Zviito zve Aphostori 2:1-47
2 Hino pa zuwa rekutanga re Mutambo we Pentekosti, ese ainga akaungana mu mbuto imweyo.
2 Ciriporipoco kakazika kutinhira kecibva kudenga, ikona kainga kakaezana no kutinhira ke dutu rino simba, uye kutinhira uku kakadzadza nyumba yaainga akagara.
3 Uye awona akatanga kuona zvakaita hinga rurumi re muriro uye izvona zvakabararika zvogara pamusoro pe umwe na umwe wawo,
4 ese akadzadzwa no mwiya mucena uye akatanga kureketa mireketero yakasiyana-siyana, maererano no kutungamirirhwa kaaiizwa no mwiya mucena.
5 Mu mazuwa awona, Adjudha aithya Mwari aibva ku nyika dzese dziri pasi pe denga ainga ari ku Djerusarema.
6 Hino, anhu paakazwa kutinhira kuya, awona akaungana uye akashamisika, ngokuti umwe na umwe waizwa afundi ecireketa mu mureketero wake.
7 Zvezvirokwazvo, awona akashamisika maningi uye akati: “Ese ari kureketeya aanhupi e ku Garireya here?
8 Hino ngei umwe na umwe wedu uri kuazwa mu mureketero wake?*
9 Pakati pedu, pano anhu e ku Partiya, e ku Medhiya, e ku Erami, agari e ku Mezopotamiya, e ku Djudhiya no e ku Kapadhosiya, e ku Ponto, no e ku provhinsiya yo Aziya,
10 e ku Frijiya no ku Panfiriya, e ku Edjipitu no e mitanha yo ku Ribhiya dhuze no ku Sirene, avhakaci akabva ku Roma, Adjudha no anhu akatendeuka kuti agare Adjudha,
11 e ku Kreta, no e ku Arabhiya. Isusu taazwa ecireketa no mireketero yedu ngezve zviro zvinoshamisa zva Mwari.”
12 Zvezvirokwazvo, ese akashamiswa uye akapererhwa no mazano, uye aibvunzisana kuti: “Zviro izvi zvinoreyei?”
13 Asi amweni aiaseka uye aibhuya kuti: “Awona akararadza ngo kumwa maningi vhinyu inotapira.”*
14 Asi Pedru wakaima pamwepo no afundi 11 uye wakati no izwi guru: “Anhu e ku Djudhiya no mwese imwimwi agari e mu Djerusarema, nyasai kupurutana uye izwai zvandicabhuya.
15 Kubhuya zvirokwazvo, anhu aya aazi kuraradza hinga zvamuri kurangarira, ngokuti dziciri 9 dze macibesi.*
16 Asi izvi ndizvo zvakarekethwa peciseenzeswa muphorofita Joeri:
17 “Mwari anoti: ‘Mu mazuwa e kupedzesera, ndicadurura mwiya wangu pamusoro pe anhu e mushobo wese,* uye ana enyu e anarume no e anakadzi acaphorofita, madjaha enyu acaona zviono uye anarume acembera acaroteswa,
18 uye mu mazuwa awona ndicatodurura mwiya wangu pa aranda angu e anarume no e anakadzi, uye awona acaphorofita.
19 Uye ndicaita zvishamiso kumusoro kudenga, uye zvipangidzo pasi pa nyika: Ngazi, muriro uye makuta e cutsi.
20 Zuwa guru uye rinokudzwa ra Djehovha* risati raguma, zuwa ricasvipa uye mwedzi ucapsvuka hinga ngazi.
21 Uye munhu wese anodainza zina ra Djehovha* acaponeswa.”’
22 “Anhu e Israeri, izwai masoko aya: Djesu we ku Nazareta ainga ari munhu akapangidzwa pamhene na Mwari no mabasa e simba, zvishamiso uye zvipangidzo zvakaizwa na Mwari pakati penyu eciseenzesa iyena, hinga zvamunoziya.
23 Munhu uu akaunziswa kamuri maererano no kuda ka Mwari uye no kuziya kake zvicaitika, makamukhomera pa mutanda meciseenzesa nyara dzo ashaishi, uye makamuuraya.
24 Asi Mwari akamumutsa, ecimusudzunura pa marhwadzo* e rufu, ngokuti zvainga zvisikaiti kuti rufu rirumbwe rakamusunga.
25 Ngokuti Dhavhidhi wakati nge zvake: ‘Ndinoita kuti Djehovha* arumbwe ari pamberi pangu,* ngokuti iyena ari ku moko kwawo wangu, kuitira kuti ndisazombozungunuswe.
