Zvakapangidzwa kuna Juau 17:1-18
17 Imwe ye ngirozi nomwe dzainga dzakabatira matijera manomwe yakauya uye yakati kandiri: “Uya kuti ndikupangidze kutongwa ke hure guru rakagara pamusoro pe mvura yakawanda;
2 madzimambo e pa nyika akaita uhure* naro, uye anhu anogara pa nyika akararadza nge vhinyu ye uhure* waro.”
3 Iyona yakanditora no simba ro mwiya yondiendesa ku renje. Uye ndakaona mwanakadzi wainga akagara pa cikara cokupsvuka* cainga cakadzara no mazina okutuka Mwari uye cainga cino misoro minomwe no nyanga gumi.
4 Mwanakadzi iyena wainga akapfeka macira okupsvukirira uye no okupsvuka maningi, wainga akadzirungamisa no oro, mapuwe anokosha maningi uye maperora, uye mu nyara make mainga muno kopo ye oro yakadzara no zviro zvinonyangadza uye no zviro zvisikazi kucena zve uhure* wake.
5 Pa huma yake painga pakatarhwa zina risikazwisisiki rokuti: “Bhabhironi Guru, mai e mahure uye e zviro zvese zvinonyangadza zve pa nyika.”
6 Ndakaona kuti mwanakadziwo wainga akararadza nge ngazi yo acena uye no yo apupuri a Djesu.
Pandakamuona, ndakashamisika maningi.
7 Hino ngirozi iyona yakandibvunza kuti: “Ngei iwewe washamisika? Ndicakubvunza zvisikazwisisiki ngezve mwanakadzi uu uye ngezve cikara cakamuthwara cino misoro minomwe no nyanga gumi:
8 Cikara cawakaona cainga ciripo, asi apacina, icona caakuda kubuda mu rindi rakadzikisisa, uye cicatsakatiswa. Uye agari e pa nyika (aya asikazi kutarhwa mazina awo mu bhuku re upenyu kubvira pakatangwa nyika) acashamisika paacaona kuti cikara cainga ciripo, uye apacina, asi cicazoonekazve.
9 “Izvi zvinoda ndangariro dzino uzii:* Misoro minomwe inoimirira matunhu manomwe, ekuti mwanakadzi uu wakagarira pamusoro pawo.
10 Kuno madzimambo anomwe: Ashanu akambwera, umwe aripo uye umweni aasati aguma; asi paacaguma anodikana kugara nguwa doko.
11 Cikara cainga ciripo, asi apacina, iconawo ndi mambo wecisere, asi cinobva pa madzimambo anomwe, uye cicatsakatiswa.
12 “Nyanga gumi dzawaona dzinoimirira madzimambo gumi asati atambira umambo, asi awona anotambira simba rokutonga hinga madzimambo ke nguwa imwe basi pamwepo no cikara.
13 Awona ano marangariro amwewo, nge ndaa yazvo anopasa simba rawo uye utongi ku cikara.
14 Awona acarhwisana no Bira, asi ngokuti irona ndi Tenzi we madzitenzi uye Mambo we madzimambo, Bira ricawina. Aya ari pamwepo naro, anodainzwa kuti akasanangurhwa uye akatendeka acawinawo.”
15 Iyona yakati kandiri: “Mvura yawaona, yakagarirhwa no hure, inoimirira anhu, cikwata cakakura ce anhu, madzinza uye mireketero.
16 Nyanga gumi dzawaona uye cikara zvicazonda hure; izvona zvicariuraya uye zvicarisiya riri mitu, zvicarhya nyama yaro uye zvicaripisa zvacose no muriro.
17 Ngokuti Mwari akanda mu mwoyo mawo cido cekuda kuita zvaari kurangarira, honde, kuti aite marangariro awo amwe basi, e kupasa cikara umambo wawo, dakara masoko a Mwari adzadzika.
18 Mwanakadzi wawaona unoimirira thaundi guru rino umambo pamusoro pe madzimambo e pa nyika.”
Masoko ari pasi
^ Onai pakazwi Kupanganidzwa ke Masoko.
^ Soko iri mu Cigrego rinozwi porneía. Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Soko iri mu Cigrego rinozwi porneía. Onai pakazwi Kupanganidzwa ke Masoko.
^ Kana kuti: “ungwaru.”