Tsamba ya Tiyago 3:1-18
3 Hama dzangu, amwesepi imwimwi maidikana kugara afundisi, ngokuti imwimwi munozviziya kuti isusu ticatambira kutongwa kakakura.
2 Ngokuti tese isusu tinoshaisha* kakawanda. Kana munhu asikashaishi pa kureketa, ndi munhu wakakwana, unokwanisawo kuonerera mwiri wake wese.
3 Kana tikasunga muromo we kavharo kuitira kuti itizwire, tinokwanisawo kuonerera mwiri wayo wese kuti iite zvatinoda.
4 Onaiwo ngezve manavhiyo:* Kunyazi hazvo akakura maningi uye ecihambiswa nge mhepo ino simba, ciro cidoko ndico cinoseenzeswa kuti aende kunonga kecidiwa no mutekenyi wawo.
5 Nge mushobo umwewo, rurumi i nhengo doko ye mwiri, asi rinogaya nge zviro zvakakura. Onai kuti muriro mudoko-doko unopisa gwasha rakakura!
6 Rurumi ndi muriroo. Rurumi rinoimirira nyika yakadzara no zvakashata pakati pe nhengo dze mwiri wedu, ngokuti rinosvipisa mwiri wese uye ropisa upenyu wese we munhu; murazvu* wawo unobva mu Gehena.*
7 Ngokuti mushobo wese we zvinyama zve mushango, zvinomburuka, zvinyama zvinopsveremenda, no zvisikwa zvo mu bahari zvingatungamirirhwa uye zviri kutungamirirhwa no anhu.
8 Asi apana munhu unokwanisa kuonerera rurumi. Irona arionerereki uye rinokuwadza, rakadzara no vheneno inouraya.
9 Naro tinokudza Baba edu Djehovha,* uye naro tinotuka anhu akasikwa “no mufanikiso wa Mwari.”
10 Mu muromo umwewo munobuda makomborero uye no kutuka.
Hama dzangu, azvizi kunaka kuti zviro zvakadaro zviitike nge mushobo uu.
11 Zvingaita here kuti pa mbuto imweyo pabude mvura inotapira no inowawa?
12 Hama dzangu, zvingaita here kuti muonde ubare maorivhi, kana kuti mu uvha ubare maonde? Ngo mushobo umwewo, panobuda mvura inorungura apabudiwo mvura inotapira.
13 Ndiani akangwara uye anozwisisa pakati penyu? Kana aripo ngaapangidze mararamiro ake akanaka, mabasa anoizwa no upfawi anouya no ungwaru.
14 Asi kana imwimwi muno shanje dzakakura mu mwoyo menyu uye kureketedzana, musagaye, musanyepe mecipesana no cokwadi.
15 Uu aungwarupi unobva kudenga; nge we pasi, we cinyama uye we dhimoni.
16 Ngokuti pese pano shanje no kureketedzana, apona panogarawo no kutama kupindirana uye no mushobo wese we zviro zvakashata.
17 Asi ungwaru unobva kumusoro, cokutanga wakacena, pedzepo uno runyararo, unozwisisa, wakagadzirira kuzwira, wakadzara nge usisi, micero yakanaka, ausananguri uye aucengedzeri.
18 Uyezve, mucero we unatsi unosimwa pa mugariro we runyararo ku* aya anoita kuti pagare no runyararo.
Masoko ari pasi
^ Cigrego: “tinokuhunyika.”
^ Kana kuti: “mabharko makuru.”
^ Kana kuti: “kugabhuka ke muriro.”
^ Onai pakazwi Kupanganidzwa ke Masoko.
^ Onai Apendi. A5.
^ Mabhaibheri amweni anoti: “nge.”
