Zvakapangidzwa kuna Juau 4:1-11
4 Mumasure mazvo, ndakaona musuwo we kudenga wakafununguka, uye izwi randakatanga kuzwa recireketa na inini raiita hingana kurira ke tropito, irona rakati: “Kwira kuno, uye ndicakupangidza zviro zvinodikana kuitika.”
2 Mumasure mazvo, nokukasika ndakagara mu simba ro mwiya, uye ndakaona cigaro ce umambo kudenga, uye painga pano munhu wakagara pa cigaro icona.
3 Uya ainga akagara ipona ainga akaita hingana buwe ro jaspe no sardhiyo,* uye mu muceto me cigaro ce umambo, mainga muno muraraungu* wainga wakaita hingana esmerardha.
4 Mu muceto mo cigaro ce umambo icona, mainga muno zvigaro zve umambo zvinokwana 24, uye pa zvigaro zve umambo izvona painga pano akuru anokwana 24 akagara pazviri, akapfeka macira okucena, uye mu musoro mawo mainga muno korowa ye oro.
5 Pa cigaro ce umambo icona paicetuka hingana mheni, paizwika maizwi uye paitinhira; painga pano makandiyero manomwe aibaka muriro pamberi pe cigaro ce umambo, uye makandiyero awona anoimirira mwiya minomwe ya Mwari.
6 Pamberi pe cigaro ce umambo icona, painga pano ciro cakaita hingana bahari ro vhidru, rainyetukira hingana kristari.
Pakati pe cigaro ce umambo icona uye no mu muceto-ceto maco, mainga muno zvisikwa zvirongomuna zvipenyu zvakadzara no madziso mberi no sure.
7 Cisikwa cokutanga cipenyu cainga cakaita hingana mhondoro, cisikwa cocipiri cipenyu cainga cakaita hingana mwana we n’ombe, cisikwa cocitatu cipenyu cainga cino hope yakaita hingana yo munhu, uye cisikwa cocirongomuna cipenyu cainga cakaita hingana godzi riri kumburuka.
8 Pa zvisikwa zvirongomuna izvi zvipenyu, cimwe na cimwe cainga cino mabaphiro matanhatu, ekuti ainga akadzara no madziso mu muceto mawo no pasi pawo, uye usiku no masikati zvaindoreketa kuti: “Mucena, mucena, mucena ndi Djehovha,* Mwari we Masimba Ese, uya aripo, ainga aripo uye acauya.”
9 Pese paya pekuti zvisikwa zvipenyu zvinopasa rukudzo, rureremedzo uye kutenda kuno Uya akagara pa cigaro ce umambo, Uya anorarama nokusikaperi,
10 akuru anokwana 24 anohwarara pamberi pe Uya akagara pa cigaro ce umambo, anonamata Uya anorarama nokusikaperi uye anokanda korowa dzawo pamberi pe cigaro ce umambo eciti:
11 “Djehovha* Mwari wedu, makasisira kuti mutambire kukudzwa, kureremedzwa, uye simba, ngokuti makasika zviro zvese, uye nge kuda kenyu zviripo uye zvakasikwa.”
Masoko ari pasi
^ Buwe rinokosha rokupsvuka.
^ Kana kuti: “arko iriji.”
^ Onai Apendi. A5.
^ Onai Apendi. A5.