Zviito zve Aphostori 15:1-41
15 Anarume amweni akabva ku Djudhiya akatanga kufundisa hama eciti: “Kana imwimwi mukatama kuizwa ucekeri maererano no tsika ya Mozesi, amungaponeswi.”
2 Asi mumasure mekuti Pauro na Bharnabhee areketedzana nawo kakawanda, pakaizwa urongwa wokuti Pauro na Bharnabhee no anhu anganani akwidze ku Djerusarema kuti agadzirise nyaya ii no aphostori uye akuru.
3 Ngokudaro, mumasure me kumboperekedzwa no ungano, awona akaenderera mberi no rhwendo rawo ecidarika no ku Fenisiya uye no ku Samariya, awona ainyasa kupanganidza ngezve kutendeuka ke anhu e madzinza amweni uye aiita kuti hama dzese dzipfare maningi.
4 Paakaguma ku Djerusarema, akatambirhwa zvakanaka no ungano, aphostori no akuru, uye akaapanganidzira zviro zvese zvainga zvaizwa na Mwari eciseenzesa awona.
5 Asi anganani e cikwata co Afarisi ainga agara atendi, akapurumuka paainga akagara uye akati: “Anodikana kuizwa ucekeri uye kuabvunza kuti azwire Mutemo wa Mozesi.”
6 Hino aphostori no akuru akaungana kuti acedze ngezve nyaya ii.
7 Mumasure me kucedza ke nguwa yakareba, Pedru wakapurumuka uye wakabhuya kuti: “Hama dzangu, munonyasa kuzviziya kuti kubvira pakutanga Mwari akandisanangura pakati penyu kuti anhu e madzinza amweni azwe masoko akanaka ecibva pa muromo wangu uye atende.
8 Uye Mwari, uya anoziya zviri mu mwoyo, akapangidza kuti aiatendera* eciapasa mwiya mucena, hinga kutipasa kaakaita.
9 Uye iyena aazi kuita kuti pakati pedu nawo paoneke musiyano, asi akacenesa mwoyo yawo no kutenda.
10 Hino ngei zvino muri kuedza Mwari, ngo kukanda mu mutsipa me afundi djoki rokuti kunyazi madzitsekuru edu uye isusu atizi kukwanisa kurithwara?
11 Asi isusu tinotenda kuti tinoponeswa nge nyasha dza Tenzi Djesu hinga kuponeswawo kaanoizwa.”
12 Ngokudaro, anhu ese akanyarara, uye akatanga kupurutana Bharnabhee na Pauro ecipanganidza ngezve zvipangidzo zvakawanda no zvishamiso zvainga zvaizwa na Mwari ku madzinza amweni eciseenzesa awona.
13 Paakapedza kureketa, Tiyago wakabhuya kuti: “Hama dzangu, ndipurutanei.
14 Simiyoni wanyasa kupanganidza kuti Mwari akatanga kudini kurangarira ngezve madzinza amweni kuti abvise pakati pawo anhu e zina rake.
15 Uye izvi zvinoenderana no masoko e Aphorofita, hinga zvakatarhwa kuti:
16 ‘Mumasure mazvo, ndicahwirira, ndomutsa tenda* ra Dhavhidhi rainga rambwera; uye ndicawaka mathuku aro, zvogarazve hinga mushobo wazvainga zviri,
17 kuitira kuti anhu ainga asara apsvake Djehovha* no mwoyo wese, pamwepo no anhu e madzinza ese, anhu anodainzwa no zina rangu, anodaro Djehovha,* uya ari kuita zviro izvi
18 zvinoziikanwa kubvira kare.’
19 Ndiyo ndaa, cisananguro* cangu nge cekutama kukanda zvinetso ku anhu aya e madzinza amweni ari kutendeuka kuna Mwari,
20 asi kuatarira kuti anodikana kusiya zviro zvakasvipiswa no zvidhori, uhure,* zviro zvakabongonyorhwa,* uye ngazi.
21 Ngokuti kubvira kare, kuno anhu anoparidzira ngezve mutemo wa Mozesi mu thaundi rimwe na rimwe, ngokuti uwona unoerengwa no izwi guru mu masinagoga Masabudu ese.”
