Kuna Tito 3:1-15
3 Rumbwa weciaedzurira kuti adzikande pasi uye azwire anyautongi no anhu ano masimba, agare akagadzirira kuita mabasa ese akanaka,
2 asarekete zvakashata ngezve anhu amweni, asareketedzane, asi agare anhu anozwisisa, ecipangidza upfawi ku anhu ese.
3 Ngokuti isusuwo tainga tiri anhu asina nzero, tainga tisikazwiri, tainga takapauswa, tainga tiri aranda e zvido zvakasiyana-siyana uye kusirira, teciita zvakashata uye bibvu, tainga tisikapfarirhwi uye taizondana.
4 Ngokudaro, Muponesi wedu Mwari, paakapangidza pamhene nyasha dzake uye rudo rake ku anhu
5 (haiwa nge mabasa e unatsi atakaita, asi nge ndaa ye usisi wake), iyena akatiponesa no kutisambidza kuti tigare apenyu uye akaita kuti tigare apsva peciseenzeswa mwiya mucena.
6 Iyena akatidururira mwiya uwona ngokuda kake eciseenzesa Djesu Kristu, Muponesi wedu,
7 kuitira kuti mumasure mekuzwi tiri anatsi peciseenzeswa nyasha dzake, tigare agari e nhaka maererano no kariro ye upenyu usikaperi.
8 Masoko aya ngee zvirokwazvo, uye inini ndinoda kuti urumbwe wecikohomedzesa zviro izvi, kuitira kuti aya akatenda muna Mwari arumbwe ecirangarira kuita mabasa akanaka. Zviro izvi zvakanaka uye zvinobetsera anhu.
9 Asi usapindire mu nyaya dzipi hadzo dzisina basa uye no ngano dze madzinza e kare, madziyo, kureketedzana ngezve Mutemo, ngokuti azvibetseri uye azviseenzi ciro.
10 Kana munhu akabararisa fundiso dze manyepo, iwewe womupangira* kokutanga no kocipiri, asi iyena wotama kuzwa, usashamwaridzane naye,
11 ngokuti iwewe unozviziya kuti munhu iyena wasiya kuhamba mu gwanza rakanaka uye uri kushaisha ecidzipasa ega ndaa.
12 Kana inini ndikakutumira Artema kana Tikiko, ita zviri zvese kuti undivhakacire ku Nikopori, ngokuti ndikona kandinonga ndiri mu nguwa ye kutonhora.
13 Pasa Zena, wokuti unonyasa kuziya Mutemo, pamwepo na Aporo kuitira kuti akwanise kugara no zviro zvese zvaanoda pa rhwendo rawo.
14 Asi anhu edu ngaafundirewo kurumbwa eciita mabasa akanaka, kuitira kuti akwanise kuzobetsera paya panodikanwa zviro nokukasika, kuti asagare asikabari micero.
15 Ese ari pamwepo na inini ari kukutambisa. Nditambisirewo aya anotida mu kutenda.
Nyasha dza Mwari ngadzigare na imwimwi mwese.
Masoko ari pasi
^ Kana kuti: “womungwadza.”