hingana munhu wekuti paaiwaka nyumba yake wakanyasa kucera uye wakakanda fundasau yake pa buwe. Hino, mvura payakauya, murambo wakaponda no simba nyumbeyo asi uwona auzi kukwanisa kuizungunusa, ngokuti yainga yakanyasa kuwakwa.
49 Nge dii rimweni, uya anozwa otama kuita ciro, akaezana no munhu anowaka nyumba yake pa mataka asikazi kucera fundasau. Murambo wakauya woponda nyumbeyo, uye iyona yakaondomoka nokukasika, yotsakatika yese.”
Masoko ari pasi
^ Kana kuti: “wakaoma nyara.”
^ Kana kuti: “wakaoma nyara.”
^ Kufiarisi uku ndi kufiarisi pasina juru.
^ Kana kuti: “yakaora.”
^ Kana kuti: “wakaora.”
