Zvakapangidzwa kuna Juau 16:1-21
16 Ndakazwa izwi guru recibva ku mbuto cena recibhuya ku ngirozi nomwe kuti: “Endai koodururira pa nyika matijera manomwe e shungu dza Mwari.”
2 Ngirozi yokutanga yakadururira tijera yayo pa nyika. Uye maronda anorhwadza akashatisisa, akatanga kutambudza anhu ainga ano cipangidzo ce cikara uye ainamata mufanikiso waco.
3 Yocipiri yakadururira tijera yayo mu bahari. Uye bahari rakacinja rogara ngazi hingana yo munhu wakafa, uye zvisikwa* zvese zvipenyu zvainga zviri mu bahari zvakafa.
4 Yocitatu yakadururira tijera yayo mu mirambo uye mu mbuto dzinobuda mvura. Uye idzona dzakacinja dzogara ngazi.
5 Ndakazwa ngirozi yainga ino simba pamusoro pe mvura yeciti: “Imwimwi, Uya aripo uye ainga aripo, Makagondeka uye ndimwi munatsi, ngokuti makapasa mutongo uu,
6 sezvo awona akadurura ngazi yo acena no yo aphorofita, ndiyo ndaa imwimwi makaapasa ngazi kuti amwe; ngokuti izvi ndizvo zvakaasisira.”
7 Uye inini ndakazwa izwi raibuda pa artari recibhuya kuti: “Honde, Djehovha* Mwari we Masimba Ese, matongero enyu ngee zvirokwazvo uye ngee unatsi.”
8 Yocirongomuna yakadururira tijera yayo pa zuwa. Uye zuwa rakatenderhwa kuti ripise anhu hinga muriro.
9 Hino anhu akapsva no kupisa kakakura, asi awona akatuka zina ra Mwari, uya ano simba pa matambudziko aya, uye awona aazi kucinyuka kana kumukudza.
10 Yocishanu yakadururira tijera yayo pa cigaro ce umambo co cikara. Uye umambo waco wakagara cidima, uye anhu akatanga kudziruma rurumi rawo nge kurhwadziwa,
11 asi akatuka Mwari we kudenga nge ndaa ye kurhwadziwa kawo uye nge ndaa ye zvironda zvawo, uye aazi kucinyuka pa mabasa awo.
12 Yocitanhatu yakadururira tijera yayo mu murambo mukuru we Eufrate. Mvura yakhona yakaoma, kuitira kuti pagadzirirhwe gwanza ro madzimambo e kumabvazuwa.
13 Uye ndakaona masoko matatu akafemerhwa asikazi kucena,* akaita hingana matanja aibuda pa muromo pe nyoka huru, pe cikara no pa muromo pe muphorofita we kunyepa.
14 Zvezvirokwazvo, aya ndi masoko akafemerhwa no madhimoni uye anoita zvipangidzo; anoenda ku madzimambo e nyika yese inogarhwa, kuitira kuti aaunganidze ku hondo ye zuwa guru ra Mwari we Masimba Ese.
15 “Purutanai! Ndiri kuuya hingana mbavha. Anopfara uya anogara akamuka uye ano macira ake, kuitira kuti asahambe ari mitu uye anhu asaone zvipsverudzi zvake.”
16 Uye awona akaunganidza madzimambo pa mbuto yekuti mu Cihebheru inodainzwa kuti Amagedhoni.*
17 Yocinomwe yakadururira tijera yayo mu mhepo. Hino izwi guru rakabuda ku mbuto cena recibva ku cigaro ce umambo reciti: “Zvaitika!”
18 Kakaoneka kucetuka hingana mheni, maizwi, kutinhira, uye cigidhi-gidhi cakakura, cakasiyana no zvigidhi-gidhi zvese zvainga zvakamboitika kubvira pakasikwa anhu pa nyika, nge ndaa yo simba no kukura kacainga cakaita.
19 Thaundi guru rakamweka ke matii matatu, uye mathaundi e anhu e madzinza amweni akambwera; uye Mwari akaedzurira Bhabhironi Guru kuti aripase kopo yo vhinyu yo shungu dzake.
20 Uyewo, zvitsuwa zvese zvakatiza, uye matunhu akangara-ngara.
21 Hino mapuwe makuru e masanza aibva kudenga akambwerera anhu, buwe rimwe na rimwe rairema tarento* imwe, uye anhu akatuka Mwari nge ndaa ye dambudziko re masanza, ngokuti dambudziko irona rainga rakakura maningi.
Masoko ari pasi
^ Kana kuti: “mwiya.”
^ Onai Apendi. A5.
^ Cigrego: “mwiya isikazi kucena.”
^ Soko iri mu Cigrego rinozwi Har Magedón, kubva pa soko re Cihebheru rinoreya kuti “Dunhu re Mejidho.”
^ Tarento rimwe ro Cigrego rairema 20,4 kirograma. Onai Apendi. B14.