Zviito zve Aphostori 19:1-41
19 Aporo paainga ari ku Korinti, Pauro wakapinda no nharaunda dze mukati uye wakateredza ku Efeso. Iyena wakagumira afundi anganani ikona
2 uye wakaabvunzisa kuti: “Imwimwi makatambira here mwiya mucena pamakagara atendi?” Awona akadaira kuti: “Isusu atisati takambozwa kuti kuno mwiya mucena.”
3 Iyena wakaabvunzisa kuti: “Hino imwimwi makabhabhatidzwa no rubhabhatidzo ripi?” Awona akadaira kuti: “No rubhabhatidzo ra Juau.”
4 Pauro wakati: “Rubhabhatidzo ra Juau rainga riri cipangidzo ce kucinyuka, iyena waibvunza anhu kuti aidikana kutenda mu uya waizouya mumasure make, kureya kutenda muna Djesu.”
5 Mumasure mekuzwa izvi, awona akabhabhatidzwa mu zina ra Tenzi Djesu.
6 Uye Pauro paakaatsanzikira nyara, mwiya mucena wakauya paari, uye awona akatanga kureketa mireketero dzisiripi dzawo uye kuphorofita.
7 Ese awona ainga ari anarume angakwana 12.
8 Ke mwedzi mitatu, iyena wakaenda mu sinagoga uye wakareketa no ushingi, eciita mharidzo uye ecicedza nawo nge mushobo unogutsa panocokuita no Umambo wa Mwari.
9 Asi ngokuti anganani awo aiomesa mwoyo yawo eciramba kutenda uye aireketa zvakashata ngezve Gwanza iri re cokwadi pakati pe anhu, iyena wakaasiya oparadzanisa afundi nawo, uye mazuwa ese waiita mharidzo pa cikora ca Tirano.
10 Izvi zvakaitika ke makore mairi, dakara ese airarama mu provhinsiya yo Aziya, Adjudha, kutobatanidzawo Agrego, azwa soko ra Tenzi.
11 Mwari aiita mabasa makuru e simba anoshamisa eciseenzesa Pauro,
12 zvokuti kunyazi macira okupfeka no okupukuta nawo aipsvasa mwiri wake aitorhwa oendeswa kuno anhu airhwara, uye nhenda dzaipera, uye mwiya yakashata yaibuda.
13 Asi Adjudha anganani aiita rhwendo ku mbuto imwe na imwe ecidzingira madhimoni, akaedza kuseenzesa zina ra Tenzi Djesu ku aya ainga ano mwiya yakashata, eciti: “Mu zina ra Tenzi Djesu, uya unoparidzwa na Pauro, ndinomubvunzai kuti, budai.”
14 Ana 7 e mutungamiriri umweni we apristi we Cidjudha unozwi Sikevha, aiita izvona.
15 Asi mwiya uya wakashata wakaadaira kuti: “Inini ndinoziya Djesu uye ndinoziyawo Pauro; asi imwimwi muri ani?”
16 Hino mwanarume uya wainga ano mwiya wakashata wakaamhukira, wotanga kuponda umwe na umwe, uye aazi kukwanisana naye, zvekuti awona akatiza pa nyumba iyona asikazi kupfeka uye akakuwadzika.
17 Izvi zvakaguma pa kuziikanwa no anhu ese, Adjudha kutobatanidzawo Agrego airarama mu Efeso; uye anhu ese akathya, uye zina ra Tenzi Djesu rakarumbwa recikudzwa.
18 Akawanda ainga agara atendi aiuya koopupura uye kubhuya pamhene zviito zvawo.
19 Uye anhu akawanda aiita zvemasarapita, akaunganidza mabhuku awo uye akaapisa pamberi pe anhu ese. Paakaongorora mutengo wakhona, akaona kuti iwona waikwana 50 000 yo mare yo prata.
20 Hino soko ra Djehovha* rakarumbwa recikura no simba uye recikunda.
21 Mumasure mekuti zvese izvi zvaitika, Pauro wakaita cisananguro* cekuti kana akapedza kupinda no ku Masedhoniya uye no ku Akaya, acaenda ku Djerusarema. Iyena wakati: “Mumasure me kuenda ikona, ndinodikanawo kuenda ku Roma.”
22 Hino iyena wakatumira ku Masedhoniya abetseri ake airi, Timoti na Erasto, asi iyena wakarumbwa ari mu provhinsiya yo Aziya ke cinguwa.
