Zvakapangidzwa kuna Juau 13:1-18
13 Iyona* yakaima mu madjeca o mu bahari.
Hino ndakaona cikara cecibuda mu bahari, cino nyanga gumi no misoro minomwe, uye mu nyanga maco mainga muno makorowa manomwe, asi mu musoro maco mainga muno mazina e kutuka Mwari.
2 Cikara candakaona cainga cakaita hingana khamba, asi mirenje dzaco dzainga dzakaita hingana dzo ursu, uye muromo waco wainga wakaita hingana we mhondoro. Nyoka huru yakapasa cikara simba rayo, cigaro cayo ce umambo uye masimba makuru.
3 Ndakaona kuti umwe we musoro waco wainga wakuwadzwa maningi, asi cironda caco caiita hingana kuti caizociuraya, cakaporeswa uye nyika yese yaiteera cikara yecishamisika.
4 Awona ainamata nyoka huru, ngokuti yainga yapasa simba cikara, uye ainamata cikara no masoko okuti: “Ndiani wakaita hingana cikara, uye ndiani unokwanisa kurhwisana naco?”
5 Cakapaswa muromo waireketa zviro zvekudzikudza uye zvekutuka Mwari, uye cakapaswa simba rekuti ciriseenzese ke mwedzi 42.
6 Icona cakafunungura muromo waco kuti cituke Mwari, cituke zina rake, uye cituke kaanogara no aya anogara kudenga.
7 Icona cakatenderhwa kurhwisana no acena uye kuakunda, uye cakapaswawo simba pamusoro pe anhu e madzinza ese, mireketero uye anhu e nyika dzese.
8 Anhu ese ari pa nyika acacinamata. Kubvira pakasikwa nyika, apana zina re umwe wawo rakatarhwa mu mupumburu we upenyu we Bira rakauraiwa.
9 Kana pano ano nzee, ngaazwe.
10 Kana pano acadikana kuendeswa ku uranda, acaendeswa ku uranda. Kana munhu akauraya umweni wake nge supada,* ucauraiwawo nge supada. Izvi zvinoda kuti acena apangidze kushingirira uye agare no kutenda.
11 Hino ndakaona cikara cimweni cecibuda pasi, uye cainga cino nyanga mbiri dzakaita hingana dzo bira, asi cakatanga kureketa hingana nyoka huru.
12 Icona cinoseenzesa simba rese ro cikara cokutanga, cikara cokutangeco ceciona. Uye cinoita kuti nyika no anhu anogara mairi anamate cikara cokutanga cainga cino cironda cinouraya, asi cakazopora.
13 Uye cinoita zvipangidzo zvakakura, cinoitawo kuti muriro umbwere pa nyika wecibva kudenga anhu ecizviona.
14 Icona cinocengedzera aya anogara pa nyika, nge ndaa yo zvipangidzo zvacakatenderhwa kuita pamberi pe cikara, cecibvunza aya anogara pa nyika kuti agadzire mufanikiso we cikara cakatemwa no supada, asi kunyazi zvakadaro coraramazve.
15 Cakatenderhwa kuti cipase upenyu* mufanikiso we cikara, kuitira kuti mufanikiso we cikara urekete uye uuraise ese aya anoramba kunamata mufanikiso we cikara.
16 Icona cinobambidzira anhu ese, akuru no adoko, apfumi no arombo, akasudzunuka no aranda, kuti akandwe cipangidzo pa moko kwawo wawo kana kuti pa huma,
17 kuitira kuti pasaoneke munhu unotenga kana kutengesa kunza ke uya ano cipangidzo, kureya zina ro cikara, kana kuti numero yo zina raco.
18 Apa panotoda ungwaru: Uya ano uzii ngaapsvake kuziya numero ye cikara ici, ngokuti numero ye cikara ici nge ye munhu. Numero yakhona i 666.
Masoko ari pasi
^ Kureya, nyoka huru.
^ Mabhaibheri amweni anoti: “Kana pano anodikana kuuraiwa no supada.”
^ Kana kuti: “mwiya.”
