Zviito zve Aphostori 23:1-35
23 Ecinyasa kuringira Sinedriyo, Pauro wakati: “Hama dzangu, inini ndakagara no maitiro akanaka pamberi pa Mwari no hana yakanyasa kucena dakara nyamasi.”
2 Nge ndaa yazvo, mupristi mukuru Ananiya wakabvunza anhu ainga ari padhuze naye kuti amuponde pa muromo.
3 Hino Pauro wakamubvunza kuti: “Iwe mucengedzi,* Mwari acakuponda. Iwewe unogara kuti unditonge maererano no Mutemo, asi ngo dii rimweni unoposha Mutemo ngo kubvunza anhu kuti andiponde?”
4 Aya ainga ari ipona akati: “Iwewe uri kutuka mupristi mukuru wa Mwari here?”
5 Uye Pauro wakadaira kuti: “Hama dzangu, inini ndainga ndisikazvizii kuti iyena ndi mupristi mukuru. Ngokuti zvakatarhwa kuti: ‘Usarekete zvakashata ngezve mutongi we anhu ako.’”
6 Pauro, eciziya kuti anganani awo ainga ari Asadhusi asi amweni awo ainga ari Afarisi, wakati no izwi guru mu Sinedriyo: “Hama dzangu, inini ndiri Mufarisi, mwana we Afarisi. Inini ndiri kutongwa nge ndaa yo kariro ye kumutswa ke akafa.”
7 Paakabhuya izvi, pakaoneka kutama kupindirana pakati pe Afarisi no Asadhusi, uye Sinedriyo yakatanga kupesana.
8 Ngokuti Asadhusi anoti akuna rumuko, akuna ngirozi, kana mwiya, asi Afarisi anotenda* zviro zvese izvi.
9 Ngokudaro, awona akatanga kureketedzana maningi, uye atari anganani e ku dii ro Afarisi akapurumuka uye akatanga kuita hasha dzinothyisa, eciti: “Atiripi kuona ndaa ino mwanarume uu, pamweni mwiya kana ngirozi yareketadi naye. . .”
10 Hino kureketedzana uku kakabambirira, uye mutungamiriri we masurudado waithya kuti Pauro waizogurhwa-gurhwa nawo, uye wakatuma masurudado kuti ateredze uye amubvise pakati pawo omuendesa ku kwarteri.
11 Asi pa usiku iwona, Tenzi akauya pa dii rake uye akamubvunza kuti: “Shinga! Ngokuti hinga mushobo wawakapasa upupuri wakakwana nge zvangu ku Djerusarema, ucapawo upupuri ku Roma.”
12 Pakainga kaedza, Adjudha akapangana uye akaita mhiko yekuti aizotukwa, kana akarhya kana kumwa asati auraya Pauro.
13 Anarume akapangana no kuita mhiko ii aidarika 40.
14 Anarume aya akaenda ku atungamiriri e apristi no ku akuru uye akaabvunza kuti: “Isusu takaita mhiko kuti taizotukwa kana tikarhya ciro cipi haco tisati tauraya Pauro.
15 Hino imwimwi, pamwepo no Sinedriyo, munodikana kubvunza mutungamiriri we masurudado kuti auye naye pamberi penyu hingana kuti muri kuda kunyasa kuongorora nyaya yake. Asi asatoti aguma kamuri, tinonga takatogadzirira kumuuraya.”
16 Asi, mwana wa yaya a Pauro wakaziya ngezve mazano aya aaironga; iyena wakapinda mu kwarteri uye wakabvunza Pauro zvese.
17 Ngokudaro, Pauro wakadainza umwe we akuru-akuru e masurudado uye wakamubvunza kuti: “Endai no murumbwana uu ku mutungamiriri we masurudado, ngokuti ano zviro zvaari kuda kumubvunza.”
18 Hino iyena wakamutora woenda naye ku mutungamiriri we masurudado uye wakati: “Musungwa Pauro wandidainza uye wandikumbira kuti ndiuye no murumbwana uu kamuri, ngokuti iyena ano zviro zvaari kuda kumubvunzai.”
19 Mutungamiriri we masurudado wakamubata nyara woenda naye pake ega uye wakamubvunzisa kuti: “Uri kuda kundibvunzei?”
20 Iyena wakadaira kuti: “Adjudha apangana kumukumbirai kuti muendese Pauro mangwana ku Sinedriyo, hingana kuti ari kuda kunyasa kuziya nyaya yake.
21 Asi musasiye kuti awona amucengedzei, ngokuti anarume anodarika 40 akafindarira Pauro, uye awona akaita mhiko kuti aizotukwa, kana akarhya kana kumwa asati amuuraya. Zvino awona akagadzirira ecietsera kuti mudaire cikumbiro cawo.”
22 Hino mutungamiriri we masurudado wakasiya kuti murumbwanewo aende, asi asati aenda wakamubvunza kuti: “Usabvunze munhu kuti iwewe wandibvunza izvi.”
23 Hino iyena wakadainza akuru-akuru airi e masurudado uye wakaabvunza kuti: “Gadzirirai masurudado 200, ahambisi e kavharo 70 uye aseenzesi e mapfumo 200 kuti aende ku Sezareya, pa nguwa 9 dzo usiku.*
24 Uyewo, gadzirirai makavharo kuti Pauro akwire, kuti mumutore akacengeteka moenda naye kuna govhernadhori Feriji.”
25 Uye iyena wakatara tsamba yaiti:
26 “Ndini Karaudhiyo Riziya, ndiri kutarira imwimwi, govhernadhori Anoreremedzwa Feriji: Tambirai micungamidzo yangu!
27 Mwanarume uu wakabathwa no Adjudha uye wainga wasara padoko kuti auraiwe nawo, asi inini ndakaenda nokukasika no masurudado angu uye ndakamuponesa, ngokuti ndakaziya kuti iyena ndi Muroma.
28 Hino ndecida kuziya kuti ngei awona ainga ecimupumha, inini ndakamutora ndoenda naye ku Sinedriyo yawo.
29 Ndakaona kuti iyena wainga ecipumhwa zviro zvinocokuita no mitemo yawo, asi aazi kupumhwa ciro cipi haco cinosisira kuti auraiwe kana kusungwa.
30 Asi ngokuti ndakabvunzwa kuti awona apangana kuti amuuraye, inini ndiri kumutuma nokukasika kamuri Munoreremedzwa, uye ndiri kutumawo aya ari kumupumha kuti arekete pamberi penyu zvaari kumupumha.”
31 Hino maererano no zvaakabvunzwa, masurudado akatora Pauro uye akaenda naye cousiku dakara ku Antipatridhe.
32 Pa zuwa rakazoteera, akasiya kuti ahambisi e kavharo aenderere mberi naye, uye amweni akahwirira ku kwarteri.
33 Ahambisi e kavharo akapinda mu Sezareya, akapasa tsamba govhernadhori uye akasiya Pauro mu nyara dzake.
34 Hino, govhernadhori wakaerenga tsambeyo uye wakabvunzisa kuti iyena wainga ari we provhinsiya ipi; wakabvunzwa kuti iyena wainga ari we ku Sirisiya.
35 Iyena wakati: “Inini ndicanyasa kupurutana nyaya yako yese kana aya ari kukupumha akaguma.” Uye wakaita kuti iyena acengethwe mu nyumba ya mambo Herodhi.
Masoko ari pasi
^ Kana kuti: “paredhi yakadzurhwa no mataka ekucena.”
^ Kana kuti: “anobhuya pamhene.”
^ Cigrego: “nguwa yocitatu.”
