Zviito zve Aphostori 17:1-34
17 Hino akaita rhwendo ecipinda nge ku Anfipori no ku Aporoniya, uye akaguma ku Tesaronika, uko kainga kuno sinagoga re Adjudha.
2 Maererano no zvaaigara eciita, Pauro wakapinda woenda koocedza nawo, uye ke Masabudu matatu iyena wakacedza nawo eciseenzesa Matarhwa:
3 Iyena waipanganidza uye waipangidza zvakatarhwa kuti zvaidikana kuti Kristu atambudzike uye amutswe kubva ku akafa, iyena waiti: “Djesu uu wandiri kumuziisai nge zvake, ndiye Kristu.”
4 Nge ndaa yazvo, anganani awo akagara atendi uye akabatana na Pauro na Sirasi, uye Agrego akawanda ainamata Mwari akaitawo zvimwezvo, kutobatanidzawo anakadzi akawanda akakwirira.
5 Asi Adjudha akagara no shanje; hino akaunganidza anarume anganani akashata mwoyo aiherereka pa bazari, akaumba cikwata uye akatanga kuita woyo-woyo mu thaundi. Awona akapinda no simba mumba ma Djasoni, ecipsvaka Pauro na Sirasi, kuti aabvise kunza kainga kuno cikwata ciya co anhu akashata mwoyo.
6 Ngokuti aazi kuaona, akakwekweredza Djasoni no hama dzinganani ecienda nawo ku anyautongi e thaundi; awona aikhuwa eciti: “Anarume aya anosobara woyo-woyo* mu nyika, aamunoo,
7 uye Djasoni wakaatambira pa nyumba pake. Anarume ese aya ari kuita zvinopesana no zvakabhuiwa na Sezari, ecibhuya kuti kuno mambo umweni, anozwi Djesu.”
8 Paakazwa zviro izvi, anhu no anyautongi e thaundi akanyangadzwa maningi;
9 hino mumasure mekuti Djasoni no amweni aripa mare yaakakumbirhwa, awona akaasiya kuti aende.
10 Pakainga kadoka, hama dzakatumira Pauro na Sirasi ku Bhereya. Paakaguma ikona, awona akapinda mu sinagoga ro Adjudha.
11 Anhu aya e ku Bhereya, ainga ano ndangariro dzakanaka kupinda e ku Tesaronika, ngokuti akatambira soko no cido, uye ainyasa kukwarakwatisa Matarhwa mazuwa ese, kuitira kuti aone kuti zviro zvaainga azwa zvainga zvezvirokwazvo here kana kuti haiwa.
12 Hino, akawanda awo akagara atendi, kutobatanidzawo anakadzi akawanda e Cigrego akakwirira, uyewo anarume anganani.
13 Asi Adjudha e ku Tesaronika paakazwa kuti Pauro wainga eciparidzirawo masoko a Mwari ku Bhereya, akaendeyo no cinangwa co kucengedzera anhu kuti aite woyo-woyo.
14 Hino ciriporipoco hama dzakaita kuti Pauro aende ku bahari, asi Sirasi na Timoti akarumbwa ari ikona.
15 Asi aya ainga eciperekedza Pauro akamutora oenda naye ku Atena, pedzepo awona akahwirira, mumasure mekuti apaswa nhungamiriro kuti abvunze Sirasi na Timoni kuti aende koosongana na Pauro nokukasika.
16 Paainga eciaetsera ku Atena, Pauro wakanyangadzwa maningi* paakaona kuti thaundi rese rainga rakadzara no zvidhori.
17 Ngokudaro, akatanga kucedza mu sinagoga no Adjudha uye no anhu amweni ainamata Mwari, mazuwa ese aicedza no anhu ainga ari pa bazari.*
18 Asi azii anganani e Firozofiya e cikwata ce Aepikureu no Aestoiko, akatanga kumuitira hasha, amweni aiti: “Nyamapsveda uu ari kuda kubhuyei?” Amweniwo aiti: “Iyena ari kuita hinga muparidzi we anamwari e nyika dzo kunza.” Aibhuya izvi ngokuti iyena aiziisa masoko akanaka ngezva Djesu uye ngezve rumuko.
