Zvakapangidzwa kuna Juau 22:1-21
22 Iyona yakandipangidza murambo we mvura ye upenyu, yakacenesesa hinga kristari, yaibva ku cigaro ce umambo ca Mwari uye ce Bira
2 uye waierera no pakati po gwanza guru re thaundi. Mu matii mairi e murambo uwona, mainga makadzara no miti ye upenyu yaibara micero kanokwana kuita 12 pa gore uye yaibara micero mwedzi yese. Masakani e miti iyona aiseenza pa kurapa anhu e madzinza.
3 Kunonga kusisinazve kutukwa. Asi cigaro ce umambo ca Mwari uye ce Bira cinonga ciri mu thaundi, uye aranda ake acamuitira basa cena;
4 awona acaona hope yake, uye zina rake rinonga riri pa huma dzawo.
5 Uyewo, kunonga kusisina usiku, uye awona anonga asikadi ruvheneko ro ciedza kunyazi no ciedza co zuwa, ngokuti Djehovha* Mwari acaavhenekera, uye awona acatonga nokusikaperi.
6 Iyona yakati kandiri: “Masoko aya akatendeka* uye ngee zvirokwazvo. Honde, Djehovha* Mwari, uwo akafemera aphorofita, akatuma ngirozi yake kuti apangidze aranda ake zviro zvinodikana kuitika nokukasika.
7 Purutana! Ndiri kuuya nokukasika. Anopfara wese uya anozwira masoko e uphorofita uri mu mupumburu uu.”
8 Inini Juau, ndini ndaizwa no kuona zviro izvi. Pandakaona uye kuzwa zviro izvi, ndakahwarara pa tsoka dze ngirozi yakandipangidza zviro izvi kuti ndiinamate.
9 Asi iyona yakandibvunza kuti: “Ngwarira! Usadaro! Ndindoriwo murandadoni wako no murandadoni we hama dzako, aphorofita, no aya anozwira masoko ari mu mupumburu uu. Namata Mwari.”
10 Iyona yakandibvunzazve kuti: “Usafunge masoko e uphorofita ari mu mupumburu uu, ngokuti nguwa yakagadzwa yaapadhuze.
11 Uya asina unatsi ngaarumbwe asina unatsi; uya asikazi kucena ngaarumbwe ari mu muhambiro usikazi kucena; asi munatsi ngaarumbwe ari munatsi, uye mucena ngaarumbwe ari mucena.
12 “‘Purutana! Ndiri kuuya nokukasika, uye mubairo wandicapasa una inini, kuti ndihwirinzire umwe na umwe maererano no mabasa ake.
13 Inini ndini Arfa uye Omega,* wokutanga uye wokupedzesera, maambo uye magumo.
14 Anopfara aya anophadza macira awo e kureba, kuitira kuti agare no citenderhwa co kuenda ku miti ye upenyu uye kuitira kuti apinde mu thaundi nge pa misuwo yaro.
15 Kunzeyo kuno imbwa,* kuno aya anoita zve mudzimu,* anoita uhure,* anouraya, anonamata zvidhori, uye ese aya anoda zve kunyepa uye anoita zve kunyepa.’
16 “‘Inini Djesu, ndakatuma ngirozi yangu kuti iapase upupuri we zviro izvi, kuti zvibetsere ungano. Inini ndini nzinde uye mwana wa Dhavhidhi uye nyeredzi inonyetukira yo macibese.’”
17 Mwiya no mwanakadzi ari kuda kucata ari kubhuya kuti: “Uya!” uye uya anozwa ngaati: “Uya!” uya ano mukaha ngaauye; uya anoda ngaatore nyore mvura ye upenyu.
18 “Ndiri kuziisa* munhu wese anozwa masoko e uphorofita ari mu mupumburu uu kuti: Kana munhu akatunhudzira pa zviro izvi, Mwari acamutunhudzirirawo matambudziko akatarhwa mu mupumburu uu;
19 uye kana munhu akabvisa ciro cipi haco ce masoko ari mu mupumburu we uphorofita uu, Mwari acabvisawo dii rake pa zviro zvese zvakanaka zvakatarhwa mu mupumburu uu. Iyena aazomutenderi kurhya micero ye miti ye upenyu, uyewo kupinda mu thaundi cena.
20 “Uya ari kupasa upupuri we zviro izvi anoti: ‘Honde, ndiri kuuya nokukasika.’”
“Ameni! Uyai, Tenzi Djesu.”
21 Nyasha dza Tenzi Djesu ngadzigare no acena.
Masoko ari pasi
^ Onai Apendi. A5.
^ Kana kuti: “anothembeka.”
^ Onai Apendi. A5.
^ Kana kuti: “A na Z.” Arfa i bhii rokutanga uye Omega i bhii rokupedzesera pa mabhii e mureketero we Cigrego.
^ Kureya, anhu aya anoita zviro zvinopsverusa pamberi pa Mwari.
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Kana kuti: “ndiri kupasa upupuri.”
