Zviito zve Aphostori 14:1-28
14 Ku Ikoniyo, awona akapinda ese mu sinagoga ro Adjudha uye akareketa ngo mushobo wekuti anhu akawanda, Adjudha kutobatanidzawo no Agrego, akagara atendi.
2 Asi Adjudha asikazi kutenda akacengedzera anhu* e madzinza amweni kuti awona azonde hama.
3 Hino Pauro na Bharnabhee akatora nguwa yakawanda ecireketa no ushingi uye no simba ra Djehovha;* Iyena* aipupurira nyasha dzake ngo kutendera kuti awona aite zvipangidzo no zvishamiso pakati pawo.
4 Asi anhu e mu thaundi ainga asikapindirani; amweni aitsigira Adjudha uye amweni aitsigira aphostori.
5 Hino, anhu e madzinza amweni, Adjudha pamwepo no atungamiriri awo, akasanangura kuatambudza uye kuafura no mapuwe,
6 paakaziiswa nge zvazvo, akatizira ku mathaundi e Rikaoniya, aizwi Ristra no Dherbhe, uye ku nharaunda dzakaitenderedza.
7 Kweneyo awona akarumbwa eciziisa masoko akanaka.
8 Ku Ristra, kainga kuno mwanarume umweni wainga wakagara pasi. Iyena wainga akaremara mirenje kubvira paakabarhwa uye wainga asati akambohamba.
9 Mwanarume uu wainga ecipurutana Pauro paainga ecireketa. Pauro wakarumbwa ecimuringira uye paakaona kuti iyena wainga ano kutenda kaizoita kuti apore,
10 wakati no izwi guru: “Purumuka uime.” Hino mwanarumewo wakamhuka uye wakatanga kuhamba.
11 Anhu paakaona zvainga zvaizwa na Pauro, akakhuwa no mureketero we ku Rikaoniya eciti: “Anamwari agara anhu uye auya katiri!”
12 Awona akatanga kudainza Bharnabhee kuti Zeu, uye Pauro kuti Herme, ngokuti ndiye wainga ecireketa.
13 Mupristi wa Zeu, uwo wainga ano tempro yaigara dhuze no musuwo we thaundi, wakatora n’ombe dzo kono no makorowa* woenda nazvo pa musuwo we thaundi uye wainga ecida kuita zvibairo pamwepo no anhu.
14 Aphostori Barnabhee na Pauro paakaziya nge zvazvo, akamwesa macira awo, akagogoma oenda pakati pe anhu uye akakhuwa eciti:
15 “Anhumwi, muri kuitirei zviro izvi? Isusu tiri anhuwo hingana imwimwi uye tinososonganawo no zvinetso zvimwezvo no zvamuri kusongana nazvo. Uye tiri kumuziisai masoko akanaka, kuti musiye zviro izvi zvisina basa uye mutendeuke kuna Mwari mupenyu wakaita denga no nyika, bahari, uye zvese zviri mazviri.
16 Mu mibarirhwana yakadarika, iyena akatendera kuti madzinza ese ahambe mu makwanza awo,
17 kunyazi hazvo asikazi kusiya kupasa upupuri nge zvake, ngokuti akapangidza unaki wake eciapasa mvura ye kudenga uye nguwa ye kukorora zvakawanda, eciagutsa no zvokurhya uye ecidzadza mwoyo yawo no mupfaro.”
18 Kunyazi ecireketa zviro izvi, zvakashupha maningi kuti apingaidze anhu kuaitira zvibairo.
19 Asi pakaguma Adjudha e ku Antiyokiya no e ku Ikoniyo uye akapfuridzira anhu; hino akafura Pauro no mapuwe uye akamukwekweredzera kunza ke thaundi, ecirangarira kuti iyena wainga wafa.
20 Asi afundi paakamuunganira, iyena wakapurumuka uye wakapinda mu thaundi. Pa zuwa rakazoteera, iyena wakaenda ku Dherbhe na Bharnabhee.
21 Mumasure me kuziisa masoko akanaka mu thaundi irona uye mumasure mekuita afundi akawanda, akahwirira ku Ristra, Ikoniyo, uye ku Antiyokiya.
22 Kweneyo, awona akabambisa afundi, eciakohomedzesa kuti arumbwe ari mu kutenda no masoko okuti: “Tinodikana kubatana no matambudziko akawanda kuti tipinde mu Umambo wa Mwari.”
23 Akagadzawo akuru mu ungano imwe na imwe, eciita munamato uye ecitsanya, uye akaakanda mu nyara dza Djehovha,* uya waainga aakutenda maari.
24 Hino akadarika nge ku Pizidhiya, opinda mu Panfiriya,
25 uye mumasure me kuziisa soko ku Perga, akateredza oenda ku Atariya.
26 Pedzepo akaenda no bharko ku Antiyokiya, kuya kaainga anamatirhwa kuti Mwari aakomborere pa basa rokuti zvino awona ainga aripedza.
27 Paainga aguma, awona akaunganidza ungano yese, uye akaapanganidzira zviro zvakawanda zvainga zvaizwa na Mwari eciseenzesa awona, uye mushobo wakafungura Mwari musuwo we kutenda ku anhu e madzinza amweni.
28 Ngokudaro, akagara ke nguwa yakareba no afundi.
Masoko ari pasi
^ Kana kuti: “mwiya.”
^ Onai pakazwi Kupanganidzwa ke Masoko.
^ Kana kuti: “Kureya kuti Mwari.”
^ Kana kuti: “makorowa e maruwa.”
^ Onai pakazwi Kupanganidzwa ke Masoko.
