Zviito zve Aphostori 18:1-28
18 Mumasure mazvo, iyena wakabva ku Atena uye wakaguma ku Korinti.
2 Kweneyo, iyena wakagumira Mudjudha umweni wakabarirhwa ku Ponto waizwi Akira; iyena wainga wabva ku Itariya no mukadzi wake waizwi Prisira, ngokuti Karaudhiyo wainga wabhuya kuti Adjudha ese aidikana kubuda mu Roma. Hino iyena wakaenda kooavhakacira,
3 uye ngokuti aiita basa rakaezana, wakagara pa nyumba pawo uye wakaseenza nawo, ngokuti ese ainga ari agadziri e tenda.
4 Masabudu ese, iyena waiita mharidzo* mu sinagoga uye waibhuya zvinogutsa ku Adjudha no Agrego.
5 Sirasi na Timoti paakateredza ecibva ku Masedhoniya, Pauro wakatanga kuseenzesa nguwa yake yese pa basa re kuparidzira masoko a Mwari, ecipasa upupuri ku Adjudha uye ecipangidza pamhene kuti Djesu ndiye Kristu.
6 Ngokuti awona airumbwa ecimuphikisa uye ecimutuka, iyena wakagubudza macira ake uye wakati: “Ngazi yenyu ngaimbwerere pamusoro penyu. Inini andina ndaa pa nyaya ii. Kubvira zvino kuenda mberi, inini ndicaenda ku anhu e madzinza amweni.”
7 Ngokudaro, iyena wakabuda ipona* uye wakapinda mumba me mwanarume umweni unozwi Tisiyo Justu, munamati wa Mwari, nyumba yake yaigara pa muceto pe sinagoga.
8 Asi Krispo, mutungamiriri we sinagoga, wakagara mutendi muna Tenzi, pamwepo no ese e pa nyumba pake. Uye Akorinti akawanda ainga azwa soko ra Mwari, akatanga kutenda uye akabhabhatidzwa.
9 Uyezve, Tenzi akati kuna Pauro mu ciono cousiku: “Usathye, asi rumbwa wecireketa uye usanyarare,
10 ngokuti ndinewe uye apana acakurhwisa kuti akukuwadze; ngokuti anhu akawanda e mu thaundi iri nge angu.”
11 Ngokudaro, iyena wakarumbwa ari ikona ke gore rimwe no mwedzi mitanhatu, eciafundisa soko ra Mwari.
12 Gariyo paainga ari mutungamiriri we provhinsiya yo Akaya, Adjudha akabatana uye akarhwisa Pauro, omutora oenda naye ku tribhunari,
13 eciti: “Mwanarume uu ari kucengedzera anhu kuti anamate Mwari ngo mushobo usikapindirani no mutemo.”
14 Asi Pauro paaida kutanga kureketa, Gariyo wakati ku Adjudha: “Kudai izvi zvainga zvinocokuita no ciro cakashata kana ndaa yakakura, ndaizonyasa kumupurutanai.
15 Asi kana musiripi kupindirana nge ndaa ye masoko, mazina, kana nge ndaa ye mutemo wenyu, izvi nge zvenyu. Inini andidi kutonga zviro zvakadaro.”
16 Hino akaadzingira mu tribhunari.
17 Ngokudaro, akabata mutungamiriri we sinagoga waizwi Sostene, uye akatanga kumuponda pamberi po tribhunari. Asi Gariyo wainga asikadi kupindira mu nyaya idzi.
18 Mumasure me kugara ikona ke mazuwa akawanda, Pauro wakaenekana no hama uye wakakwira bharko woenda ku Siriya, eciperekedzwa na Prisira uye Akira. Ku Senkreya, wakapara zuda, ngokuti wainga waita mhiko.
19 Hino akaguma ku Efeso, uye iyena wakaasiya ikona; hino iyena wakapinda mu sinagoga uye wakacedza no Adjudha.
20 Kunyazi hazvo akamukumbira kuti ambogarezve ikona, iyena wakaramba,
21 asi wakaaeneka uye wakaabvunza kuti: “Ndicahwirirazve kuno kana Djehovha* akada.” Hino iyena wakakwira bharko ku Efeso
22 uye wakaguma ku Sezareya. Iyena wakakwidza* uye wakacungamidza ungano, pedzepo wakateredza ku Antiyokiya.
23 Mumasure me kugara ke cinguwa ikona, iyena wakaenda ku mbuto imwe na imwe mu mutanha wese we Garatiya no ku Frijiya, ecibambisa afundi ese.
24 Mudjudha umweni wakabarirhwa ku Areshandriya waizwi Aporo, wakaguma ku Efeso; iyena wainga ari mwanarume waiziya kureketa zvakanaka uye wainga ano ruziyo rakakura re Matarhwa.
25 Mwanarume uu wainga akafundiswa mu gwanza ra Djehovha,* uye waipipira mu mwiya,* iyena waireketa uye waifundisa ngo mwazvo ngezva Djesu, asi waiziya rubhabhatidzo ra Juau basi.
26 Iyena wakatanga kureketa mu sinagoga no ushingi, uye Prisira na Akira paakamuzwa, akamudainza pawo oga uye akanyasa kumupanganidzira gwanza ra Mwari.
27 Uyezve, sezvo iyena wainga ecida kuenda ku Akaya, hama dzakatarira afundi dzecikumbira kuti dzimutambire zvakanaka. Paakaguma ikona, iyena wakabetsera maningi aya ainga agara atendi no nyasha dza Mwari;
28 ngokuti iyena wainyasa kupangidza no simba pakadzara anhu kuti Adjudha ainga akapsveteka, eciapangidza mu Matarhwa kuti Djesu ndiye Kristu.
Masoko ari pasi
^ Kana kuti: “waicedzesana no anhu.”
^ Kureya kuti wakabuda mu sinagoga.
^ Onai pakazwi Kupanganidzwa ke Masoko.
^ Zvingadaro kuti wakakwidza ku Djerusarema.
^ Onai pakazwi Kupanganidzwa ke Masoko.
^ Pamweni pari kuda kureya ngezve mwiya wa Mwari.
