Zvakapangidzwa kuna Juau 10:1-11
10 Ndakaona ngirozi imweni yakabamba yecicita kubva kudenga yakapfeka* makuta; mu musoro mayo mainga muno muraraungu,* mirenje* dzayo dzainga dzakaita hinga mapirari e muriro,
2 uye mu nyara mayo mainga muno mupumburu mudoko wainga wafunungurhwa. Murenje kwawo wayo wakatsika mu bahari, murenje boshwe wayo wakatsika pa nyika,
3 uye yakadainzira no izwi guru hinga zvinoita mhondoro inorudza. Payakadainzira, maizwi e mheni nomwe akareketa.
4 Padzakareketa mheni nomwe, inini ndainga ndaakuda kuzvitara, asi ndakazwa izwi recibva kudenga reciti: “Cengeta* zvarekethwa no mheni nomwe, uye usazvitare.”
5 Ngirozi yandakaona yakatsika mu bahari uye pa nyika, yakamutsira moko kwawo wayo kudenga,
6 uye yakapika no Uya anorarama nokusikaperi, akasika denga no zviro zviri mariri, nyika no zviro zviri mairi uye bahari no zviro zviri mariri yeciti: “Apacinazve nguwa yokuetsera.
7 Asi mu mazuwa ekuti ngirozi yocinomwe painonga yaakuda kuridza tropito yayo, zvezvirokwazvo pacadzadzika zvakaigika zva Mwari, zvekuti Mwari akaziisa hinga masoko akanaka ku aranda ake, aphorofita.”
8 Uye ndakazwa izwi recibva kudenga recibhuyazve na inini reciti: “Enda kootora mupumburu wakafununguka uri mu nyara me ngirozi yakatsika murenje umwe mu bahari uye umweni pa nyika.”
9 Ndakaenda kainga kuno ngirozi iyona uye ndoibvunza kuti indipase mupumburu mudoko. Iyona yakandibvunza kuti: “Utore uye uurhye, uye uwona ucaita kuti mundani mako muwawe, asi ucatapira mukanwa mako hinga uci.”
10 Inini ndakatora mupumburu mudoko mu nyara ye ngirozi uye ndakaurhya, uye mukanwa mangu uwona waitapira hingana uci, asi pandakapedza kuurhya, mu ndani mangu makawawa.
11 Akandibvunza kuti: “Unodikana kuphorofitazve nge pamusoro pe anhu, madzinza, mireketero uye madzimambo akawanda.”
Masoko ari pasi
^ Kana kuti: “yakafukidzwa no.”
^ Kana kuti: “arko iriji.”
^ Cigrego: “tsoka.”
^ Cigrego: “nama.”
