Zviito zve Aphostori 13:1-52
13 Mu ungano ye ku Antiyokiya mainga muno aphorofita no afundisi: Bharnabhee, Simiyoni waidainzwa kuti Nijeri, Rusiyo weku Sirene, Manaini wainga wakafundiswa pamwepo na Herodhi mutungamiriri we dhistritu, uye Sauro.
2 Paainga ari kuseenzera Djehovha* uye ecitsanya, mwiya mucena wakati: “Ndisanangurirei Bharnabhee na Sauro kuti aite basa randakaadainzira.”
3 Hino mumasure me kutsanya uye kuita munamato, awona akaatsanzikira nyara uye akaasiya kuti aende.
4 Ngokudaro, anarume aya akatumwa no mwiya mucena, akateredza ku Sereusiya, uye akabira oenda ku Shipre.
5 Paakaguma ku Saramina, akatanga kuziisa soko ra Mwari mu masinagoga e Adjudha. Juau wainga ari pamwepo nawo eciabetsera.*
6 Mumasure me kuhamba mucitsuwa cese ce Pafo, akagumira Mudjudha umweni waizwi Bhar-Djesu, iyena wainga ari muroyi uye muphorofita we kunyepa.
7 Iyena wainga ari no mutungamiriri we provhinsiya* waizwi Serjo Pauro, mwanarume uu wainga uno uzii. Serjo Pauro wakadainza Bharnabhee na Sauro, ngokuti waida maningi kuzwa soko ra Mwari.
8 Asi Erima, muroyi (ngokuti ndiwo maturikirirhwe anoizwa zina rake) wakatanga kuaphikisa, eciedza kupausa mutungamiriri pa kutenda.
9 Hino, Sauro, unozwiwo Pauro, wakadzara no mwiya mucena, uye wakanyasa kumuringira
10 uye wakati: “Iwe mwanarume wakadzara no ucengedzi wese uye no mushobo wese we zviro zvakashata, mwana wa Dhiyabhurosi, muzondi we zviro zvese zve unatsi, auimi here kupingaidza makwanza akanaka a Djehovha?*
11 Izwa! Nyara ya Djehovha* iri pamusoro pako, uye iwewe ucagara bofu, usikaoni ciedza ce zuwa ke cinguwa.” Ciriporipoco pamberi pake pakaoneka mhute, uye cidima cakakura, uye iyena wakatanga kutenderera ecipsvaka munhu kuti amutungamirire akamubata nyara.
12 Hino mutungamiriri we provhinsiya paakaona zvainga zvaitika, wakagara mutendi, ngokuti wakashamisika no fundiso dza Djehovha.*
13 Pauro no adoni ake akapakira mu bharko oenda ku Pafo uye akaguma ku Perga, ku Panfiriya. Asi Juau wakaasiya wohwirira ku Djerusarema.
14 Hino awona akaenderera mberi no rhwendo ecibva ku Perga uye akaguma ku Antiyokiya ku Pizidhiya. Hino akapinda mu sinagoga mu zuwa ro Sabudu uye akagara.
15 Mumasure me kuerenga Mutemo uye zvakatarhwa no Aphorofita ku anhu ese, atungamiriri e sinagoga akaita kuti Pauro na Bharnabhee abvunzwe kuti: “Hama, kana imwimwi muno soko rekubambisa ramunoda kubvunza anhu, bhuyai.”
16 Hino Pauro wakamuka, wakamutsa moko ecikumbira kuti anhu apurutane uye wakabhuya kuti:
“Aisraeri no mwese imwimwi munothya Mwari, purutanai.
17 Mwari we anhu aya, Mwari we Israeri, akasanangura madzitsekuru edu uye akaakudza paairarama hinga anhu e nyika yokunza ku nyika yo Edjipitu uye akaabvisa ikona no moko uno simba.*
18 Uye ke makore angakwana kuita 40, iyena akaapangidzira mwoyo unononoka kutsamwa ku renje.
19 Akatsakatisa madzinza 7 o nyika yo Kanani uye akaipasa ku Aisraeri hinga nhaka.
20 Zvese izvi zvakaitika mukati me makore angakwana 450.
“Pedzepo, akaapasa atongi dakara mu mazuwa e muphorofita Samueri.
21 Asi awona akamukumbira mambo, hino Mwari akaapasa Sauri mwana wa Kishi, mwanarume we ku dzinza ra Bhenjamii, kuti atonge ke makore 40.
22 Mumasure me kubvisa Sauri pa umambo, akagadza Dhavhidhi hinga mambo, uya waakapupurira nge zvake eciti: ‘Ndagumira Dhavhidhi mwana wa Djesee, mwanarume unopfadza mwoyo wangu; iyena ucaita zvese zvandinoda.’
23 Maererano no zvaakagondesa, ecibva ku ana* e mwanarume uu, Mwari akaunzisa muponesi kuna Israeri, Djesu.
24 Paainga asati auya, Juau wakaparidzira ku anhu ese e Israeri rubhabhatidzo hinga cipangidzo ce kucinyuka zvitema.
25 Asi paainga aakupedzesa basa rake, Juau waiti: ‘Imwimwi munoti ndiri ani? Inini andiripi iyena. Zvezvirokwazvo, mumasure mangu mucauya Uya wekuti andizi kusisira kukhumura masandarya ake.’
26 “Hama, ana e mhuri ya Abrahamu uye ese amweni ari pakati penyu anothya Mwari, masoko aya e kuponesa akatumirhwa isusu.
