Zviito zve Aphostori 16:1-40
-
Pauro anosanangura Timoti (1-5)
-
Pauro anoona mwanarume we ku Masedhoniya mu ciono (6-10)
-
Kutendeuka ka Ridhiya ku Firipi (11-15)
-
Pauro na Sirasi anosungwa (16-24)
-
Murindi we karaboso no anhu e pa nyumba pake anobhabhatidzwa (25-34)
-
Pauro anoda kukumbirhwa rurekerero no akuru-akuru e masurudado (35-40)
16 Hino iyena akaguma ku Dherbhe uye ku Ristra. Ikona kainga kuno mufundi umweni waizwi Timoti, mai ake ainga ari Mudjudha uye ainga ari mutendi, asi baba ake ainga ari Mugrego,
2 uye hama dzo ku Ristra no dzo ku Ikoniyo dzaireketa zvakanaka nge zvake.
3 Pauro waida kuti Timoti amuperekedze, uye wakamuita ucekeri nge ndaa yo Adjudha aigara ikona, ngokuti ese aizviziya kuti baba ake ainga ari Mugrego.
4 Paaiita rhwendo mu mathaundi, aiziisa hama zvisananguro zvainga zvaizwa no aphostori uye no akuru e ku Djerusarema, kuitira kuti azwire nhungamiriro idzona.
5 Ngokudaro, ungano dzaibambiswa mu kutenda uye dzairumbwa dzecikura zuwa no zuwa.
6 Awona akaenda ku Frijiya no ku Garatiya, ngokuti mwiya mucena wainga waarambidza kuparidzira ku provhinsiya yo Aziya.
7 Uyezve, paakateredza ku Miziya, akaedza kupinda mu Bhitiniya, asi mwiya wa Djesu auzi kuatendera kuti aite izvona.
8 Ndiyo ndaa akapinda* nge ku Miziya, oteredza no ku Troadhe.
9 Cousiku, Pauro wakaona ciono: Mwanarume umweni we ku Masedhoniya wainga wakaima uye waimudeketerera eciti: “Uyai kuno ku Masedhoniya kuti mutibetsere.”
10 Mumasure me kuona ciono, takaronga kuenda ku Masedhoniya, tecirangarira kuti Mwari ainga atidainza kuti tiende kooaziisa masoko akanaka.
11 Ngokudaro, takakwira bharko ku Troadhe uye toenda ku Samotrasi, asi pa zuwa rakazoteera takaenda ku Neyapori;
12 kubva kweneyo takaenda ku Firipo, thaundi raitongwa no Roma uye rainga riri thaundi guru ro Masedhoniya. Takagara mu thaundi irona ke mazuwa manganani.
13 Pa zuwa ro Sabudu, takabuda pa musuwo we thaundi uye takaenda ku murambo umweni, ngokuti tairangarira kuti kweneyo kainga kuno mbuto ye kuitira munamato. Hino takagara pasi uye takatanga kureketa no anakadzi ainga aungana ikona.
14 Mwanakadzi umweni wainga ecipurutana, iyena waizwi Ridhiya, mutengesi we macira okupsvukirira, we thaundi re Tiyatira uye wainga ari munamati wa Mwari. Djehovha* akanyasa kumufungura mwoyo wake kuti ateye nzee zvairekethwa na Pauro.
15 Hino mumasure mekuti iyena no e pa nyumba pake abhabhatidzwa, iyena wakarumbwa eciti: “Kana mecindiona kuti ndakatendeka kuna Djehovha,* uyai kuti mugare pa nyumba pangu.” Uye iyena wakaita kuti tiendeyo.
16 Pa zuwa rimweni patainga tecienda ku mbuto ye kuitira munamato, museenzi umweni we mwanakadzi wainga ano dhimoni re kufembera wakauya katiri. Iyena waiita kuti aya aaiseenzera aone mare yakawanda nge ndaa ye kufembera ramangwana kaaiita.
17 Musikanewo waiteera Pauro na isusu, ecikhuwa eciti: “Anarume aya ndi aranda a Mwari we Kumusoro-soro uye ari kumuziisai gwanza re ruponeso.”
18 Musikanewo wakaita izvona ke mazuwa akawanda. Pauro wakazopedzesera waremba nazvo, wakaringira sure uye wakati ku mwiyewo: “Mu zina ra Djesu Kristu ndinokubvunza kuti, buda maari.” Uye mwiyewo wakabuda ciriporipoco.
