Zvakapangidzwa kuna Juau 12:1-17
12 Hino kudenga kakaoneka cipangidzo cikuru: Mwanakadzi wainga akapfeka zuwa, pasi pe tsoka dzake painga pano mwedzi, uye mu musoro make mainga muno korowa yo nyeredzi 12,
2 iyena wainga ano pamwiri. Waicema no kugomera nge ndaa ye marhwadzo e kuda kubara.
3 Kakaonekazve cipangidzo cimweni kudenga: Nyoka huru yokupsvuka hinga muriro, ino misoro minomwe uye no nyanga gumi, uye mu misoro mayo mainga muno korowa nomwe;
4 mushwe wayo wakakwekweredza dii rimwe re matii matatu ro nyeredzi dzo kudenga, uye wakadzikhandira pa nyika. Nyoka huru iyona, yakaima pamberi pe mwanakadzi wainga waakuda kubara, kuitira kuti paacazobara, irhye mwanewo.
5 Uye iyena wakabara mwana we mwanarume, acazousha anhu e nyika dzese no ndonga yo simbi. Mwana wakewo wakatorhwa, woendeswa kuna Mwari ku cigaro cake ce umambo.
6 Mwanakadzi iyena wakatizira ku renje,* ku mbuto yaainga agadzirirhwa na Mwari uye kaaizopasirhwa zvokurhya ke mazuwa 1260.
7 Kakaitika hondo kudenga: Migeri* no ngirozi dzake akarhwisa nyoka huru, uye nyoka huru no ngirozi dzayo akarhwisawo,
8 asi awona akanyiswa,* uye aazi kuzoonazve mbuto ye kugara kudenga.
9 Ngokudaro, nyoka huru yakakhandirhwa pasi, nyoka yo pakutanga, inozwi Dhiyabhurosi uye Sathani, uya ari kucengedza nyika yese inogarhwa; iyena wakakhandirhwa pa nyika uye ngirozi dzake dzakakhandirhwawo pamwepo naye.
10 Ndakazwa izwi guru recibva kudenga reciti:
“Razoguma ruponeso, no simba, no Umambo wa Mwari wedu, no simba ra Kristu wake, ngokuti mupumhi we hama dzedu wakhandirhwa pasi, iyena anopumha hama dzedu usiku no masikati pamberi pa Mwari wedu!
11 Awona akamunyisa nge ndaa yo ngazi yo Bira uye nge ndaa yo masoko e upupuri wawo, uye aazi kuda upenyu* wawo kamare, kunyazi paaisongana no ngozi ye kufa.
12 Ndiyo ndaa, pfarai imwimwi matenga, pamwepo na imwimwi munogara maari! Une nyathwa iwewe nyika, pamwepo no bahari, ngokuti Dhiyabhurosi wacita kamuri, ano shungu dzakakura, ngokuti unoziya kuti wasarirhwa no nguwa doko.”
13 Nyoka huru payakaona kuti yainga yakhandirhwa pa nyika, yakateera mwanakadzi wainga abara mwana we mwanarume.
14 Asi mwanakadzi wakapaswa mabaphiro mairi o godzi guru, kuitira kuti amburuke dakara ku renje, ku mbuto yake yaaizopaswa zvokurhya ke nguwa imwe, no nguwa mbiri uye no hafu ye nguwa,* kure no nyoka.
15 Uye nyoka yakarutsa mvura hinga murambo nge sure ke mwanakadzi, kuitira kuti andondomere mu mvura.
16 Asi nyika yakauya koobetsera mwanakadzi, uye nyika yakafunungura muromo uye yomedza murambo wainga warutswa ngo nyoka huru.
17 Hino nyoka huru iya, yakanyangadzwira mwanakadzi uye yakaenda koorhwa hondo no ana* ake akasara, aya anozwira mitemo ya Mwari uye anoita basa re kupupurira ngezva Djesu.
Masoko ari pasi
^ Onai pakazwi Kupanganidzwa ke Masoko.
^ Zvinoreya kuti “Ndiani Wakaita Hingana Mwari?”
^ Mabhaibheri amweni anoti: “asi iyona [kureya, nyoka huru] yakanyiswa.”
^ Kana kuti: “mwiya.” Onai pakazwi Kupanganidzwa ke Masoko.
^ Kureya, nguwa nhatu no hafu.
^ Cigrego: “mbeu.”