Zvakapangidzwa kuna Juau 3:1-22
3 “Tarira ngirozi ye ungano iri mu Sardhi kuti: Izvi ndizvo zvinorekethwa na uya ano mwiya minomwe ya Mwari no nyeredzi nomwe: ‘Ndinoziya zviito zvako, uye ndinoziya muhambiro wako wekuita hinga uri mupenyu, asi wakafa.
2 Gara wakarinda, uye bambisa zviro zvasara zvainga zvaadhuze kuda kufa, ngokuti ndaona kuti auzi kunyasa kuita mabasa ako* pamberi pa Mwari wangu.
3 Hino rumbwa weciedzurira zvawakapaswa uye zvawakazwa, rumbwa wecizvicengeta, uye cinyuka. Ngokuti zvezvirokwazvo kana ukatama kumuka, ndicauya hinga mbavha, uye iwewe auzoizii nguwa yandicauya.
4 “‘Kunyazi zvakadaro, iwewe uno anhu anganani* ku Sardhi asikazi kusvipisa macira awo, uye awona anozohamba na inini akapfeka macira okucena, ngokuti akasisira.
5 Uya unowina unozogara akapfeka macira okucena, uye inini andizofudzi* zina rake mu bhuku re upenyu, asi ndinozotenda zina rake pamberi pa Baba angu uye pamberi pe ngirozi dzawo.
6 Uya ano nzee ngaazwe zvinorekethwa no mwiya ku ungano.’
7 “Tarira ngirozi ye ungano iri mu Firadhefiya kuti: Izvi ndizvo zvinorekethwa no uya wokuti ndi mucena, we zvirokwazvo, ano shavhi ya Dhavhidhi, uye paanofunungura apana anofunga uye paanofunga apana unofunungura:
8 ‘Ndinoziya zviito zvako. Ona! Ndakanda musuwo wakafununguka pamberi pako, wokuti apana anokwanisa kuufunga. Uye ndinoziya kuti auna simba rakawanda, wakacengeta soko rangu uye wakarumbwa wakagondeka mu zina rangu.
9 Ona! Ndicaita kuti aya e sinagoga ra Sathani, anonyepa eciti ndi Adjudha asi asiripi, auye koohwarara pamberi pe tsoka dzako uye ndoaita kuti aziye kuti inini ndinokuda.
10 Ngokuti wakacengeta soko rinocokuita no kushingirira kangu,* inini ndicakucengetawo pa nguwa ye kuedzwa kucauya pa nyika yese, kuti kuedze aya anogara pa nyika.
11 Ndiri kuuya nokukasika. Rumbwa wakabatisisa zvaunazvo, kuitira kuti pasaoneke munhu anokutorera korowa yako.
12 “‘Uya acawina ndicamuita kuti agare pirari yo tempro ya Mwari wangu, uye iyena ucarumbwa ari mairi. Uye ndicatara paari zina ra Mwari wangu uye zina re thaundi ra Mwari wangu, Djerusarema Ripsva, rinocita recibva kudenga kuna Mwari wangu, uye ndicatarawo zina rangu ripsva kamare.
13 Uya ano nzee ngaazwe zvinorekethwa no mwiya ku ungano.’
14 “Tarira ngirozi ye ungano iri mu Raodhiseya kuti: Izvi ndizvo zvinorekethwa na Ameni, mupupuri wakatendeka uye we zvirokwazvo, cisikwa cokutanga ca Mwari:
15 ‘Ndinoziya zviito zvako, uye ndinoziya kuti iwewe autonhori kana kupisa. Inini ndaida kuti iwewe utonhore kana kuti upise.
16 Hino ngokuti iwewe uri kudziya, auripi kupisa kana kutonhora, ndicakurutsa.
17 Nge ndaa yekuti iwewe unobhuya kuti: “Ndiri mupfumi, ndino zviro zvakawanda uye apana candinoda,” asi auzii kuti uri kutambudzika, unopasisa usisi, uri murombo, uri bofu, auzi kupfeka,
18 ndinokupasa zano rokuti utenge na inini oro yakanaka painonga yapiswa no muriro kuti ugare mupfumi, wotengazve macira okucena upfeke kuti usaoneke mitu, pedzepo wotenga mutombo we madziso kuti ukwanise kuona.
19 “‘Ese andinoda, ndinoasumurura uye ndinoapangira. Hino, peta masimba uye cinyuka pa zvitema zvako.
20 Izwai! Inini ndakaima pa musuwo uye ndiri kugogodza. Kana munhu akazwa izwi rangu ofunungura musuwo, ndicapinda mumba make, ndorarira naye uye iyena ucararira na inini.
21 Uya acawina ndicamuita kuti agare na inini pa cigaro cangu ce umambo, kuitawo hingana inini ndakawina uye ndogara na Baba angu pa cigaro cawo ce umambo.
22 Uya ano nzee ngaazwe zvinorekethwa no mwiya ku ungano.’”
Masoko ari pasi
^ Kana kuti: “auzi kukwanisa kupedza kuita mabasa ako.”
^ Cigrego: “mazina manganani.”
^ Kana Kuti: “andizobvisi.”
^ Mabhaibheri amweni anoti: “wakateedzera muezaniso wangu we kushingirira.”