19 Madzitenzi ake paakaona kuti zviya zvaiapasa mare zvainga zvapera, akabata Pauro na Sirasi uye akaakwekweredza oenda nawo ku bazari guru,* ku anyautongi.
20 Awona akaatora oenda nawo ku atongi e govherno uye akaabvunza kuti: “Anarume aya ari kuvhiringidza maningi thaundi redu. Awona ndi Adjudha,
21 uye ari kufundisa tsika dzatisikatenderhwi kuseenzesa kana kuita, ngokuti tiri Aroma.”
22 Uye anhu ese akaanyangadzwira; hino atongi e govherno akaakhumura macira, uye akaita kuti awona apondwe.
23 Mumasure me kuaponda maningi, akaakanda mu kadheya uye akabvunza murindi kuti anyase kuarinda.
24 Paakabvunzwa izvi, iyena akaakanda mu karaboso ye mukati-kati uye akasunga mirenje dzawo pa cimutanda.
25 Asi pakati pe usiku, Pauro na Sirasi ainga ecinamata uye ecikudza Mwari no ngoma, uye asungwa amweni ainga eciazwa.
26 Ciriporipoco kakaitika cigidhi-gidhi cakakura, zvokuti kadheya yese yakatekenyeka. Pa nguwa iyona musuwo dzese dzakafunguka, uye makorenti aainga akasungwa nawo akasudzunuka.
27 Murindi paakamuka uye paakaona kuti musuwo dzo kadheya dzainga dzakafunguka, iyena wakavhorora supada yake uye waida kudziuraya, ecirangarira kuti asungwa ese ainga atiza.
28 Asi Pauro wakakhuwa eciti: “Usadziuraye, ngokuti tese tiri muno!”
29 Ngokudaro, Pauro wakakumbira kuti amuunzisire cokuvhenekera naco, iyena wakapindemo ecigogoma uye ecitetemera; iyena wakahwarara pamberi pa Pauro na Sirasi.
30 Iyena wakaatora wobuda nawo kunza uye wakaabvunzisa kuti: “Madhodha, zvinyi zvandinodikana kuita kuti ndiponeswe?”
31 Awona akamudaira kuti: “Tenda muna Tenzi Djesu, uye ucaponeswa, iwewe pamwepo no e pa nyumba pako.”
32 Uye akaparidzira iyena no ese e pa nyumba pake ngezve soko ra Djehovha.*
33 Iyena wakaatora pa nguwa iyona cousiku uye wakasuka zvironda zvawo. Hino, iyena no e pa nyumba pake akabhabhatidzwa nokukasika.
34 Iyena wakaatora woenda nawo kumba uye wakaakandira zvokurhya pa meza, uye iyena no ese e pa nyumba pake akapfara maningi ngo kutenda kaainga aita muna Mwari.
35 Pakainga kaedza, atongi e govherno akatuma arindi kuti aende koobvunza murindi uya kuti: “Sudzunura anarume aya.”
36 Murindiwo wakabvunza masoko aya Pauro eciti: “Atongi e govherno abhuya kuti imwimwi airi musudzunurhwe. Hino, endai henyu mu runyararo.”
37 Asi Pauro wakati: “Awona akatiponda pakadzara nge anhu, tisikazi kutotongwa, kunyazi hazvo tiri Aroma, uye akatikanda mu kadheya. Zvino ari kuda kutiendesa mucifise-fise? Haiwa, azviiti. Ngaauye awona atibvise muno oga.”
38 Arindi akaendesa masoko aya ku atongi e govherno. Awona akathya paakaziya kuti anarume aya ainga ari Aroma.
39 Ngokudaro, akaenda kweneyo uye akaakumbira rurekerero, mumasure me kubuda nawo kunza, akaakumbira kuti abude mu thaundi irona.
40 Asi Pauro na Sirasi paakabuda mu kadheya, akaenda kumba ka Ridhiya; paakaona hama, awona akadzibambisa, pedzepo akaenda.
Masoko ari pasi
^ Kana kuti: “akadarika.”
^ Onai Apendi. A5.
^ Onai Apendi. A5.
^ Ii yainga iri mbuto yaiseenzeswa no anhu pakutenga no kutengesa uye yaiizirhwawo misangano.
^ Onai Apendi. A5.
