Zvakapangidzwa kuna Juau 19:1-21
19 Mumasure me izvi, ndakazwa izwi guru raita hingana ro anhu akawanda raibuda kudenga, reciti: “Kudzai Djah!* Ruponeso, kukudzwa uye no simba ngezva Mwari wedu,
2 ngokuti matongero ake ngee zvirokwazvo uye ngee unatsi. Ngokuti iyena akatonga hure guru raisvipisa nyika ngo uhure* waro, uye orihwirinzira nge ndaa yo ngazi yarakadurura yo aranda ake.”
3 Uye mumasure mazvo, akabhuyazve kocipiri kuti: “Kudzai Djah!* Uye cutsi caro cicarumbwa cecikwira nokusikaperi.”
4 Akuru 24 uye no zvisikwa zvirongomuna zvipenyu akahwarara, akanamata Mwari, wekuti akagara pa cigaro ce umambo uye akati: “Ameni! Kudzai Djah!”*
5 Uyezve, pa cigaro ce umambo pakabuda izwi raiti: “Kudzai Mwari wedu, imwimwi aranda ake ese, anomuthya, akuru uye no adoko.”
6 Hino ndakazwa ciro caiita hingana izwi re anhu akawanda, hinga kutinhira ke mvura yakawanda uye kutinhira ko mheni, reciti: “Kudzai Djah,* ngokuti Djehovha* Mwari wedu, we Masimba Ese, atanga kutonga hinga mambo!
7 Ngatipfare, ngatidzare no mupfaro uye ngatimukudze, ngokuti mucato we Bira waguma uye mukadzi waro wapedza kugadzirira.
8 Honde, watenderhwa kupfeka djira rakanaka, rinonyetukira uye rakacena, ngokuti djira rakanaka rinoimirira mabasa e unatsi e acena.”
9 Ngirozi iyona yakandibvunza kuti: “Tara kuti: Anopfara aya akapikwa ku mabiko e* mucato we Bira.” Yakandibvunzazve kuti: “Aya ndi masoko e zvirokwazvo a Mwari.”
10 Hino ndakagodama pasi pe tsoka dzayo kuti ndiinamate. Asi yakandibvunza kuti: “Ngwarira! Usadaro! Ndindoriwo murandadoni wako no murandadoni we hama dzako, dzino basa re kupupurira ngezva Djesu. Namata Mwari! Ngokuti cinangwa ce uphorofita ngece kupupurira ngezva Djesu.”
11 Ndakaona denga rakafununguka, uye ndakaona kavharo yokucena. Uya wainga akaipakira anodainzwa Akatendeka uye Wezvirokwazvo, uye iyena anotonga uye anorhwa zve unatsi.
12 Madziso ake akaita hinga murazvu we muriro uye mu musoro make muno korowa dzakawanda.* Iyena ano zina rakatarhwa rekuti apana munhu anoriziya, kunza ka iyena basi,
13 uye iyena akapfeka djira rino ngazi, iyena anodainzwa kuti Soko ra Mwari.
14 Uyewo, anyahondo e kudenga aimuteera akapakira makavharo ekucena, uye awona ainga akapfeka macira akanaka, ekucena uye akacenesesa.
15 Pa muromo pake paibuda supada yakareba yakapinza, kuitira kuti atsakatise nayo anhu e madzinza. Iyena acaausha no ndonga yo simbi. Kupinda izvona, iyena anotsika mbuto ye kusvinira uvha yo shungu dza Mwari we Masimba Ese.
16 Pa djira rake, honde, pa mutezu wake, pakatarhwa zina rokuti: Mambo we madzimambo uye Tenzi we madzitenzi.
17 Ndakaonawo ngirozi imweni yakaima pa zuwa, uye yecidainzira no izwi guru ku shiri dzese dzinomburuka kudenga, yeciti: “Uyai kuno, unganai pa mabuso makuru a Mwari,
18 kuti murhye nyama ye madzimambo, nyama ye atungamiriri e masurudado, nyama ye anarume ano simba, nyama ye makavharo no ye aya akaapakira uye nyama ye anhu ese, akasununguka no aranda, akuru no adoko.”
19 Uye ndakaona cikara no madzimambo e pa nyika pamwepo no anyahondo awo, kuti arhwe hondo no uya wainga akapakira kavharo uye pamwepo no anyahondo ake.
20 Cikara cakabathwa pamwepo no muphorofita we kunyepa, aiita zvipangidzo pamberi paco zvaaicengedza nazvo anhu aya ainga akakandwa cipangidzo ce cikara, pamwepo no aya ainamata mufanikiso waco. Ese ari airi akakhandirhwa ari apenyu mu rindi rinopisa no enshofre.
21 Asi amweni ese akauraiwa no supada yakareba yaibuda pa muromo pe uya wainga wakapakira kavharo. Uye shiri dzese dzakaguta no nyama yawo.
Masoko ari pasi
^ Kana kuti: “Areruya.” “Djah” i zina ra Djehovha re kugurisira.
^ Onai pakazwi Kupanganidzwa ke Masoko.
^ Kana kuti: “Areruya.” “Djah” i zina ra Djehovha re kugurisira.
^ Kana kuti: “Areruya.” “Djah” i zina ra Djehovha re kugurisira.
^ Kana kuti: “Areruya.” “Djah” i zina ra Djehovha re kugurisira.
^ Onai Apendi. A5.
^ Kana kuti: “kurarira ke.”
^ Pamweni zvinoda kureya korowa dzaikandwa mu musoro no madzimambo.