Tsamba ya Tiyago 5:1-20
5 Zvino imwimwi apfumi, purutanai, cemai uye tsumbai ngezve matambudziko acamuuirai.
2 Upfumi wenyu wapera kuora uye macira enyu apera kurhyiwa no zvitema macira.
3 Oro yenyu no prata zvapedzwa no furuju, uye furuju yazvo inozogara upupuri we kushaisha kenyu uye yorhya nyama yenyu. Zvamakaunganidza zvicagara hinga muriro mu mazuwa ekupedzesera.
4 Onai! Anhu akaseenza mu minda dzenyu pa kukorora motama kuaripa ari kucema, uye kucema ke akorori aya ecikumbira rubetso, kaguma mu nzee dza Djehovha* we anyahondo.
5 Imwimwi makagara no upenyu we upfumi pa nyika, meciita zvido zve nyama yenyu. Makarhya mopunda moita hinga cinyama ciri kuetsera zuwa ro kuuraiwa.
6 Imwimwi makapasa ndaa, no kuuraya munatsi. Kodi munorangarira kuti aamuzondii here?
7 Ngokudaro hama, garai no mwoyo unononoka kutsamwa dakara pa zuwa re kuoneka ka Tenzi. Rangarirai ngezve murimi unoetsera zvibereko zvakanaka zvinobva pa mataka, ecietsera no mwoyo unononoka kutsamwa dakara pa kunaya ke mvura yokutanga no yokupedzesera.
8 Na imwimwiwo, garai no mwoyo unononoka kutsamwa; bambisai mwoyo yenyu, ngokuti zuwa re kuoneka ka Tenzi riri kukhwedera.
9 Hama, musagurungute ku umwe na umwe wenyu, kuitira kuti musatongwe. Onai! Mutongi waa pa musuwo.
10 Hama, panocokuita no kushingirira matambudziko uye kugara no mwoyo unononoka kutsamwa, teedzerai muezaniso we aphorofita, aya akareketa mu zina ra Djehovha.*
11 Onai! Tinoti anopfara* aya akashingirira. Imwimwi makazwa ngezve kushingirira ka Djobo uye makaona zvaakazoizirhwa na Djehovha,* makaona kuti Djehovha* ano usisi wakakura uye ano nyasha.
12 Asi kudarika izvi hama dzangu, musapike, kunyazi no denga kana no nyika, uye imai kuita mhiko ipi hayo. Asi “Honde” wenyu ngaagare honde uye “Haiwa” wenyu ngaagare haiwa, kuitira kuti mutame kutongwa.
13 Pakati penyu pano munhu ari kushuphika here? Ngaarumbwe eciita munamato. Pano munhu ari kupfara here? Ngaaembe mapisarema.
14 Pakati penyu pano munhu ari kurhwara here? Ngaadainze akuru e ungano, uye awona ngaamuitire munamato, ecimudzodza mafuta mu zina ra Djehovha.*
15 Uye munamato unoizwa no kutenda ucaita kuti uri kurhwarewo* aporeswe, uye Djehovha* acamupasa simba. Uyezve, kana iyena akaita zvitema, acarekererhwa.
16 Hino pupurai zvitema zvenyu pamhene ku umwe na umwe wenyu, uye itiranai munamato, kuitira kuti muporeswe. Munamato we kudeketera unoizwa no munhu munatsi uno simba rakakura.*
17 Eriya wainga ari munhu uno mazwiro akaita hingana edu, asi iyena paakaita munamato no mwoyo wese kuti kusanaye, akuzi kunaya mu nyika iyona ke makore 3 no mwedzi 6.
18 Hino iyena wakaitazve munamato, uye denga rakanaisa mvura uye nyika yakabara micero.
19 Hama dzangu, kana munhu pakati penyu akapauswa mu cokwadi uye umweni woita kuti ahwirire,
20 ziyai kuti munhu unoita kuti mushaishi ahwirire kubva mu gwanza rake rakashata acamuponesa* pa rufu uye acafukidza zvitema zvakawanda.
Masoko ari pasi
^ Onai Apendi. A5.
^ Onai Apendi. A5.
^ Kana kuti: “akakomborerhwa.”
^ Onai Apendi. A5.
^ Onai Apendi. A5.
^ Onai Apendi. A5.
^ Kana kuti: “wakarembewo.”
^ Onai Apendi. A5.
^ Cigrego: “kuno simba guru pakunonga keciseenza.”
^ Kana kuti: “acaponesa mwiya wake.”
