Zviito zve Aphostori 20:1-38
20 Bongozozo parakapera, Pauro wakadainza afundi, uye mumasure me kuabambisa uye me kuenekana nawo, iyena wakaenda ku Masedhoniya.
2 Iyena wakahamba mu mitanha iyona uye wakabvunza afundi masoko akawanda e kubambisa, uye pedzepo wakaguma ku Gresiya.
3 Iyena wakagareyo ke mwedzi mitatu, asi ngokuti Adjudha ainga amurongera zvakashata paainga ecida kukwira navhiyo* kuti aende ku Siriya, iyena wakasanangura kuhwirira no ku Masedhoniya.
4 Iyena wainga ecihamba na Sopateri, mwana wa Piro, we ku Bhereya; Aristarko uye Sekundo, e ku Tesaronika; Gayo, we ku Dherbhe; Timoti; uye Tikiko na Trofimo, e ku provhinsiya yo Aziya.
5 Anarume aya akatungamira uye akatietsera ku Troadhe;
6 mumasure me mazuwa e Pau Dzisina Mbiriso, isusu takakwira navhiyo ku Firipo, uye mumasure me mazuwa mashanu takaagumira ku Troadhe, uko katakagara ke mazuwa manomwe.
7 Pa zuwa rekutanga re sumana, patainga takaungana kuti tirhye, Pauro wakatanga kureketa no anhu ainga ari ipona, sezvo iyena waida kuenda mangwana akhona; iyena wakarumbwa ecireketa dakara pakati pe usiku.
8 Ndiyo ndaa, mu nyumba ye pamusoro matainga takaungana mainga muno zvibani zvakawanda.
9 Mudjaha umweni unozwi Eutiko wainga wakagara pa janera uye wakabathwa no hope Pauro paainga ecireketa, iyena wainga uno hope maningi zvekuti wakambwera kubva pa andari yocitatu. Paakazomubata, iyena wainga wafa.
10 Asi Pauro wakacita, wakamuwatira, womukhumbatira, uye wakati: “Musanetseke, ngokuti iyena ari mupenyu.”
11 Hino Pauro wakakwira kumusoro, wakagura pau uye orhya. Iyena wakarumbwa ecireketa ke nguwa yakawanda dakara kaedza, uye pedzepo wakaenda.
12 Hino awona akatora mudjahewo uye akanyaradzwa maningi, ngokuti iyena wainga ari mupenyu.
13 Isusu takatungamira dakara ku navhiyo uye takaenda ku Aso, uko kataida kuzotambira Pauro. Iyena wainga watibvunza kuti tiite izvona, ngokuti waida kuendeyo no tsoka.
14 Hino patakasongana naye ku Aso, isusu takamukwidza mu navhiyo uye takaenda naye ku Mitirene.
15 Mangwana akhona, takakwira navhiyo uye takaguma dhuze no Kiyo. Pa zuwa rakazoteera takaima ke nguwa doko ku Samo, uye mangwana akhona, takaguma ku Mireto.
16 Pauro wainga wasanangura kutama kuima ku Efeso, kuti asapedze nguwa mu provhinsiya yo Aziya, ngokuti iyena waida kuguma ku Djerusarema nokukasika, kana zvecibvira, waida kuguma pa zuwa re Mutambo we Pentekosti.
17 Asi paainga ari ku Mireto, iyena wakadainzisa akuru e ungano yo Efeso.
18 Paakaguma, iyena wakati kaari: “Imwimwi munonyasa kuziya muhambiro wandakagara nawo pakati penyu kubvira pa zuwa rokutanga randakaguma mu provhinsiya yo Aziya,
19 ndakaseenzera Tenzi hinga muranda no kudzidodosa kese* uye no misodzi, ndecibatana no matambudziko nge ndaa ye kurongerhwa zvakashata no Adjudha,
20 andizi kusiya kumubvunzai ciro cipi haco cinobetsera* kana kusiya kumufundisai pakadzara anhu uye pa nyumba no nyumba.
21 Asi ndakapasa upupuri wakakwana ku Adjudha uye ku Agrego wekuti aidikana kucinyuka, ohwirira kuna Mwari uye otenda muna Tenzi wedu Djesu.
22 Uye zvino, ndecitungamirirhwa* no mwiya, ndiri kuenda ku Djerusarema, kunyazi ndisikazvizii zvicandiitikira ikona;
23 asi candinoziya basi nge cekuti, mu thaundi rimwe na rimwe, mwiya mucena unosondibvunza kakawanda kuti ndicazosungwa uye ndicazosongana no matambudziko akawanda.
24 Kunyazi zvakadaro, inini andioni upenyu* wangu hinga kuti unokosha kandiri; asi cinokosha kandiri nge cekuti ndinodikana kupedza kugogoma kangu uye basa randakapaswa na Tenzi Djesu: Kupasa upupuri wakakwana ngezve masoko akanaka anocokuita no nyasha dza Mwari.
25 “Zvino, ndaakuzviziya kuti apana kana umwe wenyu wandakaparidzira ngezve Umambo acaonazve hope yangu.
26 Hino nyamasi muri apupuri ekuti ndakacena pa ngazi ye anhu ese,
27 ngokuti andizi kumborekera kumubvunzai zviro zvese zvinocokuita no kuda* ka Mwari.
28 Nyasai kudzingwarira imwimwi pacenyu uye no mabira ese, amakagadzwa no mwiya mucena kuti mugare aonereri, kuti muushe ungano ya Mwari yaakatenga no ngazi yo Mwana wake kamare.
29 Ndinozviziya kuti kana ndikaenda, pakati penyu panozopinda mhumhi dzinothyisa,* dzisikazobati mabira no upfawi,
30 uye pakati penyu panozobuda anhu anozoreketa zviro zvakashata zvinopausa afundi kuti ateerere awona.
31 “Hino rumbwai makamuka uye edzurirai kuti ke makore matatu, usiku no masikati, andizi kumboima kukohomedzesa umwe na umwe wenyu no misodzi.
32 Uye zvino, inini ndiri kumukandai mu nyara dza Mwari uye mu nyara me soko rinocokuita no nyasha Dzake, iro rinokwanisa kumubambisai uye kumupasai nhaka pakati pe acena ese.
33 Andizi kusirira prata kana oro, kunyazi macira e munhu.
34 Imwimwi kamare munozviziya kuti ndakaseenza no nyara dzangu kuti ndione zvandaida uye zvaidiwa no adoni angu.
35 Ndakamupangidzai pa zviro zvese kuti, kana meciseenza no simba kudai, munodikana kubetsera aya asina simba uye kuedzurira masoko a Tenzi Djesu, paakati: ‘Kupasa kuno mupfaro kudarika kutambira.’”
36 Mumasure me kureketa zviro izvi, wakagodama no ese awona uye wakanamata.
37 Ese akatanga kucema maningi, hino akakhumbatira* Pauro uye akamupsvoda,
38 ngokuti ainga akatsukwara maka-maka nge zviya zvaainga aabvunza kuti ainga asikazoonizve hope yake. Pedzepo akamuperekedza kuenda ku navhiyo.
Masoko ari pasi
^ Kana kuti: “bharko rakakura.”
^ Kana kuti: “kudzidodosa ke mu ndangariro.”
^ Kana kuti: “cakamunakirai.”
^ Kana kuti: “ndecibambidzirhwa.”
^ Kana kuti: “mwiya.”
^ Kana kuti: “cinangwa ca.”
^ Kana kuti: “dzinodzvinyirira.”
^ Cigrego: “akawira pa mutsipa wa.”