22 Hino aphostori no akuru, pamwepo no ungano yese, akasanangura kutumira ku Antiyokiya anarume aainga akasanangura pakati pawo, pamwepo na Pauro uye Barnabhee; akatumirawo Djudhasi, waidainzwa Bharsabha, na Sirasi, anarume aitungamirira pakati pe hama.
23 Akatara tsamba uye akaitumira nawo:
“Isusu hama dzenyu, aphostori uye akuru, tiri kumutumirai micungamidzo kamuri hama dze madzinza amweni muri ku Antiyokiya, Siriya, uye ku Sirisiya!
24 Takazwa kuti anganani akabuda pakati pedu, akamuunzirai zvinetso no zviya zvaakareketa uye akaedza kumuvhiringidzai, asi isusu tainga tisikazi kuabvunza kuti aite izvona,
25 ndiyo ndaa, tese taita cisananguro ce kumutumirai anarume anganani pamwepo no hama dzedu dzinodiwa Bharnabhee na Pauro,
26 awona akakanda pa ngozi upenyu* wawo nge ndaa yo zina ra Tenzi wedu Djesu Kristu.
27 Hino tamutumirai Djudhasi na Sirasi, kuti amubvunzei no muromo masoko atatara.
28 Ngokuti mwiya mucena watibetsera kuti tiite cisananguro cokuti atidikani kumupasai mitoro imweni kunza ke zviro izvi zvinodiikanwa:
29 Kurumbwa mecisiya zviro zvakabairhwa zvidhori, ngazi, zviro zvakabongonyorhwa,* uye uhure.* Kana mukangwarira kuti musaite zviro izvi, zvicamuhambirai zvakanaka. Sarai zvakanaka!”*
30 Ngokudaro, mumasure me kusiiwa kuti aende, anarume aya akateredza ku Antiyokiya, akaunganidza anhu ese o kweneyo, uye akaapasa tsambeyo.
31 Paakapedza kuierenga, awona akapfara no kubambiswa kaakaizwa.
32 Ngokuti Djudhasi na Sirasi aingawo ari aphorofita, awona akaabambisa ngo kuabvunza zviro zvakawanda zvinobambisa.
33 Mumasure me kugara kweneyo ke nguwa yakati kuti, hama dzakaasiya kuti ahwirire mu runyararo ku aya ainga aatuma.
34— —
35 Asi Pauro na Bharnabhee akasara ku Antiyokiya, ecifundisa uye eciziisa masoko akanaka e soko ra Djehovha.* Awona ainga ari pamwepo no anhu amweni akawanda.
36 Mumasure me mazuwa manganani, Pauro wakabvunza Bharnabhee kuti: “Zvino ngatihwirire koovhakacira hama dze thaundi rimwe na rimwe ratakaziisa soko ra Djehovha,* kuti tione kuti dzakadini.”
37 Bharnabhee waida kutora Juau, waidainzwawo kuti Marko.
38 Asi Pauro wainga asikadi kuenda naye, ngokuti iyena wainga akamboasiya ku Panfiriya uye wainga asikazi kuenda nawo ku basa.
39 Izvi zvakaita kuti awona areketedzane* maningi, zvokuti akaparadzana. Hino Bharnabhee wakatora Marko wokwira mu bharko, woenda naye ku Shipre.
40 Pauro wakasanangura Sirasi uye wakaenda mumasure mekuti hama dzaaitira munamato kuti akomborerhwe na Djehovha.*
41 Iyena wakapinda no ku Siriya uye ku Sirisiya, ecibambisa ungano.
Masoko ari pasi
^ Kana kuti: “aiapupurira.”
^ Kana kuti: “nyumba.”
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Kana kuti: “maonero.”
^ Mu Cigrego, porneía. Onai pakazwi Kupanganidzwa ke Masoko.
^ Cinyama cakauraiwa cisikazi kudururhwa ngazi, izvi zvinobatanidzawo cinyama cakafa coga.
^ Kana kuti: “mwiya.”
^ Cinyama cakauraiwa cisikazi kudururhwa ngazi, izvi zvinobatanidzawo cinyama cakafa coga.
^ Mu Cigrego, porneía. Onai pakazwi Kupanganidzwa ke Masoko.
^ Kana kuti: “Garai no uthongo wakanaka.”
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Kana kuti: “anyangadzwirane.”
^ Onai pakazwi Kupanganidzwa ke Masoko.
