Zvakapangidzwa kuna Juau 18:1-24
18 Mumasure me izvi, ndakaona ngirozi imweni yecicita kubva kudenga, ino simba guru, uye nyika yakavhenekerhwa no rukudzo rayo.
2 Iyona yakadainzira no izwi guru yeciti: “Rambwera! Rambwera Bhabhironi Guru, uye irona ragara mbuto inogarhwa no madhimoni uye inofindarhwa no mwiya yese isikazi kucena* uye no shiri dzese dzisikazi kucena uye dzinozondwa!
3 Ngokuti anhu e madzinza ese akararadza no vhinyu yo cido* cakakura ce kuita uhure,* madzimambo e pa nyika akaita uhure naro uye anhu anoita zve kutengesa* e pa nyika akagara apfumi nge ndaa yo simba ro zviro zvarakaunganidza risikapsveruki.”
4 Ndakazwa izwi rimweni recibva kudenga reciti: “Budai mariri anhu angu, kana musikadi kubatanidzwawo pa zvitema* zvaro, uye kana musikadi kubatana no matambudziko aro.
5 Ngokuti zvitema zvaro zvawanda dakara kudenga uye Mwari aedzurira mabasa aro asina unatsi.
6 Riitireiwo zvarakaitira amweni, honde, rihwirinzirei zvakapethwa kairi pa zviro zvarakaita; mu kopo maragadzirira doro, rigadzirireiwo zvakapethwa kairi.
7 Pa kudzikudza karo uye pa kurarama mu upfumi risikapsveruki, ritambudzei uye riitei kuti riceme. Ngokuti irona rinoti mu mwoyo maro: ‘Ndakagara hinga mambokadzi, andiripi mufirhwakadzi, uye andizombocemi.’
8 Ndiyo ndaa matambudziko aro, rufu, kucema no nzara, zvicauya pa zuwa rimwe basi, uye irona ricapiswa pa muriro, ngokuti Djehovha* Mwari, uya anoritonga, ano simba.
9 “Uye madzimambo e pa nyika, awo akaita uhure* naro uye akararama naro mu upfumi waro risikapsveruki acaricema uye acadziponda pa diti paacaona cutsi ce kupsva karo.
10 Paacaona kutambudzwa karo awona acathya, acaima nge cekure, eciti: ‘Rino nyathwa, rino nyathwa thaundi guru, Bhabhironi, thaundi rakabamba, ngokuti kutongwa karo kaguma pa nguwa imwe basi!’
11 “Uyezve, anhu anoita zve kutengesa pa nyika acacema uye acadeketera nge ndaa yaro, ngokuti apacinazve munhu ucatenga zviro zvaro zvese,
12 midziyo dzese dze oro, prata, mapuwe anokosha, maperora, macira akanaka, akapsvukirira, sedha, uye akapsvuka maningi; zviro zvese zvinoizwa no matabwa anonuhwirira uye mushobo wese we midziyo dzinoizwa no nyanga dzo nzoo, matabwa anokosha, kobre, simbi, uye marmore;
13 uyezve kanera, zvinonuhwirira zve ku Indiya, rusenzi, mafuta anonuhwirira, oribhano, vhinyu, azeiti, ufu wakamotsa, trigu, n’ombe, mabira, makavharo, ngoro, aranda, uye anhu.
14 Honde, iwewe Bhabhironi, zviro zvakanaka zvawaida* zvakusiya, uye zvokurhya zvako zvakanakisisa no zviro zvese zvakanaka zvawainga unazvo zvapera, azvicazoonekizve.
15 “Anotengesa zviro izvi, ekuti akagara apfumi nge ndaa yaro, akagara akaima nge cekure ngo kuthya matambudziko arinonga recisongana nawo, uye acacema no kutsumba,
16 eciti: ‘Rino nyathwa, rino nyathwa thaundi guru, rakapfeka djira rakanaka, rekupsvuka uye rekupsvuka maningi, rakadzirungamisa no oro, mapuwe anokosha uye maperora,
17 ngokuti upfumi wese uu wakakura, wakatsakatiswa pa nguwa imwe basi!’
“Uye mutungamiriri wese we navhiyo, muhambisi wese we navhiyo, ese anoseenza mu navhiyo uye ese anorarama no zviro zviri mu bahari acagara akaima nge kure
18 uye acakhuwa paanoona cutsi ce kubaka karo, eciti: ‘I thaundi ripi rakaita hingana thaundi guru?’
19 Awona acadzikhandirira mavhu mu musoro mawo uye ecikhuwa, ecicema uye ecideketera, eciti: ‘Rino nyathwa, rino nyathwa thaundi guru, rekuti rakapfumisa aya ainga ano manavhiyo mu bahari, irona rakatsakatiswa pa nguwa imwe basi!’
20 “Pfarai imwimwi muri kudenga, nge ndaa yaro, uye imwimwiwo acena, aphostori no aphorofita, ngokuti Mwari akagadza nguwa ye kuritonga, kuti amubetserei!”
21 Hino ngirozi imweni ino simba yakamutsa buwe rakaita hinga buwe ro gwiyo uye yakarikhandira mu bahari yeciti: “Nge mushobo uu, Bhabhironi thaundi guru, ricazokhandirhwawo kamwe basi nokukasika uye arizomboonekizve.
22 Mauri, iwewe Bhabhironi, amuzozwikizve aembi anoridza marudimbwa* awo, kana aembi anoridza mutoriro uye tropito. Uye mauri amuzoonekizve anhu anoita kunyazi basa ripi haro, uye apana gwiyo ricazozika mauri.
23 Mauri, amuzoonekizve ciedza, uye amuzozwikizve izwi ro mwanarume uri kuda kucata no mwanakadzi uri kuda kucata, ngokuti anhu ako, aiita zvokutengesa ainga akawanda pa nyika, uye ngokuti iwewe wakacengedza anhu e madzinza ese ngo zviro zvako zve masarapita.*
24 Honde, mariri makaoneka ngazi yo aphorofita, yo acena uye no yo ese aya akauraiwa pa nyika.”
Masoko ari pasi
^ Mabhaibheri amweni anoti: “masoko ese akafemerhwa asikazi kucena.”
^ Kana kuti: “shungu dze.”
^ Soko iri mu Cigrego rinozwi porneía. Onai pakazwi Kupanganidzwa ke Masoko.
^ Kana kuti: “anohamba ecitengesa.”
^ Kana kuti: “pa zvishaishi.”
^ Onai Apendi. A5.
^ Onai pakazwi Kupanganidzwa ke Masoko.
^ Kana kuti: “zvaipfarirhwa no mwiya wako.”
^ Kana kuti: “maarpa.”
^ Onai pakazwi Kupanganidzwa ke Masoko.