26 Ndiyo ndaa, mwoyo wangu wadakadzwa uye rurumi rangu rapfara maningi. Uye ndicararama* no kariro;
27 ngokuti amuzondisii* ndiri mu Guwa,* uye amuzotenderi kuti wakagondeka wenyu aore.
28 Imwimwi makaita kuti ndiziye makwanza e upenyu; imwimwi mucandidzadza no mupfaro pamberi penyu.’
29 “Hama dzangu, ndisiyei ndirekete ndakasudzunuka ngezva tsekuru edu Dhavhidhi: Awona akafa okotswa, uye guwa rawo riri pakati pedu dakara nyamasi uno.
30 Ngokuti wainga ari muphorofita uye waizviziya kuti Mwari ainga amugondesa kuti umwe we ana ake waizogara pa cigaro cake ce umambo,
31 iyena wainga wakareketa kare ngezve kumutswa ka Kristu, uye wakareketa kuti iyena ainga asikazosiiwi mu Guwa* uye nyama yake yainga isikazoori.
32 Mwari akamutsa Djesu uu, uye tese isusu tiri apupuri azvo.
33 Hino, ngokuti iyena akakudzwa ku moko kwawo wa Mwari uye akatambira mwiya mucena wecibva kuna baba, iyena akadurura zvamuri kuona no kuzwa.
34 Ngokuti Dhavhidhi aazi kukwira kudenga, asi iyena wakati: ‘Djehovha* akati kuna Tenzi wangu: “Gara ku moko kwawo wangu
35 dakara ndakanda azondi ako pasi pe tsoka dzako.”’
36 Hino, Israeri yese ngainyase kuziya kuti zvezvirokwazvo Mwari aita kuti Djesu uu wamakakhomera pa mutanda agare Tenzi uye Kristu.”
37 Paakazwa izvi, akanetseka mu mwoyo, uye akabvunza Pedru no aphostori amweni kuti: “Hama, tinodikana kuitei?”
38 Pedru wakaabvunza kuti: “Cinyukai uye umwe na umwe wenyu ngaabhabhatidzwe mu zina ra Djesu Kristu, kuti murekererhwe zvitema zvenyu, uye mucatambira cipo ce mwiya mucena.
39 Ngokuti cipikirhwa cakaizirhwa imwimwi no ana enyu, uye no ese aya ari kure, ese aya acadainzwa na Djehovha* Mwari wedu kuti auye kaari.”
40 Uye iyena wainyasa kuapupurira uye waiakohomedzesa no masoko amweni akawanda eciti: “Poneswai pa mubarirhwana uu wakashata.”
41 Hino, anhu aya akatambira no mupfaro masoko ake, akabhabhatidzwa, uye pa zuwa irona anhu* anokwana 3000 akabatana nawo.
42 Airumbwa ecizwira fundiso dze aphostori, eciungana ari pamwepo,* ecirhya ari pamwepo, uye eciita minamato.
43 Zvezvirokwazvo, ese akathya, uye aphostori akatanga kuita zvishamiso no zvipangidzo zvakawanda.
44 Ese akagara atendi ainga ari pamwepo uye aipasana zviro zvese,
45 aitengesa minda dzawo no zviro zvawo uye aikowanisana mareyo, maererano no zvaidiwa no umwe na umwe wawo.
46 Uye airumbwa ari mu tempro mazuwa ese no cinangwa cimweco, airhya pa nyumba pe umwe na umwe wawo, aipasana zvokurhya no mupfaro mukuru uye zvecibva pa mwoyo,
47 ecikudza Mwari uye eciita kuti anhu ese aapfarire. Pa nguwa imweyo, mazuwa ese Djehovha* airumbwa eciatunhudzirira aya ainga eciponeswa.
Masoko ari pasi
^ Kana kuti: “mureketero wa mai.”
^ Kana kuti: “vhinyu ipsva.”
^ Kana kuti: “nguwa yocitatu.”
^ Cigrego: “pe nyama yese.”
^ Onai Apendi. A5.
^ Onai Apendi. A5.
^ Mabhaibheri amweni anoti: “mapote.”
^ Kana kuti: “pe madziso angu.”
^ Onai Apendi. A5.
^ Cigrego: “nyama yangu icararama.”
^ Kana kuti: “amuzosii mwiya wangu.”
^ Kana kuti: “mu Hadhesi,” kureya guwa rinokandwa anhu ese. Onai pakazwi Kupanganidzwa ke Masoko.
^ Kana kuti: “mu Hadhesi,” kureya guwa rinokandwa anhu ese. Onai pakazwi Kupanganidzwa ke Masoko.
^ Onai Apendi. A5.
^ Onai Apendi. A5.
^ Kana kuti: “mwiya.”
^ Kana kuti: “aipasana zviro zvawo.”
^ Onai Apendi. A5.
