Tsamba ya Tiyago 4:1-17
4 Hondo no kurhwisana zviri pakati penyu zvinobva kupi? Azvibvi mu zvido zvenyu zve kunyama zvinorhwisana mukati menyu here?*
2 Imwimwi munoda zviro, asi amuripi kuzviona. Munorumbwa meciuraya uye mecisirira, asi amukwanisi kuona camunoda. Munorumbwa mecirhwa uye meciita hondo. Imwimwi apana camunaco ngokuti amukumbiri.
3 Pamunokumbira amupaswi, ngokuti imwimwi muri kukumbira no cinangwa cakashata, kuitira kuti muzviseenzese mu zvido zvenyu zve kunyama.
4 Imwi aiti e upombwe,* amuzvizii here kuti kuita ushamwari no nyika kunomuitai kuti mugare muzondi wa Mwari? Ngokudaro, uya anoda kugara shamwari yo nyika, unodziita muzondi wa Mwari.
5 Kana kuti imwimwi munorangarira kuti Matarhwa anoreketa nyore here paanoti: “Mwiya wakagara matiri unorumbwa wecitiita kuti tisirire zviro zvakawanda”?
6 Kunyazi zvakadaro, nyasha dzatinopangidzirhwa na Mwari dzakakura maningi. Ndiyo ndaa, Matarhwa anoti: “Mwari anozonda aya anodzikudza, asi anopangidza nyasha dzake ku aya anodzidodosa.”
7 Ngokudaro, dzikandei pasi pa Mwari; asi rhwisanai na Dhiyabhurosi, uye iyena acamutizai.
8 Khwederai dhuze na Mwari, uye iyena acakhwedera kamuri. Cenesai nyara dzenyu, imwimwi ashaishi, uye cenesai mwoyo yenyu, imwimwi muno mwoyo miiri.
9 Tsukwarai, tsumbai uye cemai. Kuseka kenyu ngakucinje kugare kucema, uye kupfara kenyu ngakugare kutsukwara.
10 Dzidodosei pamberi pa Djehovha,* uye iyena acamukwidziridzai.
11 Hama, siyai kureketa zvakashata ngezve amweni. Uya unoreketa zvakashata ngezve hama yake kana kutonga hama yake, unonga ecishora mutemo uye kutonga mutemo. Hino kudai mecitonga mutemo, amuripi munhu anoita zvinorekethwa no mutemo, asi muri mutongi.
12 Kuno umwe basi wekuti ndi Muiti we mutemo uye Mutongi, iyena anokwanisa kuponesa uye kutsakatisa. Asi iwewe ndiwe ani kuti utonge mudoni wako?
13 Zvino purutanai imwimwi munobhuya kuti: “Nyamasi kana kuti mangwana ticaenda ku thaundi riya, ikona ticagareyo gore rimwe, ticaita bhizi redu uye ticaona mare yakawanda,”
14 kunyazi musikatozii kuti upenyu wenyu ucagara kudini mangwana. Ngokuti imwimwi makaita hinga mhute inooneka ke nguwa doko pedzepo yongara-ngara.
15 Pane kudaro, imwimwi maidikana kubhuya kuti: “Kana Djehovha* akada, ticararama uye ticaita ici kana ico.”
16 Asi cinoitika nge cekuti imwimwi munodada nge kudzikudza kenyu. Kudzikudza kwese uku kakashata.
17 Hino kana munhu eciziya kuita zviro zvakanaka uye kunyazi zvakadaro asikazviiti, ari kuita citema.
Masoko ari pasi
^ Cigrego: “mu nhengo dzenyu.”
^ Kana kuti: “musikazi kutendeka.”
^ Onai Apendi. A5.
^ Onai Apendi. A5.
