Zviito zve Aphostori 11:1-30
11 Hino aphostori no hama dzimweni dzainga dziri ku Djudhiya, akazwa kuti anhu e madzinza amweni ainga atendawo soko ra Mwari.
2 Ngokudaro, Pedru paakahwirira ku Djerusarema, aya ainga ecitsigira ucekeri akatanga kumushora,*
3 eciti: “Iwewe wakapinda mumba me anhu asikazi kuizwa ucekeri uye wakarhya nawo.”
4 Ngokudaro, Pedru wakatanga kuapanganidzira zvese zvainga zvaitika, eciti:
5 “Inini ndainga ndiri ku thaundi re Jope ndeciita munamato, uye mu ciono, ndakaona ciro cakaita hingana djira rakakura recicita kubva kudenga, rakasungwa ku matii aro marongomuna uye irona rakauya dhuze no pandainga ndiri.
6 Ndakanyasa kuriringira, uye ndakaona zvinyama zvino mirenje mirongomuna zve pa nyika, zvinyama zve mushango, zvinyama zvinopsveremenda, uye shiri dze kudenga.
7 Uyezve, ndakazwa izwi recindibvunza kuti: ‘Pedru, purumuka, uuraye uye urhye!’
8 Asi inini ndakati: ‘Haiwa Tenzi, azviiti, ngokuti andisati ndakamborhya ciro cakasvipa kana kuti cisikazi kucena.’
9 Izwi rakabva kudenga rakandibvunzazve kecipiri kuti: ‘Ima kudainza zviro zvakaceneswa na Mwari kuti zvakasvipa.’
10 Izvi zvakaitikazve kecitatu, uye zvese zvakakweiwa zvoendeswa kudenga.
11 Kusiya izvona, pa nguwa iyona kamare anarume atatu ainga atumwa kubva ku Sezareya kuti andipsvake, akaguma pa nyumba yatainga tiri.
12 Hino mwiya wakandibvunza kuti ndiende koosongana nawo ndisikakani-kani. Hama idzi 6 dzakaendawo na inini, uye isusu takapinda mumba me mwanarumewo.
13 “Iyena wakatipanganidzira kuti wakaona ngirozi yakauya pa nyumba pake uye yomubvunza kuti: ‘Tumira anarume kuti aende ku Jope koodainza Simoni, unozwiwo Pedru,
14 uye iyena acakubvunza zviro zvicaponesa iwewe no ese e pa nyumba pako.’
15 Pandakatanga kureketa, mwiya mucena wakauya paari, hinga zvakaitikawo na isusu pakutanga.
16 Ngokudaro, inini ndakaedzurira masoko a Tenzi, paaibhuya kuti: ‘Juau wakabhabhatidza no mvura, asi imwimwi mucabhabhatidzwa no mwiya mucena.’
17 Hino kana Mwari akaapasa cipo caakapasa isusu, ekuti tinotenda muna Tenzi Djesu Kristu, ndiri ani inini kuti ndipingaidze Mwari?”*
18 Paakazwa izvi, awona akagutsikana,* uye akakudza Mwari eciti: “Hino Mwari apasawo anhu e madzinza amweni mukana we kucinyuka kuti aone upenyu.”
19 Anhu aya ainga akabarariswa nge ndaa ye kuteererhwa kakaoneka nge ndaa ya Estevha, akaguma ku Fenisiya, Shipre uye Antiyokiya, asi aireketa ngezve soko ku Adjudha basi.
20 Asi, anarume anganani pakati pawo e ku Shipre uye e ku Sirene akaenda ku Antiyokiya uye akatanga kureketa no anhu mu mureketero we Cigrego, eciziisa masoko akanaka a Tenzi Djesu.
21 Uye nyara ya Djehovha* yainga inawo; akawanda akagara atendi uye akatendeuka muna Tenzi.
22 Masoko anocokuita nawo akaguma ku ungano ye Djerusarema, hino akatumira Bharnabhee ku Antiyokiya.
23 Iyena paakaguma uye oona nyasha dza Mwari, wakapfara maningi uye wakatanga kubambisa ese kuti arumbwe ari muna Tenzi no mwoyo wese;
24 ngokuti wainga ari munhu wakanaka, wakadzara no mwiya mucena uye no kutenda. Uye anhu akawanda akatanga kutenda muna Tenzi.
25 Hino iyena wakaenda ku Tarso kuti anyase kupsvaka Sauro.
26 Mumasure me kumuona, akaenda naye ku Antiyokiya. Ngokudaro, ke gore rimwe romutero akaungana no ungano uye akafundisa anhu akawanda, uye ecitungamirirhwa na Mwari, mu Antiyokiya ndimo makatanga kudainzwa afundi kuti Akristu.
27 Mu mazuwa awona, aphorofita anganani akateredza kubva ku Djerusarema kuenda ku Antiyokiya.
28 Umwe wawo waizwi Agabho, wakapurumuka uye wakaphorofita eciseenzeswa no mwiya mucena, kuti kaizoitika nzara yakakura mu nyika yese. Izvona zvakaitikadi kamare mu nguwa ya Karaudhiyo.
29 Ngokudaro, afundi akaita cisananguro cekuti umwe na umwe maererano no zvaaikwanisa, atumire rubetso ku hama dzaigara ku Djudhiya;
30 uye ndizvo zvaakaita, awona akazvitumira ku akuru eciseenzesa Bharnabhee na Sauro.
Masoko ari pasi
^ Kana kuti: “kumureketera.”
^ Kana kuti: “ndiphikisane na Mwari.”
^ Cigrego: “aazi kureketazve ciro.”
^ Onai Apendi. A5.
