Zvakapangidzwa kuna Juau 11:1-19
11 Uye ndakapaswa gonje rakaita hinga ndonga,* paaindibvunza kuti: “Muka upime mbuto cena yo tempro ya Mwari uye no artari, pamwepo no ari kunamata imona.
2 Asi panocokuita no ruwanze riri kunza ke mbuto cena yo tempro, risiye rakadaro, usaripime, ngokuti rakapaswa anhu e madzinza amweni, uye awona anozotsika-tsika thaundi cena ke mwedzi 42.
3 Ndicaita kuti apupuri angu airi aphorofite ke mazuwa 1260 akapfeka masaku.”
4 Apupuri aya anoimirirhwa nge miti miiri dze miorivhi uye no zvigadziko zviiri zve makandiyero, zvakaima pamberi pa Tenzi we nyika.
5 Kana pano munhu unoda kuakuwadza, pa muromo pawo pacabuda muriro uye uwona ucapisa azondi awo. Kana pano munhu unoda kuakuwadza, iyena anozouraiwa nge mushobo uwona.
6 Awona ano simba re kufunga denga kuti mvura isanaye ke mazuwa aanonga eciphorofita, uye ano simba re kucinja mvura kuti igare ngazi uye kukuwadza nyika no mishobo yese ye matambudziko pese paya paanonga ecida.
7 Paanonga apedza kupasa upupuri wawo, cikara cinobuda mu rindi rakadzikisisa cicaita hondo nawo, coakunda uye coauraya.
8 Mitumbi yawo icakandwa mu gwanza guru ro thaundi guru rekuti nge mushobo we ku mwiya rinodainzwa kuti Sodhoma uye Edjipitu, uko kakafirawo Tenzi wawo pa mutanda.
9 Anhu e madzinza ese, mireketero uye nyika dzese acaringira mitumbi yawo ke mazuwa matatu no hafu, uye aazotenderi kuti mitumbi yawo ikandwe mu guwa.
10 Uye aya anorarama pa nyika acapfara maningi nge ndaa ye kufa kawo uye acapemberera no kutumirana zvipo, ngokuti aphorofita airi aya aitambudza aya anorarama pa nyika.
11 Mumasure me mazuwa matatu no hafu, mwiya we upenyu wakabva kuna Mwari wakapinda maari, uye awona akamuka oima, uye aya akaaona akathya maningi.
12 Awona akazwa izwi guru recibva kudenga reciabvunza kuti: “Kwirai kuno.” Hino awona akakwira ecienda kudenga ari mu makuta uye azondi awo akaaona.*
13 Pa nguwa iyona, pakaitika cigidhi-gidhi cakakura maningi; dii rimwe re matii gumi e thaundi rakambwera, anhu anokwana 7000 akafa nge ndaa ye cigidhi-gidhi icona, uye akawanda akathya maningi uye akakudza Mwari we kudenga.
14 Nyathwa yocipiri yadarika. Ngwarirai! Nyathwa yocitatu iri kuuya nokukasika.
15 Ngirozi yocinomwe yakaridza tropito yayo. Uye maizwi makuru akazwika ecibva kudenga eciti: “Umambo we nyika wagara Umambo wa Tenzi wedu no wa Kristu wake, uye iyena acatonga hinga mambo nokusikaperi.”
16 Akuru anokwana 24 ainga akagara pa zvigaro zvawo zve umambo pamberi pa Mwari, akahwarara uye akanamata Mwari,
17 eciti: “Tinomutendai, Djehovha* Mwari we Masimba Ese, uya aripo uye ainga aripo, ngokuti makaseenzesa simba renyu rikuru uye makatanga kutonga hinga mambo.
18 Asi anhu e nyika dzese akashatirhwa uye imwimwi makapangidzirawo shungu dzenyu, uye yakaguma nguwa yakasanangurhwa yekuti akafa atongwe uye mupase mubairo aranda enyu, aphorofita, kutobatanidzawo anhu acena no anhu anothya zina renyu, akuru no adoko, uye kuti mutsakatise aya ari kutsakatisa nyika.”
19 Hino, mbuto cena yo tempro ya Mwari yo kudenga yakafunungurhwa, uye kakaoneka areka yo citenderano cake mu mbuto cena yo tempro yake. Uye kaicetuka hingana mheni, kaizwika maizwi makuru, kutinhira, cigidhi-gidhi uye masanza makuru.
Masoko ari pasi
^ Kana kuti: “ndonga yokupima nayo.”
^ Kana kuti: “ainga akaringira.”
^ Onai Apendi. A5.
