Zvakapangidzwa kuna Juau 1:1-20
1 Zvakapangidzwa na Djesu Kristu, zvaakapaswa na Mwari, kuti apangidze aranda ake zviro zvinodikana kuitika nokukasika. Iyena akatuma ngirozi yake, uye eciseenzesa iyona, akazvipangidza ku muranda wake Juau,
2 uwo wakapupurira soko rakabva kuna Mwari uye no upupuri wakapaswa na Djesu Kristu, honde, we zviro zvese zvaakaona.
3 Anopfara uya anoerenga no izwi guru no aya anozwa masoko e uphorofita uu uye ozwira zviro zvakatarhwa mauri, ngokuti nguwa yakasanangurhwa yaapadhuze.
4 Inini Juau, ndiri kutarira ungano nomwe dziri mu provhinsiya yo Aziya:
Garai no nyasha no runyararo zvinobva kuna “Uya aripo, ainga aripo uye acauya,” uye zvinobva ku mwiya minomwe iri pamberi pe cigaro cake ce umambo,
5 uye zvinobva kuna Djesu Kristu, “Mupupuri Akatendeka,” “dangwe pa kumutswa kubva ku akafa,” uye “Mutongi we madzimambo e pa nyika.”
Uya wekuti anotida uye akatisudzunura pa zvitema zvedu eciseenzesa ngazi yake kamare—
6 uye iyena akaita kuti tigare madzimambo, no apristi kuna Mwari wake uye Baba ake—honde, iyena ngaakudzwe uye ngaagare no simba nokusikaperi. Ameni.
7 Onai! Iyena ari kuuya ari mu makuta, uye madziso ese acamuona, kutobatanidzawo no aya akamubaya acamuonawo; uye madzinza ese e pa nyika acadziponda pa diti ecitsumba nge ndaa yake. Honde, izvi zvicaitikadi. Ameni.
8 “Inini ndini Arfa uye Omega,”* anodaro Djehovha* Mwari, “Uya aripo, ainga aripo uye acauya, we Masimba Ese.”
9 Inini Juau, hama yenyu inotambudzika pamwepo na imwimwi, mu umambo uye mu kushingirira mu rubatano na Djesu, ndainga ndiri pa citsuwa cinozwi Patimosi, nge ndaa ye kureketa ngezva Mwari uye kupasa upupuri ngezva Djesu.
10 Ndakagara mu zuwa ra Tenzi nge kufemerhwa, uye ndakazwa izwi guru sure kangu rakaezana no kurira ko tropito,
11 reciti: “Tara mu mupumburu zviro zvauri kuona uye zvitumire ku ungano nomwe: Yo ku Efeso, Esmirna, Pergamo, Tiyatira, Sardhi, Firadhefiya, uye no yo ku Raodhiseya.”
12 Inini ndakaringira sure kuti ndione kuti ndiani wainga ecireketa na inini, uye pandakaringira sure, ndakaona zvigadziko zve makandiyero zvinomwe zve oro,
13 uye pakati po zvigadziko zve makandiyero, painga pano munhu wakatodzana no mwana we munhu, ainga akapfeka djira rakareba dakara ku tsoka uye akasunga bhande re oro pa diti.
14 Uyezve, musoro wake no tsitsi rake zvainga zvakacena hinga ukuse we mabira, zvakacena hinga masanza, uye madziso ake ainga akaita hinga murazvu we muriro;
15 tsoka dzake dzainga dzakaita hinga kobre yakanaka painonga yapiswa no muriro, uye izwi rake rainga rakaita hinga kutinhira ke mvura yakawanda.
16 Uye iyena ainga ano nyeredzi nomwe mu moko kwawo wake, uye pa muromo pake paibuda supada yakareba yakapinza inoceka no kwese, uye ku hope kake kainga kakaita hinga zuwa riri kudjeka no simba rese.
17 Pandakamuona, ndakambwerera pa tsoka dzake hinga munhu wafa.
Iyena akandibata no moko kwawo wake uye akati: “Usathye. Inini ndini wokutanga no wokupedzesera,
18 uye uya ari mupenyu. Ndakambofa, asi zvino ndiri mupenyu uye ndicarumbwa ndiri mupenyu nokusikaperi, uye ndino shavhi dzo rufu no Guwa.*
19 Hino, tara zviro zvawaona, zviro zviri kuitika zvino uye zviro zvicaitika mumasure mo izvi.
20 Izvi ndizvo zvakaigika zva Mwari zve nyeredzi nomwe dzawaona dziri ku moko kwawo wangu uye zvigadziko zvinomwe zve makandiyero zve oro: Nyeredzi nomwe dzinoimirira ngirozi dze ungano nomwe, uye zvigadziko zvinomwe zve makandiyero zvinoimirira ungano nomwe.
Masoko ari pasi
^ Kana kuti: “A na Z.” Arfa i bhii rokutanga uye Omega i bhii rokupedzesera pa mabhii e mureketero we Cigrego.
^ Onai Apendi. A5.
^ Kana kuti: “mu Hadhesi,” kureya guwa rinokandwa anhu ese. Onai pakazwi Kupanganidzwa ke Masoko.
