Zviito zve Aphostori 22:1-30
22 “Hama dzangu uye madzibaba, zvino izwai zvandicamubvunzai kuti ndidzidziirire.”
2 Paakazwa kuti iyena wainga ecireketa nawo no mureketero we Cihebheru, awona akabambirira kunyarara. Hino iyena wakati:
3 “Ndiri Mudjudha wakabarirhwa ku Tarso yo Sirisiya, asi ndakafundiswa mu thaundi rino na Gamariyeri. Ndakafundiswa kuti ndinyase kutondoedza Mutemo we madzitsekuru edu, ndecishingairira Mwari, hinga zvamuri kuita nyamasi.
4 Inini ndaiteerera anhu e Gwanza iri dakara pa kufa kawo, ndecisunga no kukanda mu kadheya anarume kutobatanidzawo no anakadzi;
5 izvi zvingatopupurirhwawo no mupristi mukuru uye ungano yese ye akuru. Awona akandipasa tsamba dzandaida kuti ndiende nadzo ku hama dzo ku Dhamasko, inini ndainga ndiri mu gwanza kuti ndiende kootora ainga ari ikona kuti ndiuye nawo ku Djerusarema akasungwa, kuti aphanicwe.
6 “Asi pandaiita rhwendo, padzaikwana kuita 12 dzo masikati, inini ndainga ndaapadhuze no Dhamasko, uye ciriporipoco pandainga ndiri pakadjeka nge ndaa ye ciedza cakakura cakabva kudenga,
7 uye ndakambwera pasi, ndozwa izwi recindibvunzisa kuti: ‘Sauro, Sauro, ngei uri kunditeerera?’
8 Inini ndakadaira kuti: ‘Ndimwi ani Tenzi?’ Iyena akandibvunza kuti: ‘Ndini Djesu we ku Nazareta, uya wauri kuteerera.’
9 Uye anarume andainga ndinawo akaona ciedza, asi aazi kuzwa izwi re uya ainga ecireketa na inini.
10 Hino ndakabvunzisa kuti: ‘Zvinyi zvandinodikana kuita Tenzi?’ Tenzi akadaira kuti: ‘Purumuka uende ku Dhamasko, uye kweneyo iwewe ucaziiswa ngezve basa rese rawakagadzwa kuti uite.’
11 Asi ngokuti ndainga ndisikacakwanisi kuona nge ndaa yo ciedza ciya, ndakaguma ku Dhamasko ndakabathwa nyara no aya andainga ndinawo.
12 “Hino mwanarume umweni waizwi Ananiya, waithya Mwari panocokuita no Mutemo, uye waipupurirhwa zvakanaka no Adjudha ese e mbuto iyona,
13 wakauya koondipsvaka. Iyena wakaguma padhuze na inini uye wakandibvunza kuti: ‘Hama yangu Sauro, onazve!’ Uye kubvira pa nguwa iyona inini ndakatanga kuonazve uye ndakamuona.
14 Iyena wakati: ‘Mwari we madzitsekuru edu akusanangura kuti uziye kuda kake, kuti uone munatsi uye kuti uzwe izwi rinobuda mu muromo make,
15 ngokuti iwewe ucagara mupupuri wake* pamberi pe anhu ese, we zviro zvawakaona no zvawakazwa.
16 Uye zvino, cinyi cauri kuetsera? Purumuka ubhabhatidzwe, uye suka zvitema zvako ngo kudainza zina rake.’
17 “Asi mumasure me kuhwirira ku Djerusarema, inini ndainga ndecinamata mu tempro uye ndakatanga kuona ciono,
18 ndakaona Tenzi ecindibvunza kuti: ‘Kasika, buda mu Djerusarema, ngokuti awona aazotendi upupuri waucaapasa nge zvangu.’
19 Hino ndakati: ‘Tenzi, awona anonyasa kuzviziya kuti mu sinagoga imwe na imwe inini ndaisunga uye ndaiponda aya aitenda mamuri;
20 uye pa nguwa yaidururhwa ngazi ye mupupuri wenyu Estevha, inini ndainga ndiripoo, ndecitendera kuuraiwa kake uye ndecionerera macira e aya aimuuraya.’
21 Asi iyena akandibvunza kuti: ‘Enda, ngokuti ndicakutumira ku nyika dziri kure.’”
22 Awona akamupurutana dakara paakareketa masoko aya. Hino awona akakhuwa eciti: “Bvisai pa nyika munhu uu, ngokuti iyena aazi kusisira kurarama!”
23 Ngokuti awona aikhuwa, ecikhandira macira awo okunza, uye ecikhandira mataka mudenga,
24 mutungamiriri we masurudado wakaita kuti Pauro apinzwe mukati me kwarteri uye wakaita kuti iyena abvunziswe eciita zvokumuponda, kuti anyase kuziya kuti ngei anhu ainga ecimukhuwira kudaro.
25 Asi mumasure me kumusunga kuti amuponde, Pauro wakabvunzisa mukuru-mukuru we masurudado wainga ari ipona kuti: “Mutemo unotendera here kuti imwimwi muponde Muroma asati atongwa?”
26 Mukuru-mukuru we masurudado paakazwa izvi, wakaenda koobvunza mutungamiriri we masurudado kuti: “Muri kuda kuitei? Mwanarume uu ndi Muroma.”
27 Ndiyo ndaa, mutungamiriri we masurudado wakamukhwederera uye wakamubvunzisa kuti: “Ndibvunze, iwewe uri Muroma?” Iyena wakadaira kuti: “Honde.”
28 Hino mutungamiriri we masurudado wakati: “Inini ndakatenga no mare yakawanda zvitenderhwa zve kugara umwe we Aroma.” Pauro wakati: “Asi inini ndakatobarhwa ndino zvitenderhwa izvona.”
29 Ngokudaro, anarume ainga aakuda kumuita mibvunzo uye kumuponda, akahwirira sure nokukasika. Uye mutungamiriri we masurudado wakathya paakaziya kuti iyena wainga ari Muroma uye kuti wainga amusunga no makorenti.
30 Hino, pa zuwa rakazoteera, ecida kunyasa kuziya kuti ngei iyena wainga ecipumhwa no Adjudha, wakamusudzunura uye wakaita kuti atungamiriri e apristi no Sinedriyo yese aungane. Hino iyena wakaita kuti Pauro ateredze uye wakamuimisa pakati pawo.
Masoko ari pasi
^ Kana kuti: “mupupuri wa Djesu.”
