Zviito zve Aphostori 10:1-48
10 Ku Sezareya kainga kuno mwanarume umweni waizwi Korneriyo, mukuru-mukuru* we masurudado, we cikwata caidainzwa kuti cikwata co Itariya.*
2 Iyena waidzipira kuna Mwari uye wainamata Mwari pamwepo no mhuri yake, waibetsera maningi arombo,* uye wairumbwa eciita minamato ye kudeketera kuna Mwari.
3 Kuma 15 dzo masikati,* iyena wakanyasa kuona mu ciono ngirozi ya Mwari yeciguma kaari uye yeciti: “Korneriyo!”
4 Ecithya, Korneriyo wakanyasa kuiringira, uye wakabvunzisa kuti: “Tenzi, munoda kuti ndiitei?” Iyona yakadaira kuti: “Minamato yako uye rubetso raunopasa arombo zvaguma kuna Mwari hinga ciedzuriro.
5 Hino, tumira zvino anarume ku Jope kuti aende kootora mwanarume unozwi Simoni, unozwiwo Pedru.
6 Mwanarume iyena ari pa nyumba ya Simoni, unoita basa re kupara matehwe, iyena ano nyumba iri pa dhuze no bahari.”
7 Mumasure mekuti ngirozi yaireketa naye yaenda, iyena wakadainza pakati pe aseenzi ake aseenzi airi, uye no musurudado umwe waidzipira kuna Mwari,
8 akaabvunza zvese uye akaatumira ku Jope.
9 Pa zuwa rakazoteera, paainga eciita rhwendo uye paainga aadhuze no thaundi, Pedru wakakwira mu nyumba ye kumusoro kuti aite munamato, dzainga dzaakuita 12 dzo masikati.*
10 Asi iyena wakazwa nzara maningi uye waida kurhya. Paainga ecigadzirira zvokurhya, iyena wakatanga kuona ciono;
11 iyena wakaona denga rakafunguka uye ciro cakaita hinga djira rakakura recicita pa nyika uye rakasungwa ku matii aro marongomuna;
12 iyena wakaona mishobo yese ye zvinyama zvino mirenje mirongomuna, zvinyama zvinohamba zvecipsveremenda uye mishobo yese ye shiri dze kudenga.
13 Hino wakazwa izwi recimubvunza kuti: “Pedru, purumuka, uuraye uye urhye!”
14 Asi Pedru wakadaira kuti: “Haiwa Tenzi, azviiti, ngokuti andisati ndakamborhya ciro cakasvipa kana cisikazi kucena.”
15 Uye izwiro rakabhuyazve naye kecipiri reciti: “Ima kudainza zviro zvakaceneswa na Mwari kuti zvakasvipa.”
16 Izvona zvakaitikazve kecitatu, uye nokukasika djirero rakatorhwa roendeswa kudenga.
17 Pedru wainga acakashamisika, ecidzibvunzisa kuti zvaainga aona pa ciono zvaida kureyei. Pa nguwa iyona, anarume ainga atumwa na Korneriyo akabvunzisa kuti ndi papi pa nyumba pa Simoni uye akaima pa musuwo.
18 Awona akadainzira uye akabvunzisa kuti Simoni, anoziikanwa kuti Pedru, ainga ari ipona here.
19 Pedru wainga aciri kurangarira ngezve ciono, paakabvunzwa no mwiya kuti: “Izwa! Pano anarume atatu ari kukupsvaka.
20 Muka uye enda nawo, audikani kukana-kana, ngokuti ndini ndaatuma.”
21 Ngokudaro, Pedru wakacita uye wakaenda koosongana no anarumewo uye wakati: “Ndiri pano, ndini wamuri kupsvaka. Muri kundipsvakirei?”
22 Akamubvunza kuti: Korneriyo, mukuru-mukuru we masurudado, mwanarume munatsi uye anothya Mwari, wekuti Adjudha ese anoreketa zvakanaka nge zvake, wakatambira nhungamiriro dzecibva kuna Mwari peciseenzeswa ngirozi kuti amudainzei kuti muende kumba kake, kuitira kuti azwe zvamunoda kumubvunza.”
23 Hino Pedru wakaatambira uye wakaabvunza kuti apinde mumba.
Pa zuwa rakazoteera, iyena wakamuka uye wakaenda nawo, uye hama dzinganani dzo ku Jope dzakamuperekedza.
24 Pa zuwa rimweni, iyena wakapinda mu Sezareya. Korneriyo wainga eciaetsera uye wainga akaunganidza anyaukama ake uye no shamwari dzake dzo padhuze.
