Zvakapangidzwa kuna Juau 2:1-29
2 “Tarira ngirozi ye ungano iri mu Efeso kuti: Izvi ndizvo zvinorekethwa no uya akabata nyeredzi nomwe ku moko kwawo wake uye anohamba pakati pe zvigadziko zve makandiyero zvinomwe zve oro:
2 ‘Ndinoziya zviito zvako, kuseenza kako no simba no kushingirira kaunoita, uye ndinoziya kuti iwewe ausii kuti anhu akashata arumbwe ari pakati pako, uye wakaedza aya anodziti aphostori, asi asiripi, uye wakaaona kuti awona ndi anyepi.
3 Iwewe uri kupangidza kushingirira, uye wakarumbwa wecishingirira zviro zvakawanda nge ndaa ye zina rangu, usikarembi.
4 Kunyazi zvakadaro, pandinopesana na iwewe nge pekuti: Wakasiya rudo rawainga unaro pakutanga.
5 “‘Hino edzurira zviro zvakakuitisa kuti umbwere, cinyuka uye ita zviro zvawaiita pakutanga. Kana ukatama kucinyuka, ndicauya kauri, ndobvisa cigadziko cako co kandiyero pa mbuto yaco.
6 Asi pano zvakanaka zvauri kuita: Iwewe unozonda zviito zve cikwata ca Nikorau, zviito zvokuti inini ndinozvizondawo.
7 Uya ano nzee ngaazwe zvinorekethwa no mwiya ku ungano weciti: Munhu uya anowina, ndicamutendera kuti arhye mucero we muti we upenyu uri mu paraizo ya Mwari.’
8 “Tarira ngirozi ye ungano iri mu Esmirna kuti: Izvi ndizvo zvinorekethwa no uya ‘Wokutanga no Wokupedzesera,’ akafa uye akagarazve mupenyu:
9 ‘Ndinoziya kutambudzika kako no urombo wako, asi iwewe uri mupfumi. Ndinoziyazve kutukwa kaunoizwa no aya anodziti Adjudha, asi zvezvirokwazvo asiripi: Awona i sinagoga ra Sathani.
10 Usathye matambudziko auri kuda kubatana nawo. Dhiyabhurosi ucarumbwa ecikanda amweni enyu mu kadheya kuti munyase kuedzwa, uye imwimwi mucatambudzika ke mazuwa gumi. Rumbwa wakatendeka dakara pa kufa, uye inini ndicakupasa korowa ye upenyu.
11 Uya ano nzee ngaazwe zvinorekethwa no mwiya ku ungano weciti: Munhu uya anowina aazofi pa rufu rocipiri.’
12 “Tarira ngirozi ye ungano iri mu Pergamo kuti: Izvi ndizvo zvinorekethwa na uya ano supada yakareba, yakapinza, inoceka na kwese:
13 ‘Ndinoziya kauri kugara, kuno cigaro ce umambo ca Sathani; kunyazi zvakadaro, unorumbwa wakabatisisa zina rangu, uye unorumbwa wecitenda mandiri kunyazi mu mazuwa a Antipa, mupupuri wangu wakatendeka, wakaurairhwa kamunogara, uko kuri kugara Sathani.
14 “‘Kunyazi zvakadaro, ndino zviro zvandinopesana na iwewe, iwewe uciri no aya ari kuteera fundiso dza Bharami, uwo wakafundisa Bharaki kukanda buwe rinokuhunyisa pamberi pe ana e Israeri, kuitira kuti awona arhye zviro zvakabairhwa zvidhori uye aite uhure.*
15 Uyezve, iwewe uciri no anhu ari kuteera fundiso dze cikwata ca Nikorau.
16 Hino cinyuka. Kana ukatama kudaro, ndicauya kauri nokukasika uye ndicaarhwisa no supada yakareba inobuda pa muromo pangu.
17 “‘Uya ano nzee ngaazwe zvinorekethwa no mwiya ku ungano weciti: Uya anowina ndicamupasa manaa akafiswa, uye ndicamupasa cibuwe cidoko cekucena, uye pa cibuwe icona pakatarhwa zina ripsva, rekuti apana anoriziya, kunza ke uya akaritambira.’
18 “Tarira ngirozi yo ungano iri mu Tiyatira kuti: Izvi ndizvo zvinobhuiwa no Mwana wa Mwari, uya ano madziso akaita hingana murazvu we muriro uye mirenje dzakaita hingana kobre yakanaka painonga yapiswa no muriro:
19 ‘Ndinoziya zviito zvako, rudo rako, kutenda kako, basa rako uye kushingirira kaunoita, uye ndinoziya kuti zviito zvako zvauri kuita zvino zvakawanda kudarika zvokare.
20 “‘Kunyazi zvakadaro, pandinopesana na iwewe nge pekuti, uri kusiya mwanakadzi Djezabheri, uya anodziti muphorofitakadzi, uye anofundisa no kupausa aranda angu eciaitisa kuti aite uhure* uye no kurhya zviro zvakabairhwa zvidhori.
21 Uye inini ndakamupasa nguwa kuti acinyuke, asi iyena aadi kusiya kuita uhure.*
22 Ngokudaro, ndiri kuda kumutambudza no nhenda yakakura, uye aya anoita upombwe naye ndiri kuda kuatambudza kana akatama kucinyuka pa mabasa akashata akaita hingana ake.
23 Uye ndicauraya ana ake no nhenda inouraya, zvokuti ungano dzese dzicaziya kuti inini ndini uya anoongorora ndangariro dze mukati-kati uye mu mwoyo, uye ndicapasa umwe na umwe wawo maererano no zviito zvake.*
24 “‘Asi, ndinoti kamuri mwese imwimwi muri ku Tiyatira, mwese imwimwi musikateeri fundiso ii, uye amuzi kuguma pa kuziya zvinodainzwa kuti “zviro zvakadzika zva Sathani”: Andimutunhudzirii zviro zvimweni.
25 Asi batisisai zvamunazvo dakara ndauya.
26 Uya anowina uye anocengeta makwanza angu dakara ku mugumo, ndicamupasa simba ku anhu e madzinza amweni,
27 uye iyena acaatungamirira no ndonga ye simbi, zvokuti acaputswa-putswa hinga mudziyo we dongo, hinga kupaswa simba kandakaizwa na Baba angu.
28 Uye inini ndicamupasa nyeredzi yo macibesi.
29 Uya ano nzee ngaazwe zviri kubhuya mwiya ku ungano.’
Masoko ari pasi
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Soko iri mu Cigrego rinozwi porneía. Onai pakazwi Kupanganidzwa ke Masoko.
^ Kana kuti: “mazwiro e mukati-kati.” Cigrego: “mazazu.”