Kuna Tito 1:1-16
1 Inini Pauro, muranda wa Mwari uye muphostori wa Djesu Kristu maererano no kutenda ke anhu akasanangurhwa na Mwari uye ruziyo re unatsi we zvirokwazvo rinopindirana no kudzipira no mwoyo wese kuna Mwari
2 uye rinotsamira mu kariro yo upenyu usikaperi wakagondeswa kare-kare na Mwari asikanyepi;
3 asi pa nguwa yake yakasisira, akaita kuti soko rake riziikanwe peciseenzeswa basa re kuparidzira randakapaswa maererano no mutemo we Muponesi wedu Mwari;
4 ndiri kutarira Tito, mwana wangu wakagondeka maererano no kutenda katinako:
Nyasha no runyararo zvinobva kuna Mwari Baba na Kristu Djesu Muponesi wedu ngazvigare na iwewe.
5 Ndakakusiya ku Kreta kuti ugadzirise zviro zvainga zvakashata uye kuti ugadze akuru e ungano mu thaundi rimwe na rimwe, maererano no nhungamiriro dzandakakupasa:
6 Mukuru we ungano anodikana kugara asina caanopumhwa, ano mukadzi umwe basi uye ano ana anotenda asikapumhwi kuti ano muhambiro wakashata kana kuti aazwiri.
7 Ngokuti muonereri wakagadzwa na Mwari aadikani kugara no caanopumhwa, kuomerera pa zvido zvake, kukasika kutsamwa, kumwisa doro, kugara no bvinga, kukara upfumi,
8 asi anodikana kutambira arendo zvakanaka,* kuda zvakanaka, kugara no marangariro akanaka, munatsi, kugondeka, kudzibata,
9 anobatisisa masoko akatendeka pa kufundisa kake, kuti akwanise kubambisa* no fundiso yakanaka,* pamwepo no kusumurura aya anophikisa.
10 Ngokuti kuno apanduki akawanda anobhuya zvisikabetseri, uye anocengedza, maka-maka aya anobatisisa nyaya yo ucekeri.
11 Unodikana kufunga muromo dzawo, ngokuti anhu aya ari kurumbwa ecitsakatisa mhuri dzese, ecifundisa zviro zvaasikadikani kufundisa, ecizviitira kuti aone zviro ngo mushobo wakashata.
12 Umwe we aphorofita wawo kamare wakati: “Anhu e ku Kreta anonyepa nguwa dzese, zvinyama zvinothyisa, anorhyisa, anonungo.”
13 Upupuri uu ngewe zvirokwazvo. Nge ndaa yazvo, rumbwa weciasumurura no simba rese, kuitira kuti agare no kutenda kakabamba,
14 uye kuti asapurutane ngano dze Adjudha no mitemo dze anhu akasiya cokwadi.
15 Zviro zvese zvakacena ku anhu akacena; asi ku anhu akasvipa uye asina kutenda, apana cakacena, ngokuti marangariro awo no hana dzawo zvakasvipiswa.
16 Awona anoziisa pamhene kuti anoziya Mwari, asi anomuramba no zviito zvawo, ngokuti anosemhusa, aazwiri uye apana basa rakanaka raanozwi akasisira kuti ariite.
Masoko ari pasi
^ Kana kuti: “anobata zvakanaka anhu aasikazii.”
^ Kana kuti: “kukohomedzesa.”
^ Kana kuti: “inobetsera.”