25 Pedru paakapinda, Korneriyo wakaenda kaari, wakagodama pa tsoka dzake, uye wakamuhwararira.
26 Asi Pedru wakamupurumutsa eciti: “Purumuka, inini ndiri munhuwo hinga iwewe.”
27 Paainga ecicedza naye, akapinda uye akagumira anhu akawanda akaungana.
28 Iyena wakaabvunza kuti: “Imwimwi munonyasa kuziya kuti zvinorambidzwa kuti Mudjudha ashamwaridzane no munhu we dzinza rimweni, asi Mwari andipangidza kuti andidikani kudainza munhu upi hake kuti akasvipa kana kuti aazi kucena.
29 Ndiyo ndaa, ndauya ndisikakani-kani pandadainzwa. Asi zvino ndiri kuda kuziya kuti mandidainzirei.”
30 Korneriyo wakadaira kuti: “Mazuwa marongomuna adarika, inini ndainga ndecinamata pa nyumba pangu, pa nguwa ino kamare, 15 dzo masikati;* uye ndakaona mwanarume umweni mberi kangu wainga akapfeka macira ainyetukira;
31 iyena wakati: ‘Korneriyo, munamato wako wazika, uye rubetso raunopasa arombo raedzurirhwa pamberi pa Mwari.
32 Hino tuma munhu kuti aende ku Jope kuti adainze Simoni, unozwiwo Pedru. Iyena ari pa nyumba ya Simoni, unoita basa re kupara matehwe, nyumba yake iri dhuze no bahari.’
33 Hino ciriporipoco ndakaita kuti mudainzwe, uye imwimwi maita zvakanaka ngo kuuya kuno. Zvino tese tiri pano pamberi pa Mwari kuti tizwe zviro zvese zvamabvunzwa na Djehovha* kuti mubhuye.”
34 Ngokudaro, Pedru wakatanga kureketa, uye wakati: “Zvino ndaakunyasa kuzwisisa kuti Mwari aasananguri,
35 asi ku madzinza ese, iyena anotendera uya anomuthya uye anoita zvakanaka.
36 Iyena akatumira soko rake ku ana e Israeri eciziisa masoko akanaka e runyararo peciseenzeswa Djesu Kristu, uu ndiye Tenzi we anhu ese.
37 Imwimwi munoziya nyaya yairekethwa ku Djudhiya yese, kubvira ku Garireya, mumasure me rubhabhatidzo rakaparidzwa na Juau:
38 Inocokuita na Djesu we ku Nazareta, wakadzodzwa na Mwari no mwiya mucena uye simba; iyena akahamba ku mitanha yese eciita zvakanaka uye eciporesa anhu ese aitambudzwa na Dhiyabhurosi, ngokuti Mwari ainga ari naye.
39 Uye isusu tiri apupuri e zviro zvese izvi zvaakaita mu nyika ye Adjudha kutobatanidzawo mu Djerusarema; asi awona akamuuraya nge kumuturika pa mutanda.*
40 Mwari akamumutsa pa zuwa rocitatu uye akaita kuti iyena aoneke,
41 haiwa ku anhu ese, asi ku apupuri akasanangurhwa na Mwari pacino nguwa, isusu, ekuti takarhya uye kumwa naye mumasure me kumutswa kubva ku akafa.
42 Uyezve, iyena akatipasa mutemo kuti tiparidzire anhu uye tipase upupuri wakakwana wekuti iyena ndiye akasanangurhwa na Mwari kuti agare mutongi we apenyu no akafa.
43 Aphorofita ese anopupurira nge zvake kuti, wese uya anopangidza kutenda maari anorekererhwa zvitema zvake peciseenzeswa zina rake.”
44 Pedru paainga ecireketa zviro izvi, mwiya mucena wakauya pa anhu ese ainga ecizwa soko.
45 Uye atendi* akaizwa ucekeri ainga auya na Pedru akashamisika, ngokuti cipo ce mwiya mucena cainga cecidururhwawo ku anhu e madzinza amweni.
46 Ngokuti awona akaazwa ecireketa mireketero yakasiyana-siyana uye ecikudza Mwari. Ngokudaro, Pedru wakati:
47 “Anhu aya atambira mwiya mucena hinga isusu; pano munhu here angaanyima mvura, oapingaidza kuti asabhabhatidzwe?”
48 Hino iyena wakaita kuti awona abhabhatidzwe mu zina ra Djesu Kristu. Uye awona akamukumbira kuti agare ipona mazuwa manganani.
Masoko ari pasi
^ Kana kuti: “mutungamiriri waitungamirira masurudado 100.”
^ Uu wainga uri mubatanidzwa we anyahondo e Roma waiumbwa no masurudado 600.
^ Kana kuti: “waiita zvipo zvakawanda zve usisi.” Onai pakazwi Kupanganidzwa ke Masoko, “Zvipo zve usisi.”
^ Cigrego: nguwa yocipfembamwe ye zuwa.
^ Cigrego: nguwa yocitanhatu.
^ Cigrego: nguwa yocipfembamwe ye zuwa.
^ Onai pakazwi Kupanganidzwa ke Masoko.
^ Kana kuti: “muti.”
^ Kana kuti: “akatendeka.”
