Zvakapangidzwa kuna Juau 6:1-17
-
Bira rinofunungura zvinamiro zvitanhatu zvokutanga (1-17)
-
Muhambisi we kavharo yokucena unowina (1, 2)
-
Muhambisi we kavharo yo kori yo muriro unobvisa runyararo (3, 4)
-
Muhambisi we kavharo yokusvipa unounzisa nzara (5, 6)
-
Muhambisi we kavharo yakaceneruka unodainzwa kuti Rufu (7, 8)
-
Akauraiwa anooneka ari pasi po artari (9-11)
-
Cigidhi-gidhi cakakura (12-17)
-
6 Ndakaona Bira parakafunungura cinamiro cokutanga pa zvinamiro zvinomwe, uye ndakazwa izwi re cimwe ce zvisikwa zvirongomuna zvipenyu cecibhuya no izwi rakaita hingana ro mheni kuti: “Uya!”
2 Uye ndakaona kavharo yokucena. Wainga akaipakira wainga akabata uta; wakapaswa korowa, uye wakabuda eciwina kuti adzadzise kuwina kake.
3 Parakafunungura cinamiro cocipiri, ndakazwa izwi re cisikwa cipenyu cocipiri cecibhuya kuti: “Uya!”
4 Uye pakabuda kavharo imweni yainga ino kori yakaita hinga muriro. Uya wainga akaipakira, wakatenderhwa kubvisa runyararo pa nyika kuitira kuti anhu aurayane, uye wakapaswa supada huru.
5 Parakafunungura cinamiro cocitatu, ndakazwa izwi re cisikwa cipenyu cocitatu ceciti: “Uya!” Uye ndakaona kavharo yokusvipa. Uya wainga akaipakira wainga ano mupimo mu nyara dzake.
6 Ndakazwa izwi pakati pe zvisikwa zvirongomuna zvipenyu reciti: “Ritru* rimwe ro trigu inotengwa no dhenariyo* rimwe, uye kiru nhatu dzo sevhadha dzinotengwa no dhenariyo rimwe; usashaishe kuseenzesa zvakanaka mafuta e miorivhi uye vhinyu.”
7 Parakafunungura cinamiro cocirongomuna, ndakazwa izwi re cisikwa cocirongomuna cipenyu ceciti: “Uya!”
8 Ndakaona kavharo yakaceneruka. Uya wainga akaipakira wainga ano zina rekuti Rufu, uye Guwa* raimuteera nge padhuze. Wakapaswa simba pa dii rimwe basi re matii marongomuna e nyika, kuti auraye no supada yakareba, no nzara, no nhenda inouraya uye no zvikara zve nyika.
9 Parakafunungura cinamiro cocishanu, ndakaona pasi po artari pano ngazi yo aya akauraiwa nge ndaa yo soko ra Mwari uye nge ndaa ye upupuri waakapasa.
10 Awona aidainzira no izwi guru eciti: “Cangamire Tenzi, mucena uye we zvirokwazvo, mucarumbwa mecisiya kutonga anhu e pa nyika dakara riini uye motama kuahwirinzira nge ndaa ye kuuraya kaakatiita?”
11 Uye umwe na umwe wawo wakapaswa djira rokureba rokucena, uye akabvunzwa kuti azorore padoko, dakara numero yo arandadoni awo uye yo hama dzainga dzooda kuuraiwa hinga zvaakaizwa, yakwana.
12 Ndakaona recifunungura cinamiro cocitanhatu. Pakaitika cigidhi-gidhi cakakura uye zuwa rakasvipa hinga djira ro mariro,* mwedzi wese wakapsvuka hingana ngazi,
13 uye nyeredzi dze kudenga dzakambwerera pa nyika, hinga kumbwera kunoita maonde maishi, muonde paunozunguniswa no mhepo ino simba.
14 Denga rakabuda pa mbuto paro hinga mupumburu uri kupethwa uye matunhu no zvitsuwa zvese zvakabviswa pa mbuto yazvo.
15 Hino madzimambo e nyika, akuru, atungamiriri e anyahondo, apfumi, anhu ano simba, aranda ese, no anhu akasununguka akafindara mu mapako uye pakati pe mapuwe e mu matunhu.
16 Aibvunza matunhu no mapuwe kuti: “Timbwererei kuti tisaoneke no Uya akagara pa cigaro ce umambo uye pa shungu dzo Bira,
17 ngokuti zuwa guru ro shungu dzawo raguma, uye ndiani angakwanisa kuima pamberi pawo?”
Masoko ari pasi
^ Kana kuti: “Keniji.” Onai Apendi. B14.
^ Mare yo ku Roma ye prata yaitambirhwa no munhu paaiseenza zuwa rimwe. Onai Apendi. B14.
^ “Kana kuti: “Hadhesi,” kureya guwa rinokandwa anhu ese. Onai pakazwi Kupanganidzwa ke Masoko.
^ Pamweni zvingada kureya dehwe ro mbudzi.
