Zviito zve Aphostori 24:1-27
24 Mumasure me mazuwa mashanu, mupristi mukuru Ananiya wakateredza no akuru anganani uye no muadhivhogadho* umweni unozwi Teturo, uye awona akabvunza govhernadhori nyaya yaaipumha Pauro.
2 Paakadainzwa, Teturo wakatanga kureketa ngezve nyaya yakhona eciti:
“Tiri kurarama mu runyararo rakakura nge ndaa yenyu, uye nge ndaa ye ungwaru wenyu mu nyika muno muri kugadziriswa zvakawanda;
3 nguwa dzese uye mu mbuto dzese isusu tinozviona uye tinotenda maningi imwimwi, Anoreremedzwa Feriji.
4 Asi kuti ndisamupedzerei nguwa yenyu, ndinomukumbirai kuti no unaki wenyu mumbotizwewo.
5 Ngokuti isusu taona kuti mwanarume uu ari kuunzisa dambudziko* pakati pe anhu, uye iyena ari kucengedza Adjudha ese anogara pasi pese kuti apandukire anyautongi, uye iyena ndi umwe we akuru-akuru e cikwata ce Anazareta.
6 Iyena wakaedzawo kusvipisa tempro, hino ndiyo ndaa takamubata.
7 * ——
8 Kana imwimwi mukamubvunzisa, mucaona kuti zviro zvese zvatiri kumupumha izvirokwazvo.”
9 Hino Adjudha akatsigirawo kupumha uku, ecibhuya kuti zviro zvese izvi izvirokwazvo.
10 Govhernadhori paakamubvunza no musoro kuti arekete, Pauro wakadaira kuti:
“Ndecinyasa kuziya kuti imwimwi muri mutongi we nyika ino ke makore akawanda, ndino mupfaro we kureketa ndecidzidziirira.
11 Hinga zvamuri kuona, apazi kudarika mazuwa 12 kubvira pandakakwidza kuenda ku Djerusarema koonamata;
12 uye awona aazi kundigumira ndecireketedzana no munhu mu tempro kana ndecipfuridzira anhu kuti mumuke woyo-woyo mu masinagoga, kana ku mbuto imweniwo yo thaundi.
13 Uye apana zvaangamupangidzai zvinopupurira izvi zvaari kundipumha.
14 Asi candinotenda nge cekuti: Ndiri kuhamba maererano no gwanza iri raanodainza kuti cikwata, uye ndeciita basa rakacena kuna Mwari we madzitsekuru angu, ndecitenda zvese zvinobhuiwa no Mutemo uye zvakatarhwa no Aphorofita.
15 Uye inini ndino kariro kuna Mwari, kariro yekuti anhu aya anayoo, yekuti kucaoneka kumutswa ke anatsi no asiripi anatsi.
16 Nge ndaa yazvo, inini ndinorumbwa ndecipeta masimba kuti ndigare no hana yakacena* pamberi pa Mwari uye pe anhu.
17 Mumasure me makore akawanda, ndakauya mu Djerusarema kuti ndiite zvipo* zve kubetsera arombo uye kuita mipiro.
18 Pandainga ndeciita zviro izvi, awona akandigumira mu tempro ndakacena maererano no mutemo; inini ndainga ndisiripi no anhu kana ndeciita kuti paoneke woyo-woyo. Asi imona mainga muno Adjudha anganani e provhinsiya yo Aziya,
19 awona ndiwo aidikana kuuya pamberi penyu kuti andipumhe, kudai awona ainga anazvo kamare zviro zvekundipumha.
20 Kana kuti, anarume aya ngaabhuye kuti cinyi caakaona candakashaisha pandainga ndiri pamberi po Sinedriyo,
21 pamweni nge ndaa ye masoko aya andakabhuya pamberi pawo ndeciti: ‘Inini ndiri kutongwa nyamasi pamberi penyu nge ndaa ye kumutswa ke akafa!’”
22 Asi, sezvo Feriji wainga ecinyasa kuziya ngezve Gwanza iri, wakambosiya nyaya ii, eciti: “Kana Riziya, mutungamiriri we masurudado akateredza, ndicaita cisananguro ngezve nyaya yenyu ii.”
23 Hino iyena wakabvunza mukuru we masurudado kuti amucengete mu kadheya, asi ambomupasewo rusununguko, uye atendere kuti anhu e dzinza rake amuriritire pa zviya zvaaida.
24 Mumasure me mazuwa manganani, Feriji wakauya no mukadzi wake Drusira, uwo wainga ari Mudjudha; wakadainzisa Pauro uye wakamupurutana ecireketa ngezve kutenda muna Kristu Djesu.
25 Asi Pauro paakatanga kureketa ngezve unatsi, kudzibata uye kutongwa kaizouya, Feriji wakathya uye wakati: “Pari zvino cimboenda hako, asi kana ndikagara no mukana umweni, ndicazokudainzisazve.”
26 Nge dii rimweni, iyena waietsera kuti Pauro amupase mare. Ndiyo ndaa, waimudainzisa kakawanda uye waicedza naye.
27 Asi mumasure me makore mairi, Feriji wakatsiiwa na Porsiyo Festo; uye, sezvo Festo waida kuoniwa zvakanaka no Adjudha, iyena wakasiya Pauro mu kadheya.
Masoko ari pasi
^ Munhu unodairira ndaa mu tribhunari.
^ Cigrego: “munhu uu i nhenda.”
^ Onai Apendi. A3.
^ Kana kuti: “hana isina ndaa.”
^ Kana kuti: zvipo zve usisi. Onai pakazwi Kupanganidzwa ke Masoko, “Zvipo zve Usisi.”
