Zvakapangidzwa kuna Juau 21:1-27
21 Ndakaona denga ripsva no nyika ipsva; ngokuti denga rokare no nyika yokare zvainga zvadarika, uye bahari kainga kusisina.
2 Ndakaonawo thaundi cena, Djerusarema Ripsva, recicita kubva kudenga kuna Mwari, rakagadzirira hinga mwanakadzi uri kuda kucata, wakarungamiswa kuti atambire mwamuna wake.
3 Hino ndakazwa izwi guru recibva ku cigaro ce umambo reciti: “Ona! Tenda ra Mwari riri pakati pe anhu; iyena acagara nawo uye awona acagara anhu ake. Mwari pacake acagara nawo.
4 Acapukuta misodzi yese pa madziso awo, uye apacazoonekizve rufu, kana kutsukwara, kana kucema, kana kurhwadziwa. Zviro zvekare zvadarika.”
5 Uya ainga akagara pa cigaro ce umambo akati: “Ona! Ndiri kuita kuti zviro zvese zvigare zvipsva.” Uye akatizve: “Tara, ngokuti masoko aya akatendeka* uye ngee zvirokwazvo.”
6 Uye iyena akandibvunza kuti: “Zvaitika! Inini ndini Arfa uye Omega,* wokutanga uye wokupedzesera. Wese uya anozwa mukaha ndicamupasa nyore* mvura inobva mu mbuto inobuda mvura ye upenyu.
7 Munhu wese anowina anozogara nhaka ye zviro izvi; inini ndicagara Mwari wake, uye iyena acagara mwana wangu.
8 Asi aya anothya, asina kutenda, anoita zviro zvinopsverusa, anoita zviro zvinonyanyasa, anouraya, anoita uhure,* anoita zve mudzimu,* anonamata zvidhori no ese aya anonyepa, anozokhandirhwa mu dziya rino muriro uye enshofre. Iri rinoimirira rufu rocipiri.”
9 Imwe ye ngirozi nomwe dzainga dzino matijera manomwe akadzara no matambudziko okupedzesera, yakauya kandiri uye yondibvunza kuti: “Uya ndikupangidze mwanakadzi uri kuda kucata, mukadzi we Bira.”
10 Hino, yakanditora mu simba ro mwiya, yondiendesa ku dunhu guru uye rakareba uye yakandipangidza thaundi cena re Djerusarema recicita kubva kudenga kuna Mwari
11 uye no rukudzo ra Mwari. Kunyetukira karo kaiita hingana buwe rinokosha maningi, hingana buwe ro jaspe yakanakisisa.*
12 Thaundi irona rainga rino muru wakakura uye wakareba uye wainga uno misuwo 12, uye pa misuwo idzona painga pano ngirozi 12, uye painga pakatarhwa mazina e madzinza 12 e ana e Israeri.
13 Kumabvazuwa kainga kuno misuwo mitatu, kakutsi kainga kuno misuwo mitatu, katemaidumba kainga kuno misuwo mitatu, uye kumadokera kainga kuno misuwo mitatu.
14 Muru we thaundi wainga uno mapuwe 12 e fundasau, uye pa mapuwepo painga pano mazina 12 e aphostori 12 e Bira.
15 Uya aireketa na inini wainga akabata mupimo we gonje re oro, kuti apime thaundi no misuwo dzaro uye muru waro.
16 Thaundi irona rainga rino matii marongomuna akaezana, uye kukura karo kainga kakaezana no kupamhama karo. Iyena akaripima no gonje, roita makirometro* angakwana 2220; kukura, kupamhama uye kureba karo zvainga zvakaezana.
17 Iyena akapimawo muru waro, woita 144 makubhiti* maererano no mupimo we munhu, wekuti pa nguwa imweyo ndi mupimoo we ngirozi.
18 Muru uwona wainga wakaizwa nge buwe ro jaspe, uye thaundi irona rainga rakaizwa nge oro yakanaka yakaita hinga vhidru yakanakisisa.*
19 Fundasau yo muru we thaundi irona, yakaizwa nge mushobo wese we mapuwe anokosha: Fundasau yokutanga yakaizwa no buwe ro jaspe, yocipiri ro safira, yocitatu ro kasedhoniya, yocirongomuna ro esmerardha,
20 yocishanu ro sardhonika, yocitanhatu ro sardhiyo, yocinomwe ro krizorito, yocisere ro bheriro, yocipfembamwe ro topaziyo, yocigumi ro krizopazo, yocigumi na imwe ro jasintu, yocigumi na piri ro ametista.
21 Uyewo, misuwo 12 yainga iri ye maperora 12; musuwo umwe na umwe wainga wakaizwa no perora rimwe. Uye gwanza rakakura ro thaundi rakaizwa no oro yakanaka, hingana vhidru inoonekera.
22 Andizi kuona tempro mukati maro, ngokuti Djehovha* Mwari we Masimba Ese no Bira ndiwo tempro yakhona.
23 Thaundi irona aridi ciedza co zuwa kana co mwedzi, ngokuti rinovhenekerhwa no rukudzo ra Mwari, uye Bira ndirona ciedza caro.
24 Madzinza ese acahamba mu ciedza caro, uye madzimambo e pa nyika acaripasa rukudzo raro.
25 Misuwo dzaro adzizofungwi no masikati, ngokuti imona amuzombogari no usiku.
26 Rukudzo no rureremedzo zve madzinza zvicaendeswa mukati maro.
27 Asi zviro zvese zvisikazi kucena uye anhu ese anoita zviro zvinosemhusa uye anocengedza aazopindi mariri; mucapindwa basi no aya akatarhwa mu mupumburu we upenyu we Bira.
Masoko ari pasi
^ Kana kuti: “anothembeka.”
^ Kana kuti: “A na Z.” Arfa i bhii rokutanga uye Omega i bhii rokupedzesera pa mabhii e mureketero we Cigrego.
^ Kana kuti: “asikaripi.”
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Kana kuti: “kristari.”
^ Cigrego: “Estadhiyo.” Estadhiyo imwe yaikwana mametro 185. Onai Apendi. B14.
^ Mametro anoda kukwana 64. Onai Apendi. B14.
^ Kana kuti: “kristari.”
^ Onai Apendi. A5.
