Zvakapangidzwa kuna Juau 7:1-17
7 Mumasure mazvo, ndakaona ngirozi mirongomuna dzakaima mu matii marongomuna e nyika, dzakanyasa kubata mhepo yo matii marongomuna e nyika, kuti patame kuvhuvhuta mhepo pa nyika, kana mu bahari, kana pa muti upi hawo.
2 Uye ndakaona ngirozi imweni yecikwidza kubva kumabvazuwa, ino cidhindo* ca Mwari mupenyu; uye iyona yakadainzira no izwi guru ku ngirozi mirongomuna dzainga dzatenderhwa kuti dzikuwadze nyika uye bahari,
3 yeciti: “Musakuwadze nyika, kana bahari, kana miti, dakara takanda cidhindo pa huma dze aranda a Mwari wedu.”
4 Hino ndakazwa numero yo aya akakandwa cidhindo anokwana kuita 144 000, akabva mu madzinza ese e ana e Israeri:
5 Mu dzinza ra Djudha makakandwa cidhindo anhu anokwana 12 000;mu dzinza ra Rubheni 12 000;mu dzinza ra Gadhi 12 000;
6 mu dzinza ra Azeri 12 000;mu dzinza ra Nafitari 12 000;mu dzanza ra Manase 12 000;
7 mu dzinza ra Simioni 12 000;mu dzinza ra Revhi 12 000;mu dzinza ra Isakari 12 000;
8 mu dzinza ra Zebhuroni 12 000;mu dzinza ra Zuzee 12 000;mu dzinza ra Bhenjamii 12 000 akakandwa cidhindo.
9 Mumasure mazvo, ndakaona anhu akawanda maningi asikaerengeki, aibva mu nyika dzese, mu madzinza ese, anhu uye mireketero, akaima pamberi pe cigaro ce umambo uye pamberi po Bira, akapfeka macira akareba ekucena; uye akabatira nhai dze micindwe mu nyara dzawo.
10 Awona aidainzira no izwi guru eciti: “Ruponeso redu rinobva kuna Mwari wedu, akagara pa cigaro ce umambo uye ku Bira.”
11 Ngirozi dzese dzainga dzakaima dzakatenderedza cigaro ce umambo, akuru uye zvisikwa zvirongomuna zvipenyu; idzona dzakahwarara pamberi pe cigaro ce umambo uye dzakanamata Mwari,
12 dzeciti: “Ameni! Kusimbwa, kukudzwa, ungwaru, kutendhwa, kureremedzwa, masimba, uye simba ngazvigare na Mwari wedu nokusikaperi. Ameni.”
13 Umwe we akuru akandibvunzisa kuti: “Kodi anhu aya akapfeka macira akareba e kucena ndiani uye ari kubva kupi?”
14 Asi inini ndakamudaira kuti: “Tenzi wangu, imwimwi ndimwi munozviziya.” Iyena akandibvunza kuti: “Aya ndiwo anobuda mu kutambudzika kukuru, akaphadza macira awo akareba, uye akadzicenesa eciseenzesa ngazi yo Bira.
15 Ndiyo ndaa ari pamberi pe cigaro ce umambo ca Mwari, uye anomuitira basa rakacena usiku no masikati mu tempro yake; Uya akagara pa cigaro ce umambo acatambaradza tenda yake pamusoro pawo.
16 Aazozwizve nzara kana kuzwa mukaha, uyewo aazopiswi no zuwa kana ciro cipi haco cinopisa maningi,
17 ngokuti Bira, rekuti riri padhuze pe cigaro ce umambo,* ricaausha uye ricaaendesa ku mvura ye upenyu. Uye Mwari acapukuta misodzi yese pa madziso awo.”