19 Hino awona akamutora, omuendesa ku Areopago eciti: “Ungatibvunzawo here kuti ngaipi fundiso ipsva yauri kureketa nge zvayo?
20 Ngokuti iwewe uri kubhuya zviro zvinganani zvatisati takambozwa uye tiri kuda kuziya kuti zvinoreyei.”
21 Zvezvirokwazvo, anhu ese e ku Atena no anhu e ku nyika dzo kunza airarama imona, aindoseenzesa nguwa yawo ye kuzorora kuti arekete kana kuzwa zviro zvipsva.
22 Hino, Pauro wakaima pakati po Areopago uye wakati:
“Anhu e ku Atena, ndiri kuona kuti pa zvese zvamunoita imwimwi munopfarira maningi zvokunamata kudarika anhu amweni.
23 Ngo muezaniso, pandaidarika ndecinyasa kuona zviro zvamunonamata,* ndagumira artari imweni yainga yakatarhwa kuti: ‘Kuno Mwari Asikaziikanwi.’ Zvezvirokwazvo, uya wamunonamata musikamuzii, ndiye wandiri kuparidzira nge zvake.
24 Mwari akaita nyika no zvese zviri mairi, ngokuti Iyena ndi Tenzi we denga no nyika, aagari mu tempro dzakaizwa no nyara dzo anhu;
25 kana kuseenzerhwa no nyara dzo anhu, hingana kuti pano caanokonerhwa, ngokuti iyena anopasa anhu ese upenyu, mwiya we kufema uye zviro zvese.
26 Uye iyena akaita madzinza ese no munhu umwe basi kuti agare pa nyika pese; iyena akatara nguwa uye akakanda migano ye mbuto yaizogarhwa no anhu,
27 kuitira kuti awona apsvake Mwari, ecitoita zve kumhamhasira ecimupsvaka, uye omuona, kunyazi hazvo asiripi kure ke umwe na umwe wedu.
28 Ngokuti ndiye akaita kuti tigare no upenyu, tihambe uye tioneke tiri pano, hinga zvakarekethwa no atari anganani enyu kuti: ‘Isusuwo tiri ana ake.’
29 “Ngokuti tiri ana a Mwari, atidikani kurangarira kuti Mwari akaezana no oro, prata kana buwe, hinga ciro cinogadzirhwa no anhu eciseenzesa ndangariro dzawo.
30 Izvirokwazvo kuti Mwari akafuratira nguwa ii ye kutama kuziya kawo; asi zvino ari kubvunza anhu ese ku mbuto dzese kuti acinyuke.
31 Ngokuti iyena akasanangura zuwa raacatonga nyika no unatsi eciseenzesa munhu waakagadza, uye iyena akazvigondesa anhu ese nge kumumutsa kubva ku akafa.”
32 Paakazwa ngezve kumutswa ke akafa, anganani awo akatanga kumuseka, asi amweni aibhuya kuti: “Isusu ticakupurutanazve paucareketazve nge zvazvo.”
33 Hino, Pauro wakabudepo,
34 asi anganani awo akabatana naye uye akagara atendi. Pakati pawo painga pano Dhiyoniziyo, uwo wainga ari mutongi mu tribhunari ye Areopago, mwanakadzi umweni waizwi Dhamari, no amweniwo.
Masoko ari pasi
^ Kana kuti: “anosovhiringidza anhu.”
^ Kana kuti: “wakanyangadzwa maningi mu mwoyo make.”
^ Ii yainga iri mbuto yaiseenzeswa no anhu pakutenga no kutengesa uye yaiizirhwawo misangano.
^ Kana kuti: “zvamunohwararira.”
