Zviito zve Aphostori 1:1-26
1 Mu bhuku randakatanga kukutarira, Teofiro, ndakatara zviro zvese zvakatanga kuizwa no kufundiswa na Djesu,
2 dakara zuwa raakatorhwa kuenda kudenga, mumasure me kupasa nhungamiriro eciseenzesa mwiya mucena ku aphostori aainga akasanangura.
3 Mumasure me kutambudzika, akadzipangidza kaari eciseenzesa upupuri unogutsa kuti iyena ainga ari mupenyu. Awona akamuona ke mazuwa 40, uye iyena akareketa ngezve Umambo wa Mwari.
4 Paainga akaungana nawo, akaabvunza kuti: “Musabude mu Djerusarema, asi rumbwai mecietsera zvakagondeswa na Baba, maererano no zvandakamubvunzai;
5 ngokuti Juau wakabhabhatidza no mvura, asi imwimwi mucabhabhatidzwa no mwiya mucena mukati me mazuwa manganani.”
6 Hino, paainga akaungana, awona akamubvunzisa kuti: “Tenzi, mucahwirinza zvino here umambo kuna Israeri?”
7 Iyena akaabvunza kuti: “Amutenderhwi kuziya nguwa no mwaka wakagadzwa na Baba pasi pe utongi wawo.
8 Asi mwiya mucena paucauya pamuri, mucatambira simba, uye mucagara apupuri angu mu Djerusarema, mu Djudhiya mwese no mu Samariya, uye dakara ku mbuto dziri kure dze nyika.”
9 Mumasure me kureketa izvi, iyena akatorhwa oenda kudenga paainga ecimuringira, uye gore rakamufukidza zvokuti ainga asikacakwanisi kumuona.
10 Uye paainga ecinyasa kuringira kudenga pa nguwa yokuti iyena ainga ecienda, ciriporipoco pakaoneka anarume airi ku dii rawo ainga akapfeka macira ekucena
11 uye akaabvunza kuti: “Anarume e ku Garireya, ngei makaima ipona meciringira kudenga? Djesu uu abviswa pakati penyu oendeswa kudenga, acauya ngo mushobo umwewo wamamuona ecienda kudenga.”
12 Hino awona akahwirira ku Djerusarema, ecibuda ku dunhu rinozwi Dunhu re Miorivhi, riri dhuze no Djerusarema ku mukuwo ungakwana kuita kirometro imwe.
13 Paakaguma, akakwira mu nyumba yo pamusoro maaigara. Imona mainga muna Pedru na Juau, Tiyago na Andreya, Firipi na Tomaji, Bhartoromeu na Mateu, Tiyago mwana wa Arfeu, Simoni anoshingaira, uye Djudhasi, mwana wa Tiyago.
14 Ese awona airumbwa ecinamata no cinangwa cimwe basi, pamwepo no anakadzi anganani, kutobatanidzawo Mariya mai a Djesu, no hama dzake.
15 Mumazuwa awona, Pedru wakamuka pakati pe hama (anhu ainga aripo aikwana kuita 120) uye wakati:
16 “Hama, zvaidikana kuti Matarhwa adzadzike akarekethwa no mwiya mucena weciita kuti Dhavhidhi aphorofite ngo pamusoro pa Djudhasi, uya wakatungamirira anhu akasunga Djesu.
17 Iyena wainga ari umwe wedu uye wainga wakasanangurhwawo kuti aite basa iri.
18 (Mwanarume uu wakatenga munda no mare yo ushaishi, uye paakambwera no musoro, mwiri wake wakaputika* uye matumbu ake ese akapera kubuda kunza.
19 Agari ese e mu Djerusarema akaziya nge zvazvo, zvokuti munda uwona mu mureketero wawo wakadainzwa kuti Akeridhama, zvinoreya kuti, “Munda we Ngazi.”)
20 Ngokuti zvakatarhwa mu bhuku re Mapisarema kuti: ‘Mbuto yake ye kugara ngaigare mathuku, uye ngaisagare anhu,’ uyewo kuti: ‘Munhu umweni ngaatore basa rake re muonereri.’
21 Hino zvinodiikanwa kuti umwe we anarume aihamba na isusu pa nguwa yese yekuti Tenzi Djesu akaita mabasa ake* pakati pedu,
22 (kubvira paakabhabhatidzwa na Juau dakara pa zuwa raakatorhwa pakati pedu kuenda kudenga) agare mupupuri na isusu pa rumuko rake.”
23 Ngokudaro, akasanangura airi, Zuzee unozwi Bharsabha, waiziikanwawo kuti Justu, uye Matiya.
24 Pedzepo akanamata eciti: “Haiwa Djehovha,* imwimwi munoziya mwoyo ye anhu ese, pangidzai kuti pa anarume airi aya ndiani wamasanangura
25 kuti atambire basa iri no ubaba we uphostori, zvakasiiwa na Djudhasi woenda kake ega.”
26 Ngokudaro, akakhandira midjenya kuti asanangure pa airi aya, uye mudjenya wakambwera pana Matiya, uye iyena wakabatanidzwa no aphostori 11.
Masoko ari pasi
^ Kana kuti: “wakaguka no pakati.”
^ Cigrego: “paaipinda no kubuda.”
^ Onai pakazwi Kupanganidzwa ke Masoko.
