Zviito zve Aphostori 21:1-40
21 Patakazokwanisa kuparadzana nawo uye kukwira mu navhiyo, takaenda ku Kosi; pa zuwa rakazoteera takaenda ku Rodhe, uye kubva ikona takaenda ku Patara.
2 Patakaona navhiyo yaienda ku Fenisiya, takaikwira uye takaenderera mberi no rhwendo.
3 Patainga taakuona citsuwa ce Shipre, takacisiya ngo ku moko we boshwe tecienda ku Siriya, takazoima ku Tiro, uko kaizocitiswa zviro zvainga zviri mu navhiyo.
4 Takapsvaka afundi uye takaaona uye takagareyo ke mazuwa 7. Asi ecitungamirirhwa no mwiya, awona aibvunza Pauro kakawanda kuti asaende ku Djerusarema.
5 Hino, nguwa yataida kugara ikona payakapera, takaenderera mberi no rhwendo redu; uye afundi ese, kutobatanidzawo anakadzi no ana adoko, akatiperekedza dakara kunza ke thaundi. Hino, takagodama pamuceto pe bahari uye takaita munamato
6 uye takaenekana nawo. Pedzepo takakwira navhiyo, uye awona akahwirira kumba kawo.
7 Takaenderera mberi no rhwendo redu ro kubva ku Tiro no navhiyo dakara taguma ku Pitorimaidha; takacungamidza hama uye takagara nawo ikona ke zuwa rimwe.
8 Pa zuwa rakazoteera, takaenda uye takaguma ku Sezareya, ikona takapinda mumba ma Firipi, muvhangeri, iyena wainga ari umwe we anarume 7, uye takagara naye.
9 Mwanarume uu wainga ano ana 4 e anakadzi ainga asati awakwa* aiphorofita.
10 Mumasure me kugara ipona ke mazuwa akawanda, muphorofita umweni unozwi Agabho wakauya ecibva ku Djudhiya.
11 Iyena wakauya katainga tiri, wakatora bhande ra Pauro, wakasunga mirenje no moko dzake uye wakati: “Mwiya mucena unoti: ‘Muridzi we bhande iri ucasungwa kudai nge Adjudha ku Djerusarema, uye awona acamukanda mu nyara dze anhu e madzinza amweni.’”
12 Patakazwa izvi, isusu kutobatanidzawo no anhu ainga ari ipona, takatanga kumudeketerera kuti asakwidze ku Djerusarema.
13 Hino Pauro wakadaira kuti: “Muri kuitei, ngei muri kucema uye meciedza kundipedza simba?* Ziyai kuti ndakagadzirira haiwa basi kuti ndisungwe, asi ndakagadzirirawo kufa mu Djerusarema nge ndaa yo zina ra Tenzi Djesu.”
14 Ngokuti atizi kukwanisa kuita kuti acinje mazano, atizi kurumbwa tecimudeketerera kuti asaende* uye takati: “Kuda ka Djehovha* ngakuizwe.”
15 Hino mumasure me mazuwa awona, takagadzirira rhwendo uye takatanga kuenda ku Djerusarema.
16 Afundi anganani e ku Sezareya akaenda nesu, uye akatitora oenda nesu kumba ka Minasoni, we ku Shipre, umwe we afundi ekutanga; isusu taizogara ipona.
17 Patakaguma ku Djerusarema, hama dzakatitambira no mupfaro.
18 Pa zuwa rakazoteera, Pauro wakaenda nesu koosongana na Tiyago uye akuru ese ainga ari ikona.
19 Iyena wakaacungamidza uye wakanyasa kuapanganidzira ngezve zviro zvainga zvaizwa na Mwari pakati pe anhu e madzinza amweni peciseenzeswa basa raakaita.
20 Mumasure me kuzwa izvi, awona akatanga kukudza Mwari, asi akamubvunza kuti: “Hama yedu, uri kuona kuti pano Adjudha akawanda akagara atendi, uye ese awona anobatisisa Mutemo.
21 Asi awona akazwa kuti iwewe uri kufundisa Adjudha ese ari kurarama pakati pe anhu e madzinza amweni kuti asararame maererano no Mutemo wa Mozesi, weciabvunza kuti asaite ucekeri ana awo uye asatondoedze tsika dzinodikana kucengethwa.
22 Hino ticaitei nge zvazvo? Ngokuti awona acazwa kuti iwewe waguma.
23 Hino ita zvaticakubvunza: Tino anarume 4 pano ano mhiko yaari kuda kudzadzisa.
24 Enda no anarume aya uye dzicenese pamwepo nawo maererano no mutemo, woapasa zvese zvaanonga ecida kuti aparhwe misoro yawo. Ngokudaro, anhu ese acaziya kuti zviri kurekethwa nge zvako azvirokwazvopi, asi kuti iwewe uri kuhamba zvakanaka uye uri kuzwira Mutemo.
