Zviito zve Aphostori 12:1-25
12 Mu mazuwa awona, mambo Herodhi wakatanga kutambudza anhu anganani e mu ungano.
2 Iyena wakauraisa Tiyago hama ya Juau nge supada.
3 Paakaona kuti izvi zvaipfadza Adjudha, wakasungawo Pedru. (Izvi zvakaitika mu mazuwa e Mutambo we Pau Dzisina Mbiriso.)
4 Iyena wakamusunga womukanda mu kadheya, uye wakaita kuti arindwe no zvikwata zvirongomuna zve masurudado aiita zvokucinjana, cikwata cimwe na cimwe cainga cino masurudado marongomuna; iyena wakazviita kuitira kuti azomubudise* pamberi pe anhu mumasure me Paskwa.
5 Ngokudaro, Pedru wakakandwa mu kadheya, asi ungano yaimuitira munamato kuna Mwari no mwoyo wese.
6 Herodhi wainga ecida kuunzisa Pedru pamberi pe anhu; pa usiku iwona, Pedru wainga eciwata akasungwa no makorenti mairi pakati pe masurudado mairi, uye pa musuwo painga pano arindi ainga ecirinda kadheya.
7 Asi ciriporipoco, ngirozi ya Djehovha* yakauya, uye mu karaboso makadjeka. Iyona yakapsvasa pa dii pa Pedru, uye yakamumutsa yeciti: “Purumuka nokukasika!” Uye makorenti ainga akasunga nyara dzake akambwera.
8 Ngirozi yakamubvunza kuti: “Pfeka macira no masandarya ako.” Uye Pedru wakazviita. Iyona yakazomubvunza kuti: “Pfeka djira rako rokunza, uye nditeere.”
9 Hino iyena wakabuda uye wakaiteera, asi wainga asikazvizii kuti zviya zvaiitika peciseenzeswa ngirozi, zvaiitikadi kamare. Zvezvirokwazvo, iyena waitorangarira kuti cainga ciri ciono.
10 Akapinda painga pano arindi ekutanga, ecipiri, uye akaguma pa musuwo we simbi unoenda ku thaundi. Musuwoo wakafunguka woga. Mumasure me kubuda, akahamba nge gwanza rimweni, uye ngirozi yakangara-ngara.
11 Pedru paakazozvibata zvainga zveciitika, wakati: “Zvino ndaakunyasa kuzviziya kuti Djehovha* atuma ngirozi yake kuti indiponese mu nyara dza Herodhi uye pa zvese zviya zvainga zvecietserhwa no Adjudha.”
12 Mumasure me kuzvizwisisa, iyena wakaenda kumba ka Mariya, mai a Juau, waiziikanwa kuti Marko, ikona kainga kuno akawanda akaungana ecinamata.
13 Paakagogodza musuwo we kupinda pa ruwanze, museenzi umweni wo mwanakadzi unozwi Rodha wakaenda koona kuti ndiani wagogodza musuwo.
14 Paakaziya kuti rainga riri izwi ra Pedru, iyena wakapfara maningi zvokuti aazi kufungura musuwo, asi wakagogoma wopinda mukati uye wakabvunza anhu ainga ari imona kuti Pedru wainga ari pa musuwo we kupinda pa ruwanze.
15 Akamubvunza kuti: “Iwewe uri kupenga.” Asi iyena wakarumbwa ecibhuya kuti izvirokwazvo. Uye awona aiti: “I ngirozi yake.”
16 Asi Pedru wakarumbwa ecigogodza musuwo. Paakafungura, akamuona uye akashamisika maningi.
17 Asi Pedru wakaanyararisa eciseenzesa nyara yake, iyena wakanyasa kuapanganidzira kuti Djehovha* akamubudisa kudini mu kadheya, uye wakaabvunza kuti: “Bvunzai zviro izvi Tiyago no hama dzimweni.” Mumasure mazvo, iyena wakaenda ku mbuto imweni.
18 Pakainga kaedza, masurudado akatanga kureketedzana uye aibvunzisana kuti cinyi cainga caitika na Pedru.
19 Herodhi wakanyasa kumupsvaka, asi ngokuti aazi kumuona, wakabvunzisa arindi uye wakaita kuti aphanicwe; mumasure mazvo, iyena wakateredza kubva ku Djudhiya woenda ku Sezareya uye wakagareyo ke mazuwa manganani.
20 Herodhi wakanyangadzwira* anhu e Tiro no Sidhoni. Awona akapangana oenda kaari, uye mumasure me kucedza na Brasto, mutungamiriri we nyumba ya mambo* uye oita kuti iyena agutsikane, akakumbira kuti agarisane mu runyararo, ngokuti mu nyika ya mambo ndimo maibva zvokurhya zvawo.
21 Pa zuwa rimweni, Herodhi wakapfeka macira e umambo, wogara pa tribhunari uye wakatanga kuita mharidzo ku anhu ese.
22 Hino anhu ainga akaungana akatanga kukhuwa eciti: “Iri i izwi ra mwari, haiwa ro munhu!”
23 Ciriporipoco, ngirozi ya Djehovha* yakamukuwadza, ngokuti iyena aazi kukudza Mwari, uye iyena wakarhyiwa no honye, wofa.
24 Asi soko ra Djehovha* rairumbwa recikura uye recibararika.
25 Bharnabhee na Sauro paakapedza kuita basa re kubetsera hama ku Djerusarema, akahwirira uye akatora Juau, waiziikanwawo kuti Marko.
Masoko ari pasi
^ Kana kuti: “ azomutonge.”
^ Onai Apendi. A5.
^ Onai Apendi. A5.
^ Onai Apendi. A5.
^ Kana kuti: “ainga akagadzirira kurhwisana no.”
^ Cigrego: “uya wainga ari mu nyumba inowata mambo.”
^ Onai Apendi. A5.
^ Onai Apendi. A5.
