Kuna Tito 2:1-15
2 Asi iwewe, rumbwa wecireketa zviro zvinoenderana no fundiso yakanaka.*
2 Anarume acembera anodikana kugara anhu anodzibata pa zviro zvaanoita, anoita zviro no mwoyo wese, ano marangariro akanaka, akabamba mu kutenda, mu rudo no mu kushingirira.
3 Zvimwezvoo, anakadzi acembera anodikana kugara ano muhambiro unoreremedzwa, asina mapsveda, asikaiti aranda e doro, asi anofundisa zviro zvakanaka,
4 kuti akwanise kupangira* anakadzi aciri madjaha kuti ade amuna awo, ade ana awo,
5 agare no marangariro akanaka, ano tsika dzakacena, anoita mabasa e pa nyumba, akanaka, anozwira amuna awo, kuitira kuti soko ra Mwari risashorhwe.
6 Ngo mushobo umwewo, rumbwa wecikohomedzesa anarume aciri madjaha kuti agare no marangariro akanaka,
7 uye gara muezaniso we mabasa ese akanaka. Fundisa zvakacena wecizviita no mwoyo wese,
8 weciseenzesa masoko akanaka* asikashorhwi, kuitira kuti aphikisi apsveruke, atame kureketa zvakashata nge zvedu.
9 Aranda ngaadzikande pasi pe madzitenzi awo pa zviro zvese zvaanoita, ecipsvaka kuapfadza, asikaadairi ngo mushobo wakashata,
10 asikaabiri, asi ecipangidza kuti akanyasa kuthembeka, kuitira kuti zvese zvaanoita zviite kuti fundiso ye Muponesi wedu Mwari, ikudzwe.
11 Ngokuti nyasha dza Mwari dzakapangidzwa pamhene, dzeciunzisa ruponeso ku anhu akasiyana-siyana.
12 Idzona dzinotifundisa kuramba zviro zvakashata no zvido zve nyika uye kuti tirarame no marangariro akanaka, unatsi,* uye kudzipira no mwoyo wese kuna Mwari mu nyika ino,
13 tecietsera kariro inopfadza no kupangidzwa ke rukudzo ra Mwari mukuru uye na Djesu Kristu, Muponesi wedu,
14 uya akadzipira kuti atisudzunure* pa zviro zvese zvisikapindirani no mutemo uye ocenesa anhu anoseenza no simba pa mabasa akanaka, kuti aaite ake kamare.
15 Rumbwa wecireketa zviro izvi, wecikohomedzesa* uye wecisumurura no masimba ese. Usatendere kuti munhu upi hake akudheerere.
Masoko ari pasi
^ Kana kuti: “inobetsera.”
^ Kana kuti: “kuedzurira; kufundisa.”
^ Kana kuti: “anobetsera.”
^ Onai pakazwi Kupanganidzwa ke Masoko.
^ Cigrego: “atinunure.”
^ Kana kuti: “wecibambisa.”