25 Ku atendi ari pakati po madzinza amweni, takaatumira soko teciabvunza zvatainga tasanangura zvokuti anodikana kurumbwa ecisiya zviro zvakabairhwa zvidhori, ngazi, zviro zvakabongonyorhwa,* uye uhure.”*
26 Hino pa zuwa rakazoteera, Pauro wakaenda no anarume aya uye wakadzicenesa maererano no mutemo pamwepo nawo; mumasure mazvo, wakapinda mu tempro kuti aaziise zuwa raaizopedza kudzicenesa uye paaizodikana kupasa mupiro nge ndaa yo umwe na umwe wawo.
27 Mazuwa 7 paainga aakuda kupera, Adjudha e ku Aziya akamuona mu tempro, akaita kuti paoneke woyo-woyo, uye akamubata,
28 ecikhuwa eciti: “Anhu e ku Israeri, tibetsereiwo! Uu ndiye mwanarume uri kufundisa ese, mu matii ese, zviro zvisikapindirani no anhu edu, zvisikapindirani no Mutemo uye zvisikapindirani no mbuto ino. Uyezve, iyena waunzisa Agrego mu tempro uye wasvipisa mbuto ino yakacena.”
29 Ngokuti ainga akamboona Trofimo, we ku Efeso, ari pamwepo naye mu thaundi, uye akarangarira kuti Pauro wainga aenda naye mu tempro.
30 Mu thaundi rese makaitika woyo-woyo, uye anhu akawanda akauya ecigogoma, akabata Pauro omukwekweredzera kunza ko tempro, uye ciriporipoco musuwo dzakafungwa.
31 Paaiedza kumuuraya, mutungamiriri we masurudado wakatambira soko rekuti thaundi rese re Djerusarema rainga riri mu bongozozo;
32 ciriporipoco, iyena wakatora masurudado uye akuru e masurudado, ogogoma ecienda kainga kuno anhu. Anhu paakaona mutungamiriri we masurudado uye no masurudado, akaima kuponda Pauro.
33 Mutungamiriri we masurudado wakakhwedera, womubata uye wakaita kuti asungwe ngo makorenti mairi; pedzepo wakamubvunzisa kuti wainga ari ani uye kuti wainga aitei.
34 Asi anganani ainga ari pakati pe anhu aikhuwa izvi, uye amweni aikhuwawo zvimweni. Hino sezvo zvainga zvisikaziikanwi kuti ngei painga paizwa bongozozo iri, iyena wakaita kuti Pauro atorhwe oendeswa ku kwarteri.
35 Paakaguma pa masikada, masurudado akatozoita zvokumuthwara, nge ndaa yo anhu aida kumukuwadza,
36 ngokuti anhu akawanda aimuteera ecikhuwa eciti: “Muurayei!”
37 Paainga aakuda kupinda mu kwarteri, Pauro wakabvunzisa mutungamiriri we masurudado kuti: “Zvinotenderhwa here kuti ndirekete na imwimwi?” Iyena wakati: “Iwewe unokwanisa kureketa Cigrego?
38 Hino andiwepi here Muedjipitu wekuti pa nguwa yakadarika wakaita kuti anhu apandukire anyautongi uye wakatora mabhinya* 4000 woenda nawo ku renje?”
39 Pauro wakadaira kuti: “Kubhuya zvazviri, ndiri Mudjudha, we ku Tarso, rimwe re mathaundi anokosha e ku Sirisiya. Hino ndiri kukumbirawo kuti munditendere kureketa no anhu.”
40 Mumasure me kutenderhwa, Pauro wakaima pa masikada, uye wakanyararisa anhu eciseenzesa moko wake. Anhu paakanyarara, iyena wakareketa nawo mu mureketero we Cihebheru, eciti:
Masoko ari pasi
^ Cigrego: “ainga aciri mhandwe.”
^ Kana kuti: “kurembesa mwoyo wangu.”
^ Cigrego: “takanyarara.”
^ Onai pakazwi Kupanganidzwa ke Masoko.
^ Cinyama cakauraiwa cisikazi kudururhwa ngazi, izvi zvinobatanidzawo cinyama cakafa coga.
^ Mu Cigrego, porneia. Onai pakazwi Kupanganidzwa ke Masoko.
^ Kana kuti: “anyamapanga.”