27 Ngokuti agari e ku Djerusarema uye atungamiriri awo aazi kuziya muponesi uu, asi paaidziita atongi, akadzadzisa masoko akatarhwa no Aphorofita anoerengwa no izwi guru mu Masabudu ese.
28 Kunyazi asikazi kuona cikonzero cekumuuraya, akakumbira kuti Pirato amuuraise.
29 Uye mumasure me kuita zviro zvese zvakatarhwa nge zvake, akamubvisa pa mutanda* omukanda mu guwa.*
30 Asi Mwari akamumutsa kubva ku akafa,
31 uye ke mazuwa akawanda, iyena akadzipangidza ku aya ainga akabva naye ecibva ku Garireya ecienda ku Djerusarema. Awona zvino ari kupasa upupuri nge zvake ku anhu.
32 “Ngokudaro, isusu tiri kumuziisai masoko akanaka ngezve gondeso yakaizwa ku madzitsekuru edu.
33 Mwari akanyasa kuidzadzisa katiri, isusu ana, nge kumutsa Djesu; hinga zvakatarhwa pa pisarema recipiri: ‘Iwewe uri mwana wangu; nyamasi inini ndagara baba ako.’
34 Uye ngokuti Mwari akamumutsa kubva ku akafa zvekuti iyena aazogarizve no mwiri unoora, Mwari akazvibhuya nge mushobo uu: ‘Inini ndicaapangidzira rudo rakatendeka* rakagondeswa kuna Dhavhidhi, rudo irona rakagondeka.’
35 Ndiyo ndaa, pisarema rimweni rinotiwo: ‘Amuzotenderi kuti wakagondeka wenyu aore.’
36 Dhavhidhi wakaita basa ra Mwari* mu upenyu wake wese, iyena wakafa, wakakotswa pamwepo no madzitsekuru ake uye wakaora.
37 Asi uya akamutswa na Mwari aazi kuora.
38 “Hino hama, ziyai kuti nge ndaa ye mwanarume uu imwimwi muri kuziiswa kurekererhwa ke zvitema,
39 uye kuti nge ndaa yake, wese uya unotenda azwi aana ndaa pa zviro zvese zvekuti pa Mutemo wa Mozesi waizozwi ano ndaa.
40 Hino, ngwarirai kuti zvisaitike na imwimwi zvakabhuiwa no Aphorofita:
41 ‘Onai izvi ashori, shamisikai uye ngarangarai, ngokuti ndiri kuita basa mu mazuwa enyu, basa rekuti amuzoritenderi kunyazi mukazoripanganidzirhwa.’”
42 Paainga ecibuda, anhu akaadeketerera kuti areketezve ngezve nyaya idzona mu Sabudu raizoteera.
43 Mumasure me kupera ke musangano we musinagoga, Adjudha akawanda no akatendeuka kugara Adjudha ainamata Mwari, akateera Pauro na Bharnabhee, uye Pauro na Bharnabhee akaakohomedzesa kuti arumbwe ari mu nyasha dza Mwari.
44 Mu Sabudu rakazoteera, anhu akawanda e mu thaundi akaungana kuti azwe soko ra Djehovha.*
45 Adjudha paakaona anhu akawanda, akagara no shanje dzakakura uye akatanga kutuka eciphikisa zvairekethwa na Pauro.
46 Hino Pauro na Bharnabhee akagara no ushingi uye akaabvunza kuti: “Zvaidikana kuti soko ra Mwari ritange kubvunzwa imwimwi. Asi ngokuti mariramba uye munoona kuti amuzi kusisira upenyu usikaperi, zvino isusu ticahwirira ku madzinza amweni.
47 Ngokuti Djehovha* akatipasa mutemo uu: ‘Inini ndakugadza hinga ciedza ku madzinza amweni, kuitira kuti utore ruponeso dakara ku mbuto dziri kure dze nyika.’”
48 Anhu e madzinza amweni paakazwa izvi, akapfara uye akatanga kukudza soko ra Djehovha,* uye ese ainga ano cido cakanaka ce kuona upenyu usikaperi, akagara atendi.
49 Uyezve, soko ra Djehovha* raiziiswa mu nharaunda iyona yese.
50 Asi Adjudha akapfuridzira anakadzi akakwirira aithya Mwari kutobatanidzawo anarume ano mbiri e mu thaundi, akaita kuti Pauro na Bharnabhee ateererhwe uye akaadzingira mu nharaunda yawo.
51 Hino awona akagugudza bukuta rainga riri pa tsoka dzawo hinga upupuri kaari uye akaenda ku Ikoniyo.
52 Uye afundi airumbwa akadzara no mupfaro uye no mwiya mucena.
Masoko ari pasi
^ Onai Apendi. A5.
^ Kana kuti: “hinga mubetseri.”
^ Mutungamiriri we provhinsiya imwe yo ku Roma. Onai pakazwi Kupanganidzwa ke Masoko.
^ Onai Apendi. A5.
^ Onai Apendi. A5.
^ Onai Apendi. A5.
^ Cigrego: “no moko wakapurumutswa.”
^ Kana kuti: “mbeu.”
^ Kana kuti: “pa muti.”
^ Kana kuti: “guwa re anoedzurirhwa.”
^ Kana kuti: “rakagondeka.”
^ Kana kuti: “kuda ka Mwari.”
^ Onai Apendi. A5.
^ Onai Apendi. A5.
^ Onai Apendi. A5.
^ Onai Apendi. A5.
