Tsamba ya Tiyago 1:1-27
1 Inini Tiyago, muranda wa Mwari uye wa Tenzi Djesu Kristu, ku madzinza 12 akabararika mu mbuto dzakasiyana-siyana:
Ndiri kumutambisai!
2 Hama dzangu, munodikana kupfara maningi pamunonga mecisongana no miedzo dzakasiyana-siyana,
3 ngokuti imwimwi munozviziya kuti kana kutenda kenyu kukaedzwa, kunoita kuti mushingirire.
4 Asi siyai kuti kushingirira kupedze basa rako, kuitira kuti mugare makakwana uye makanaka pa zviro zvese, musina camunoshoterhwa.
5 Hino, kana umwe wenyu asina ungwaru, ngaarumbwe ecikumbira Mwari, ngokuti iyena anopasa munhu wese no mwoyo wese asikamushori,* acaupaswa kamare.
6 Asi ngaarumbwe ecikumbira ano kutenda, uye asikakani-kani, ngokuti munhu anokana-kana wakaezana no fungu ro mubahari rinohambiswa no mhepo kwese-kwese.
7 Zvezvirokwazvo, munhu iyena aadikani kuetsera kuti pano caacapaswa na Djehovha;*
8 iyena uno mwoyo miiri, aazi kudzimikidza mu makwanza ake ese.
9 Asi hama isina zvakawanda zve kurarama nazvo, ngaipfare* nge ndaa ye kukudzwa kayo,
10 uye mupfumi ngaapfare ngokuti zvino waa pa mbuto yakaterera, ngokuti mupfumi wakaita hingana ruwa ro mushango rinooma.
11 Ngokuti zuwa rinobuda recipisa uye roita kuti muti uome, maruwa ambwere uye kurungama kawo kupere. Ndizvonawo zvinoitika no mupfumi, iyena unongara-ngara pa nguwa yaanonga ecibatikana pa upfumi wake.
12 Anopfara munhu anorumbwa ecishingirira miedzo, ngokuti paanotenderhwa acapaswa korowa ye upenyu, yakagondeswa na Djehovha* kuno aya anorumbwa ecimuda.
13 Munhu paanonga eciedzwa, ngaasabhuye kuti: “Ndiri kuedzwa na Mwari.” Ngokuti Mwari aangaedzwi no zviro zvakashata, uye iyena aaedzi munhu.
14 Asi munhu umwe na umwe unoedzwa nge kusirira kake uye wotorhwa mwoyo nge zvido zvake.
15 Hino, cido pacinokura cinobara citema; uye citema pacinonga caizwa, cinobara rufu.
16 Musacengedzwe hama dzangu dzinodiwa.
17 Cipo cese cakanaka uye cipo cese cakakwana cinobva kumusoro, kuna Baba e ciedza ce kudenga, awo asikacinji hinga zvinoita mabvute anocinja.
18 Ngokuti nge kuda kawo eciseenzesa soko re cokwadi, takabarhwa kuti tigare zvibereko zvokutanga pakati pe zvisikwa zvawo.
19 Hama dzangu dzinodiwa, ziyai izvi: Munhu wese anodikana kukasika kuzwa, asi ononoka kureketa, uye ononoka kunyangadzwa,
20 ngokuti kunyangadzwa ko munhu akuiti kuti pagare no unatsi wa Mwari.
21 Ngokudaro, bvisai zviro zvese zvisikazi kucena no zviro zvakashata, uye tendai soko no upfawi rakasimwa mamuri ringakwanisa kumuponesai.*
22 Hino, garai anhu anoita zvinorekethwa no soko, haiwa azwi basi, mecidzicengedzera no marangariro e manyepo.
23 Ngokuti kana munhu ari muzwi we soko asikaiti zvarinoreketa, wakaezana no munhu unoringira hope yake pa supeya.
24 Ngokuti iyena unodziringira, pedzepo oenda, okanganwa kuti wakaita kudini.
25 Asi uya anonyasa kuongorora mutemo wakakwana we rusununguko uye worumbwa eciuzwira, unogara haiwa basi muzwi we soko unokanganwa nokukasika, asi muiti we basa; uye iyena unozopfara pa zviro zvese zvaanoita.
26 Kana munhu ecirangarira kuti anonamata Mwari* asi asikangwariri rurumi rake, iyena ari kucengedza mwoyo wake, uye kunamata kake akubetseri ciro.
27 Mushobo we kunamata wakacena uye usikazi kusvipa mu maonero a Mwari Baba edu, ndi uu: Kucengeta nherera no afirhwakadzi pa kushuphika kawo, uye kurumbwa tisina pakasvipiswa no nyika.
Masoko ari pasi
^ Kana kuti: “asikamupasi ndaa.”
^ Onai Apendi. A5.
^ Kana kuti: “ngaidade.”
^ Onai Apendi. A5.
^ Kana kuti: “kuponesa mwiya yenyu.”
^ Kana kuti: “munamati.”
