Zvakapangidzwa kuna Juau 15:1-8
15 Ndakaona cipangidzo cimweni kudenga, cakakura uye cinoshamisa; ndakaona ngirozi nomwe dzino matambudziko manomwe. Aya ndiwo okupedzesera, ngokuti ndiwo acaita kuti shungu dza Mwari dzipere.
2 Ndakaona cakaita hinga bahari ro vhidru rakavhengerhwa no muriro, uye aya anonyisa cikara no mufanikiso waco no numero yo zina raco, ainga akaima padhuze no bahari ro vhidru, akabata marudimbwa* a Mwari.
3 Awona aiemba ngoma ya Mozesi, muranda wa Mwari, uye ngoma yo Bira, eciti:
“Djehovha,* Mwari we Masimba Ese, mabasa enyu makuru uye anoshamisa. Makwanza enyu ngee unatsi uye ngee zvirokwazvo, imwimwi Mambo asina mugumo.
4 Zvezvirokwazvo, ndiani asikazomuthyii imwimwi Djehovha,* uye asikazokudzi zina renyu? Ngokuti ndimwi mwega makagondeka. Madzinza ese acauya omunamatai pamberi penyu, ngokuti mitemo yenyu ye unatsi yakapangidzwa pamhene.”
5 Mumasure mazvo, ndakaona mbuto cena yo tenda yo Upupuri yakafunungurhwa kudenga,
6 uye ngirozi nomwe dzakabatira matambudziko manomwe dzakabuda mu mbuto cena, dzakapfeka djira rokucena uye rainyetukira, uye dzakasunga mabhande manomwe e oro pa diti padzo.
7 Cimwe ce zvisikwa zvirongomuna zvipenyu cakapasa ngirozi nomwe matijera manomwe e oro, akadzara no shungu dza Mwari, uwo anorarama nokusikaperi.
8 Mbuto cena yakadzara no cutsi nge ndaa yo rukudzo ra Mwari uye nge ndaa yo simba rake, uye apana waikwanisa kupinda mu mbuto cena dakara matambudziko manomwe e ngirozi nomwe apera.
