Zvakapangidzwa kuna Juau 14:1-20
14 Hino ndakaona Bira rakaima pa Dunhu re Ziyoni, pamwepo no anhu 144 000, ainga akatarhwa zina raro no zina ra Baba aro pa huma dzawo.
2 Ndakazwa izwi raibva kudenga, raiita hingana kutinhira ke mvura yakawanda uye raiita hingana kutinhira kukuru ke mheni; izwi randakazwa rainga rakaita hingana aembi aiemba eciridza marudimbwa awo.
3 Aiemba ngoma yaiita hinga ngoma ipsva pamberi po cigaro ce umambo uye pamberi po zvisikwa zvirongomuna zvipenyu uye no pe akuru. Apana waikwanisa kufundira ngoma iyona, kunza ke aya aikwana 144 000 akatengwa pa nyika.
4 Aya ndiwo asikazi kusvipiswa no anakadzi; zvezvirokwazvo, akaita hinga mhandwe. Aya ndiwo ari kuteera Bira kwese karinoenda. Awona akatengwa pakati pe anhu hinga zvibereko zvokutanga kuna Mwari uye ku Bira,
5 uye apana ucengedzi wakaoneka mu muromo mawo; awona apana caanopumhwa.
6 Ndakaonazve ngirozi imweni yecimburuka pakati pe denga,* uye iyona yainga ino masoko akanaka anogara nokusikaperi e kuziisa ku anhu anogara pa nyika, ku madzinza ese, mireketero uye no anhu.
7 Iyona yaibhuya no izwi guru kuti: “Ithyai Mwari uye mukudzei, ngokuti nguwa yekuti atonge anhu yaguma. Hino namatai Uya akasika denga, nyika, bahari uye no mbuto dzinobuda mvura.”
8 Pedzepo, yakauya ngirozi imweni yocipiri yeciti: “Rambwera, rambwera Bhabhironi Guru, riya raiita kuti madzinza ese agare no cido* cikuru ce kuda kuita uhure!”*
9 Ngirozi imweni yocitatu, yakadziteera yecidainzira no izwi guru yeciti: “Kana munhu akanamata cikara no mufanikiso waco uye akakandwa cipangidzo pa huma yake kana pa nyara yake,
10 acamwawo vhinyu ye shungu dza Mwari, iyo yakadururhwa isikazi kuvhenganidzwa mu kopo ye kutsamwa Kake uye acatambudzwa ne muriro no enshofre pamberi pe ngirozi cena uye pamberi pe Bira.
11 Cutsi ce kutambudzwa kawo cicarumbwa cecikwira nokusikaperi; aya anonamata cikara no mufanikiso waco no anhu ese anokandwa cipangidzo ce zina raco, aazozorori usiku no masikati.
12 Izvi zvinoda kuti acena, aya anocengeta mitemo ya Mwari, uye anobatisisa kutenda muna Djesu apangidze kushingirira.”
13 Inini ndakazwazve izwi rimweni recibva kudenga reciti: “Tara kuti: Anopfara aya akafa, ekuti kubvira pa nguwa ino zvecienda mberi ari mu rubatano na Tenzi. Honde, mwiya unoti, awona ngaazorore pa kuseenza kawo no simba, ngokuti mabasa awo aakaita anoenda nawo.”
14 Ndakaonazve makuta okucena, uye wainga akagara pamusoro pawo wainga akaita hinga mwana we munhu, akapfeka korowa ye oro mu musoro make uye ano sikeyo yakapinza mu nyara.
15 Ngirozi imweni yakabuda mu mbuto cena yo tempro, yecikhuwa no izwi guru ku uya wainga akagara pa makuta, yeciti: “Seenzesa sikeyo yako ukorore, ngokuti yaguma nguwa ye kukorora, zvirimwa zvo pasi pano zvanyasa kuibva.”
16 Uye uya wainga akagara pamusoro pe makuta, wakapindisa sikeyo yake pa nyika uye zviro zvainga zviri pa nyika zvakakororhwa.
17 Ngirozi imwenizve yakabuda mu mbuto cena yo tempro iri kudenga, uye iyona yainga yakabatirawo sikeyo yakapinza.
18 Pa artari pakabuda ngirozi imweni, iyona yainga ino simba kudarika ro muriro. Iyona yakakhuwa no izwi guru ku uya wainga ano sikeyo yakapinza, yeciti: “Seenzesa sikeyo yako yakapinza, uceke zvianza zve uvha dzo pasi pano, ngokuti uvha dzapsvuka.”
19 Ngirozi iyona yakapindisa sikeyo yayo pa nyika pano, iyona yakaceka zvianza zvo uvha, yozvikhandira mu mbuto yakakura ye kusvinira uvha ye shungu dza Mwari.
20 Mbuto ye kusvinira uvha ii yakatsikwa-tsikwa kunza ke thaundi, uye pa mbuto ii pakabuda ngazi yakaguma pa cinosunga pa muromo we makavharo ke mukuwo ungakwana makirometro 296.*
Masoko ari pasi
^ Kana kuti: “mu mhepo; mu denga.”
^ Kana kuti: “shungu huru ye.”
^ Soko iri mu Cigrego rinozwi porneía. Onai pakazwi Kupanganidzwa ke Masoko.
^ Cigrego: “1600 estadhiyo.” Estadhiyo imwe yaikwana mametro 185. Onai Apendi. B14.