23 Pa nguwa iyona, pakaoneka bongozozo rakakura nge ndaa ye Gwanza ro cokwadi.
24 Mwanarume umweni unozwi Dhimetriyo, waigadzira zvimifanikiso zve prata yo tempro ye Artemisi. Basa iri raipfumisa maningi anhu airiitewo.
25 Iyena wakaaunganidza, kutobatanidzawo no anhu amweni aiita basa irona uye wakati: “Anhumwi, imwimwi munonyasa kuziya kuti kubudirira kedu kunobva pa bhizi iri.
26 Asi zvino imwimwi muri kuona uye muri kuzwa kuti, mwanarume uu unozwi Pauro wacengedzera anhu akawanda uye waita kuti awona acinje marangariro awo, haiwa basi mu Efeso, asi kuda kutobatanidzawo Aziya yese, eciabvunza kuti anamwari akaizwa no nyara dze anhu aanamwaripi e zvirokwazvo.
27 Uyezve pano ngozi, haiwa basi ye kumbwera pa bhizi redu, asi pano ngoziwo yekuti tempro ya mwarikadzi mukuru Artemisi itange kuoniwa hingana kuti aina basa, uye kuti mwarikadzi uu unonamathwa mu provhinsiya yese yo Aziya uye mu nyika yese aruze mbiri yake.”
28 Paakazwa izvi, anarume aya akanyangadzwa uye akatanga kukhuwa eciti: “Artemisi we Aefeso ndiye mukuru!”
29 Hino bongozozo iri rakabararika mu thaundi, uye anhu ese akaenda ecigogoma mu mbuto inoizirhwa teatro, ecikwekweredza Amasedhoniya aihamba na Pauro anozwi Gayo na Aristarko.
30 Pauro waida kupinda mukati mainga muno anhu, asi afundi akamurambidza.
31 Kunyazi arongi anganani e mutambo uye makwikwi aipindirana na Pauro, akamutumira tsamba ecimudeketerera kuti asakande upenyu wake pa ngozi nge kuenda ku mbuto inoizirhwa teatro.
32 Pa nguwa iyona, anhu ainga ari ikona ainga asikapindirani; amweni aikhuwa izvi uye amweni aikhuwa zvimweniwo uye akawanda awo ainga asikatozvizii kuti ngei ainga akaungana ikona.
33 Hino akaita kuti Areshandre abude pakati pe anhu uye Adjudha akamusukumidzira mberi. Uye Areshandre wakamutsa moko kuti anhu anyarare, ngokuti waida kureketa kuti adzidziirire pamberi pe anhu.
34 Asi paakaona kuti iyena wainga ari Mudjudha, ese akatanga kukhuwa pamwepo ke nguwa dzinokwana kuita mbiri eciti: “Artemisi we Aefeso ndiye mukuru!”
35 Pakupedzesera, mumasure me kunyararisa anhu, mutungamiriri we thaundi* wakati: “Anhu e ku Efeso, ndiani asikazvizii kamare kuti thaundi ro Efeso ndiro rinocengeta tempro ya Artemisi mukuru uye no mufanikiso wakambwera wecibva kudenga?
36 Ngokuti zviro izvi zvitori pamhene kamare, imwimwi munodikana kuterama uye amudikani kuita zviro mecigogomeka.
37 Imwimwi maunzisa anhu aya kuno, ekuti amambavhapi e tempro kana anhu anotuka mwarikadzi wedu.
38 Hino kana Dhimetriyo no agadziri amweni e mifanikiso ano nyaya yaari kupumha munhu, pano mazuwa ekuti matribhunari anoungana uye pano magovhernadhori; angazounzisa nyaya dzaari kupumhana.
39 Asi kana mecida zvimweni zvinodarika izvi, nyaya ii inodikana kutongwa no anhu ese maererano no mutemo.
40 Ngokuti isusu tiri pa ngozi ye kupumhwa kuti tapandukira utongi nge ndaa ye izvi zvaitika nyamasi, sezvo apana cikonzero catingareketa kuti ngei isusu tamutsa bongozozo iri.”
41 Uye paakapedza kureketa masoko aya, akabvunza anhu kuti aende hawo.
Masoko ari pasi
^ Onai pakazwi Kupanganidzwa ke Masoko.
^ Kana kuti: “wakaita cisananguro mu mwoyo make.”
^ Kana kuti: “mutari we zvaiitika mu thaundi.”
