Tsamba ya Tiyago 2:1-26
2 Hama dzangu, kodi imwimwi muri kubatisisa kutenda muna Tenzi wedu anokudzwa Djesu Kristu uye pa nguwa imweyo muno rusananguro pakati penyu here?
2 Ngokuti kana munhu uno aneri yo oro no macira akanakisisa akapinda pa musangano wenyu, pedzepo popindawo murombo uno macira akasvipa,
3 imwimwi munopfarira uya wakapfeka macira akanakisisa uye moti kaari: “Gara apa pa mbuto yakanaka,” asi ku murombo moti: “Iwewe rumbwa wakaima,” kana kuti: “Gara pasi apa padhuze no pandinotsanzikira tsoka dzangu”?
4 Kana meciita kudaro, amuripi kupangidza rusananguro here, uye mecigara atongi anoita zvisananguro zvakashata pakati penyu?
5 Purutanai hama dzangu dzinodiwa. Azvirokwazvopi here kuti Mwari akasanangura anhu anooneka hinga arombo no nyika kuti agare apfumi mu kutenda uye kuti agare agari e nhaka ye Umambo, yaakagondesa aya anomuda?
6 Asi imwimwi munoshora arombo. Apfumi andiopi anomudzvinyirirai uye anomukwekweredzai ecimuendesai ku matribhunari here?
7 Andiopi here anotuka zina rakanaka ramunoziikanwa naro?
8 Kana imwimwi mecizwira mutemo wa mambo, maererano no zvakatarhwa mu Matarhwa kuti: “Ida mudoni wako hinga mushobo waunodziita,” muri kuita zvakanaka.
9 Asi kana imwimwi mukarumbwa mecipangidza rusananguro, muri kuita citema uye munotongwa* nge mutemo hinga ashaishi.
10 Ngokuti kana munhu akazwira Mutemo wese asi otama kuzwira dii rimwe basi re Mutemo, iyena unogara mushaishi we Mutemo wese.
11 Ngokuti uya akati: “Usaite upombwe,” akatizve: “Usauraye.” Hino, kana iwewe usikaiti upombwe asi weciuraya, unogara mushaishi we mutemo.
12 Reketai uye itai zviro hinga anhu acatongwa no mutemo we anhu akasununguka.*
13 Ngokuti munhu asikapangidzi usisi acatongwa asikapangidzirhwi usisi. Usisi unonyisa kutonga.
14 Hama dzangu, zvinobetserei kana munhu akati uno kutenda, asi asina mabasa? Kutenda ikona kungamuponesa here?
15 Kudai hama kana hanzvadzi isina zvokupfeka* no zvokurhya zvinokwana pa zuwa,
16 uye umwe wenyu woti kaari: “Enda hako mu runyararo; rumbwa wecidziirhwa uye wecirhya zvakanaka,” asi wotama kuipasa zvainoda kuti irarame, zvinobetserei?
17 Zvimwezvoo no kutenda, kutenda basi kusina mabasa kakafa.
18 Kunyazi zvakadaro, munhu umweni unoti: “Iwewe uno kutenda, uye inini ndino mabasa. Ndipangidze kutenda kako kusina mabasa, uye inini ndicakupangidza kutenda kangu nge mabasa angu.”
19 Iwewe unotenda kuti kuna Mwari umwe basi here? Uri kuita zvakanaka. Asi madhimoni anotendawo uye anotetemera.
20 Asi iwewe munhu usina ruziyo, unoda here kuona kuti kutenda kusina mabasa akuna zvakunobetsera?
21 Baba edu Abrahamu, aazi here kuzwi munatsi nge mabasa mumasure me kupira Izaki mwana wawo pa artari?
22 Onai kuti kutenda kawo kakapangidzwa no mabasa uye kutenda kawo kakagara kakakwana nge ndaa ye mabasa awo,
23 uye zvakadzadzisa Matarhwa anoti: “Abrahamu wakatenda muna Djehovha,* uye zvakaita kuti azwi munhu munatsi,” uye wakaguma pa kudainzwa kuti shamwari ya Djehovha.*
24 Onai kuti munhu unozwi munatsi nge mabasa, haiwa nge kutenda basi.
25 Nge mushobo umwewo, Rakabhi hure aazi kuzwi munhu munatsi nge mabasa, mumasure me kutambira atumwa zvakanaka uye kuaendesa no gwanza rimweni here?
26 Zvezvirokwazvo, kuitawo hinga mwiri usina simba ro upenyu* wakafa, kutenda kusinawo mabasa kakafa.
Masoko ari pasi
^ Kana kuti: “munosumururhwa.”
^ Cigrego: “mutemo we rusununguko.”
^ Cigrego: “ari mitu.”
^ Onai Apendi. A5.
^ Onai Apendi. A5.
^ Kana kuti: “mwiya.”
